Rusiya vətəndaşlığından çıxıb Azərbaycana - Rusiya sülhməramlılarının nəzarətində olan Qarabağa köçdüyünü elan edən erməni milyarder Ruben Vardanyan özünün sosial şəbəkə hesabında yazıb ki, Qarabağ məsələsi ilə bağlı bir sıra beynəlxalq görüşlər keçirmək üçün Fransaya səfərə gedib: “Mən müxtəlif ölkələrin nüfuzlu adamlarına Artsaxın (Qarabağ - red.) təhlükəsizliyini və inkişafını təmin etmək üçün hərəkətlərimizi izah etməyi vacib hesab edirəm. Bu gün həm diaspordan, həm də Ermənistandan olan dostlarımızın bu xarici resursdan erməni xalqının maraqları naminə istifadə etməsi çox vacibdir. Fransada özəl tədbirdə iştirak edəcəyəm və eyni zamanda ümumi işimizə mühüm töhfə verə biləcək insanlarla görüşməyi planlaşdırıram”.
Vardanyanın Rusiya vətəndaşlığından imtina edərək Qarabağda məskunlaşmasının səbəbləri ilə bağlı müxtəlif versiyalar var. Bu versiyalardan birinə görə, onun məqsədi sanksiyalardan yayınmaqdır. Digər versiyalara görə, erməni milyarderin arxasında Rusiyadakı və ya Qərbdəki ermənipərəst qüvvələr dayana bilər. Bildirilir ki, o, ilkin olaraq qondarma qurumun “rəhbərliyinə” gətirilə bilər. Vardanyan isə “dövlət işində” təmsil olunmaq istəmədiyini deyib: “Mən mənəvi baxımdan da daxil olmaqla, tam fəaliyyət azadlığına malik olmaq istəyirəm. Bütün hallarda Qarabağ hələ də tamhüquqlu müəyyən statusa malik olmayan bir ərazidir və bu münaqişə hekayəsində mən Rusiyanı təmsil etmək istəmirəm. Qarabağda ölkənin və regionun təhlükəsizliyini gücləndirəcək güclü iqtisadiyyata və sosial institutlara malik uğurlu cəmiyyətin qurulması üçün şərait yaradılmalıdır. Bu mənada əsas funksiyam həm idarəçilik, həm də maliyyə əlaqələrimdən, o cümlədən danışıqlar aparmağı bilən bir insan kimi imkanlarımdan istifadə etməkdir ki, son dərəcə çətin vəziyyət şəraitində dərin uzunmüddətli münaqişə nəticəsində minlərlə ildir ermənilərin Qarabağda yaşadığı torpaqlarını saxlaması üçün hər şeyi edim”.
Ermənistanın Vardanyanın əli ilə separatçılıq fəaliyyətinin yeni dalğasına başladığını iddia edə bilərikmi?
Rəşad Bayramov: “Onun, hətta Ermənistanda rəhbər posta gətirilməsi kimi plan da mövcuddur”
Politoloq Rəşad Bayramov “Bakı-Xəbər”ə açıqlamasında bildirdi ki, Vardanyan Rusiyada varlanan adamdır: “Onun sərvəti milyardla ölçülür. Ayrı-ayrı mətbu nəşrlərdə onun sərvətinin 5 milyard dollar həcmində olduğu deyilir. Vardanyan həm də Qarabağ futbol klubunun oyunu zamanı Bakıya gəlməkdən imtina edən erməni əsilli futbolçu Mxitaryanın qaynatasıdır. O, hazırda dünyadakı erməni diaspor təşkilatlarının əsas havadarlarından biri hesab edilir. Onun təsis etdiyi təşkilat neçə illərdi ki, qondarma “soyqırımının” tanıdılması ilə məşğul olur. Hətta bu istiqamətdə fəsliyyət göstərən xarici parlamentarilərə pul bonusları ayırdığına dair faktlar da mövcuddur. Dünya biznes elitasında həm də çirkli pulları yuyan dələduz kimi tanınır. Keçən ilin dekabr ayında o, Rusiya mediasına müsahibəsində demişdi ki, Ermənistanda hakimiyyətə gəlmək istəyir. Paşinyanı Qarabağdakı ermənilərə yaxşı sahib çıxa bilməməsinə görə sərt tənqid edirdi. İndi də gəlib Qarabağdakı ermənilərin təhlükəsizliyini qorumaq fikrinə düşdüyünü deyir. Hətta bütün dünyanı da buna səsləyir. ABŞ və Fransanı da ayrıca bu fəaliyyətə səsləyir. Onun Rusiya vətəndaşlığından imtina etməsi bir sıra mətləblərdən xəbər verir. Görünür, Rusiya onun əli ilə proseslərə təzyiq etmək yolunu tutmaq istəyir. Onun anti-Paşinyan mövqeyində olması göstərir ki, Rusiyanın ehtiyat oyunçularından biridir. Vardanyan həm də öz varidatını qorumağa çalışır. Ona görə belə gedişlər edir. Ancaq onun əsas məqsədi Moskvanın əli ilə oynanan siyasi oyunlarda yer almaqdır. Onun Qarabağda rəhbər posta gətirilməsi də ola bilər. Onun, hətta Ermənistanda rəhbər posta gətirilməsi kimi plan da mövcuddur”.
Məhəmmədəli QƏRİBLİ
