“Bakının razılığı olmadan Ermənistan-Azərbaycan sərhədində Avropa İttifaqı missiyasının yerləşdirilməsi səmərəsizdir”. Bu barədə Moskvada keçirilən mətbuat konfransında Rusiyanın xarici işlər naziri Sergey Lavrov bildirib.
Onun fikrincə, Aİ-nin Azərbaycan-Ermənistan sərhədində missiyası Bakının razılığı olmadan əks effekt verə bilər: “Unutmaq olmaz ki, ora Azərbaycan sərhədidir və missiyanın icazəsiz yerləşdirilməsi əlavə gərginlik yarada bilər. Bu, sərhəddə etimadı möhkəmləndirmək yerinə əlavə qıcıq yarada bilər. Müttəfiq olmağımıza, KTMT missiyasının tamamilə hazır olmasına baxmayaraq, Ermənistan tərəfi orada uzunmüddətli əsaslarla mülki müşahidəçilər missiyası yerləşdirilməsi üçün Aİ ilə razılaşmağa üstünlük verir”.
Görünən odur ki, Rusiya açıq şəkildə Ermənistanın bununla bağlı Avroittifaqla əməkdaşlıq etməsinə qarşıdır.
“Rusiya münaqişənin həllini istəyirsə, proses niyə bu qədər uzanır, silahlı separatçılar niyə tərksilah edilmir?”
Məsələyə münasibət bildirən AMİP-in sədr müavini Afsəddin Nəbiyevin fikrincə, yaşadığımız mürəkkəb geosiyasi tarixi şəraitdə Rusiya xarici işlər naziri Sergey Lavrovun “balanslı mövqe nümayişi” başadüşüləndir: “Əslində Sergey Lavrov Ermənistan-Azərbaycan sərhədində Aİ missiyasının yerləşdirilməsinin səmərəsiz olduğunu dilə gətirməklə bu bölgədə Rusiyanın mövqeyinin zəiflədilməsi kimi dolayı fikirlərini ifadə edib. Daha da aydınlatmış olsam, yəni demək istəyir ki, Aİ missiyasına ehtiyac yoxdur. Biz buradayıq. Məsələnin əsl mahiyyəti ondan ibarətdir ki, nə Qərbin, nə də Rusiyanın hazırda Azərbaycanın öz ərazisində suverenliyinin tam təmin olunmasında heç birinin marağı yoxdur. Fikirlərimi belə ifadə edərdim ki, həm Qərbin missiyası, həm də Rusiya bu bölgədə nüfuz mübarizəsi aparmaqdadır. Bəzi təhlilçilər hesab edirlər ki, Rusiya Ukrayna meydanında zəiflədikcə digər bölgələrdən tədricən geriyə çəkilmək məcburiyyətində qalacaq. Bəlkə də bu, ehtimalllardan biridir. Ancaq real situasiyada biz müşahidə edirik ki, Rusiya, dünyada nüfuzdan düşməsinə baxmayaraq, aqressiv siyasətindən əl çəkmək niyyətində olmadığını nümayiş etdirməkdədir. Təkcə son üç ili nəzərdən keçirsək, Rusiyanın öz imza atdığı Bəyanata məhəl qoymadığının canlı şahidləriyik. 10 noyabr Bəyanatında Qarabağda yerləşən erməni silahlı qüvvələrinin çıxarılmasını erməni tərəfi öz üzərinə öhdəlik götürüb. Az qala bu Bəyanatdan üç ilə yaxın vaxt keçib, hələ də erməni silahlıları "sülhməramlıların" gözü qarşısında dinc Azərbaycan vətəndaşlarını təhdid edir. Zəngəzur yolunu bu problemin üzərinə gəlsək, bu Bəyanatın bəndlərinin yerinə yetirilmədiyi göz önündədir. Bir sözlə, Rusiya münaqişənin həllini istəyirsə, proses niyə bu qədər uzanır, silahlı separatçılar niyə tərkisilah edilmir? Hələ emissarı Ruben Vardanyanı Qarabağa göndərməklə vəziyyəti bir az da qəlizləşdirir. Ümumiyyətlə, Azərbaycan dövləti heç bir missiyanın bölgəyə daxil olmasına razılıq verməməlidir. Azərbaycan ərazisində dövlətimizin müstəqilliyini, ərazi bütövlüyü qoruyan yeganə missiya var ki, o da müzəffər Azərbaycan Ordusudur. Başqa "missiyalar" səmimi ola bilməzlər. Onların hər birinin bu bölgədə siyasi maraqları vardır. İnanıram ki, məhz bu ildə - 2023-cü ildə Azərbaycan dövləti qalıb Ordumuza güvənərək gərəkli addımları atmaqla üçrəngli bayrağımızı Xankəndidə dalğalandıracaq”.
Bu baxımdan sədr müavini hesab edir ki, Azərbaycan qarşıya qoyduğu məqsədlərə çatacaq.
Vidadi ORDAHALLI
