Ermənistan mediasının yaydığı məlumata görə, baş nazir Nikol Paşinyan Vladivostokun erməni icması ilə görüşündə iştirak edənlərdən birinin regional kommunikasiyaların açılmasının Ermənistan, xüsusən də Qərbi Zəngəzur bölgəsi üçün nə dərəcədə təhlükə yarada biləcəyi sualına toxunaraq bildirib ki, Ermənistan hakimiyyəti heç kimə ölkə ərazisindən dəhliz verməyəcək:
“Kommunikasiyaların açılması Ermənistan və Sünik bölgəsi üçün heç bir təhlükə yaratmır, əksinə, təhlükəsizlik və sabitliyə əlavə təminatlar gətirəcək. Azərbaycan tərəfinin nitqində bəzən müəyyən təhlükələrdən xəbər verən ifadələr yer alır. Məsələn, dəhlizdən danışırlar. Mən açıq şəkildə bildirmək istəyirəm ki, biz heç kimə Ermənistan ərazisindən dəhliz verməyəcəyik”.
Paşinyanın bu açıqlaması imzalanan üçtərəfli sənədin müddəalarına tam ziddir. Çünki kapitulyasiya aktına imza atan Paşinyan məhz dəhliz öhdəliyini üzərinə götürüb. Bu yayınmanın sonu necə olacaq?
Bünyamin Qəmbərli: “Biz bir çox reallıqları Ermənistana könüllü yox, təzyiqlə qəbul etdirmişik”
üstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, Paşinyanın nə deməsindən asılı olmayaraq, onun və dünyaya səpələnmiş bütün ermənilərin tarixi dəyişmək gücləri yoxdur: “Həmin ərazilər tarixi Azərbaycan torpağıdır. Min illər boyunca həmin ərazilərdə Azərbaycan türkləri yaşayıb. Həmin ərazilər Azərbaycan hökmdarları tərəfindən idarə edilib. Mən dəfələrlə demişəm ki, ən yaxşı müdafiə hücumdur. Biz Şərqi Zəngəzur, Göyçə, Basarkeçər, Dərələyəz məsələsini gündəmə gətirdikcə onlar Qarabağı tam yaddan çıxaracaqlar. Məcbürən bəzi faktları da etiraf etmək zorunda qalacaqlar. Bizim elm adamlarımız, jurnalistlərimiz SSRİ dönəmində Ermənistanda çıxan tarix kitablarını ələk-vələk etməlidirlər. Sövet dönəmində Ermənistanda çıxan tarix kitablarında İrəvan xanlığı, bizim tarixi abidələrimizlə bağlı maraqlı faktlar mövcuddur. Hökumət qurumları da bu istiqamətdə araşdırmalar aparmalıdır. Belə faktlar ortaya çıxdıqca onlar geri çəkilməyə məcbur qalacaqlar. Biz hər zaman müdafiə mövqeyində oluruq. Bundan imtina etməliyik. Dəhlizlə bağlı öhdəliyi Paşinyan imzası ilə üzərinə götürüb. Onlar bunun yol olmasını istəyirlər. Biz isə dəhlizdə israrlıyıq. Bunlar fərqli şeylərdi. Təbiidir ki, biz razı deyilik həmin yoldan keçəndə erməni sərhədçisi və ya gömrükçüsü bizi yoxlasın. Biz bir çox reallıqları Ermənistana könüllü yox, təzyiqlə qəbul etdirmişik. Bu məsələdə də elə olacaq”.
Məhəmmədəli QƏRİBLİ
