Rusiya Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsinin sədri Leonid Kalaşnikov bildirib ki, iki dövlətin sərhədində toqquşmalar sülh müqaviləsi imzalanana qədər davam edəcək: “Mən həqiqətən inanmıram ki, indi tərəflər (Azərbaycan və Ermənistan) Brüsseldə sülh müqaviləsi imzalaya biləcəklər”.
Deputat hesab edir ki, münaqişənin həlli yalnız Rusiyanın iştirakı ilə mümkündür. O xatırladıb ki, 2020-ci ildə Rusiya prezidenti Vladimir Putin, Azərbaycan lideri İlham Əliyev və Paşinyan üçtərəfli saziş imzaladıqdan sonra münaqişə zonasında hərbi əməliyyatlar dayandırılıb.
Çox maraqlıdır, Kalaşnikovda bu əminlik hardandır ki, sülh sazişi üçün Brüsseldəki görüşə güvənməyə dəyməz və bu yalnız Rusiyanın iştirakı ilə mümkün ola bilər?
Politoloq Elşən Mustafayev “Bakı-Xəbər”ə açıqlamasında bildirdi ki, ABŞ Dövlət katibi Antoni Blinkenin Vaşinqtondakı danışıqlarda əhəmiyyətli dərəcədə irəliləyiş əldə edilməsi ilə bağlı bəyanatlarından sonra Rusiya açıq şəkildə prosesə mane olacağını bəyan etdi. Kalaşnikovdan da yuxarı statuslu Rusiya rəsmiləri bunu açıq ifadə etdilər. Bu barədə Rusiya Xarici İşlər Nazirliyinin nümayəndəsi Mariya Zaxarova mayın 10-da keçirdiyi brifinqdə danışıb. Onun sözlərinə görə, Blinken danışıqlarda əhəmiyyətli dərəcədə irəliləyişin əldə olunduğunu desə də, rəsmi Bakı və rəsmi Yerevan əsas məsələlərlə bağlı fikir ayrılıqlarının qaldığını qeyd ediblər. Zaxarova xəbərdar edib ki, Moskva Azərbaycan-Ermənistan münasibətlərinin normallaşması ilə bağlı gördüyü işi davam etdirəcək, artıq iki ölkənin xarici işlər nazirlərinin danışıqları üçün məkan təklif olunub. Rusiya bildirir ki, məqsədi regionda sülhü təmin etməkdir və bunun üçün yeganə yolu üçtərəfli razılaşmaların icra olunmasıda görür. Öz növbəsində mayın 10-da Azərbaycan xarici işlər naziri Ceyhun Bayramov bildirib ki, Vaşinqton danışıqlarında sülh müqaviləsi üzrə bəlli maddələrdə razılaşmalar əldə edilib. Rusiya Azərbaycan və Ermənistan arasında sülh danışıqlarında Qərbin vasitəçiliyinə birmənalı baxmır. Biz bilməliyik ki, müsbət danışıqlardan, hansısa sülhyaratma prosesində bir addım irəli getdikdən sonra təxribatlar olmalıdır. Dəfələrlə bunun şahidi olmuşuq. Hazırda sərhədlərimizdə baş verənlər buna sübutdur. Bəllidir ki, Azərbaycanla Ermənistan arasında danışıqların iki formatı mövcuddur. Bunlardan biri ABŞ-ın, yəni kollektiv Qərbin təşkil etdiyi, digəri isə Rusiyanın vasitəçiliyi ilə yaradılan danışıqlar masasıdır. Ümumiyyətlə, Rusiya Qərbin təkliflərinə qısqanclıqla yanaşır. Bunu özləri də gizlətmir və Rusiya Azərbaycan və Ermənistan arasında sülh danışıqlarında Qərbin vasitəçiliyinə birmənalı baxmır".
Məhəmmədəli QƏRİBLİ
