İrəvan yeni təxribatlara əl atmaqla, sülh prosesini pozmaq cəhdlərindən hələ də əl çəkmədiyini göstərir. Hər halda, Ermənistanın təxribatı üzündən sərhəddə baş verən son toqquşmalar da bunun təsdiqidir. Görünür ki, döyüş meydanında məğlub olan və kapitulyasiya aktına imza atan Ermənistan rəhbərliyi hələ də bu reallığı qəbul etmək istəmir.
Ermənistan sərhəd təxribatına əl atmaqla sülhü pozmağa çalışır. Təfərrüatlardan aydın olur ki, bu, Ermənistan tərəfindən məqsədyönlü şəkildə törədilmiş növbəti təxribatdır. Beynəlxalq ictimaiyyət tərəfindən sülh sazişi üzrə danışıqlara ciddi çağırışlar fonunda Ermənistanın bu cür təxribatlar törətməsi səbəbsiz deyil. Rəsmi Bakı haqlı olaraq Ermənistanın bu davranışını regional sülh və təhlükəsizliyə ciddi şəkildə təhdid hesab edir. Bölgədə baş verən bütün təxribatlara görə məsuliyyət tam şəkildə Ermənistanın üzərinə düşür. Ermənistanın özünə bəraət qazandırmaq məqsədilə verdiyi açıqlamalar isə başdan-ayağa ziddiyyətdir. Bu təxribat danışıqlar prosesində müəyyən pozitiv meyllərin olduğu bir dövrdə baş verdi. Bu onu göstərir ki, Ermənistan həmişəki kimi problemin aradan qaldırılmasında deyil, onun daha da dərinləşməsində maraqlıdır. Türkiyənin Azərbaycandakı səfirliyinin keçmiş hərbi attaşesi, istefada olan general-mayor Yücel Karauz bu fonda qeyd edir ki, Ermənistan birmənalı şəkildə sülh istəmir: “Ermənistan hüzur, sabitlik istəmir. Sadəcə özünü elə qələmə verir ki, güya sülh prosesini istəyir. Belə olduqda isə öz dövləti, öz xalqı ola bilmir. Ermənistanın 200 ildir funksiyası ondan ibarətdir ki, regionda qan, göz yaşı, hüzursuzluq, qeyri-sabitlik törədir. Dolayısı ilə Ermənistanın “dayday”ları onların qulaqlarına üfürərək pıçıldayır ki, “sülh bəyannəməsi imzalamadan buranı idarə et. Bölgədə sabitliyi poz, göz yaşı olsun”. Azərbaycan törədilmiş bu silahlı təxribata mütləq hərbi müstəvidə cavab verməlidir. Ermənistan tərəfi Vaşinqtona gedir, daha sonra isə başqaları ona deyir ki, qətiyyən sülh imzalama geri qayıt. Bir müddət sonra isə terror aktının şahidi oluruq. Brüsselə getdikdə isə bundan narahat olan “qardaşlar”ı bildirir ki, bunu Brüssel vasitəsilə etmə. Bildiyimiz kimi, yaxın günlərdə Brüssel və Moskvada görüşlərin keçirilməsi nəzərdə tutulur. Lakin Ermənistan adəti üzrə düşünür ki, bəlkə zamana uyğunlaşaraq keçmişdə qazandıqlarımı yenidən əldə edə bilərəm., yenidən Qafqazın “ərköyün” uşağı ola bilərəm. Düşmən tərəfi bu fikirlərlə Azərbaycana, Azərbaycan xalqına qarşı terror hadisələri törətməkdə davam edir. Bunların hamısı yalnız bir məqsədə xidmət edir: o da vaxt qazanmaq. Onlar tamamilə pis niyyətlidirlər, öz dövlət ağıllarının xaricində başqalarının aşıladığı, beyinlərinə yeritdiyi ağılı üzərinə götürmək, əməl etmək niyyətindədirlər. Təbii ki, sülh prosesinə uzanan yolda atəşkəs razılaşmasından təxminən 33-34 ay keçib. Sözsüz ki, Azərbaycanın da səbrinin bir sərhədi var. İndi Azərbaycan üçün zərurət hərbi müstəvidə qarşılıq verməkdir. Yaxın müddətdə mütləq bu təxribata qarşı ağır zərbə endiriləcək, "Dəmir yumruq" bir daha onların başlarını əzəcək”.
İndilikdə belə görünür ki, tam sürətlə sülh müqaviləsini imzalamağa Ermənistan tərəfi hələ hazır deyil. Təxribatlara əl atmaqla da Ermənistan sadəcə olaraq vaxt uzadır. Əgər hadisələr bu minvalla inkişaf etsə, Azərbaycan öz hərbi, siyasi və iqtisadi mövqelərini real olaraq daha da gücləndirəcək. Ermənistan isə heç nə qazanmayacaq. Onsuz da yaxşı olmayan vəziyyətləri daha da pisləşəcək. Buna görə də insanlar Ermənistanı, xüsusilə də Qərbi Zəngəzuru tərk edirlər. Bunlar fonunda düşmən hələ də təxribat siyasətindən əl çəkmir. Qeyd edildiyi kimi, Ermənistan hakimiyyətinin təxribata əl atması rəsmi İrəvanın sülh danışıqlarından qaçmasının göstəricisidir. Bu təxribat bir daha sübut edir ki, Ermənistan Azərbaycanla münasibətlərin normallaşmasında maraqlı deyil, əksinə, problemin daha da böyüməsində, qarşıdurmanın artmasında maraqlıdır. Ona görə də sərhədyanı atışmanın bütün məsuliyyəti Ermənistanın hərbi-siyasi rəhbərliyinin üzərinə düşür. Onu da qeyd edək ki, Azərbaycan, Rusiya və Ermənistan liderləri arasında üçtərəfli bəyanatın imzalanmasından 3 ilə yaxın vaxt keçməsinə baxmayaraq, Ermənistan hakimiyyəti üzərinə götürdüyü öhdəliklərə əməl etmir. Ötən illərdə olduğu kimi, görünür, yenə də regionun qarışmasında maraqlı olanların dəstəyinə arxayındır. Həmin qüvvələr Cənubi Qafqazda öz maraqlarını həyata keçirmək üçün Ermənistandan və ermənilərdən alət olaraq yararlanırlar. Bu isə ermənilərin özünə zərər edir. Sərhəddəki atışma Azərbaycana geniş imkan yaradır ki, delimitasiya prosesi çərçivəsində təxribat axıdılan mövqeləri legitim hədəfə çevirsin. Azərbaycan bunu hərbi potensialının az hissəsi ilə gerçəkləşdirmək imkanına sahibdir. Hər halda, bunu ermənilər də yaxşı bilir.
Tahir TAĞIYEV
