Ukraynada hərbi əməliyyatlar tezliklə bitməyəcək. Qərb dövlətlərinin Ukraynaya “metallom” hesab edilə biləcək silahlar göndərməsinə baxmayaraq, nə Ukrayna, nə də Rusiya silah məsələsində bir-birindən geri qalır. Qərb dövlətlərinin siyasəti isə yalnız münaqişənin gərginləşməsinə xidmət edir.
Bu sözləri Türkiyə prezidenti Rəcəb Tayyib Ərdoğan Serbiya Prezidenti Aleksandar Vuçiçlə danışıqlardan sonra keçirilən brifinqdə bildirib. Onun sözlərinə görə, Ukraynaya silah göndərilir, onların çoxu “metallom” olsa da, yenə də göndərməkdə davam edirlər: “Bu məsələdə nə Rusiya, nə də Ukrayna qalibdir. Bu, görünür, hər şeyin tezliklə bitməyəcəyini göstərir. Rusiya təbii qaz nəqlini dayandırıb və Avropada qiymətlər bir anda qalxıb. Hər kəs ən pisini gözləyir. Niyə əvvəllər bu haqda düşünmədiniz?” Ərdoğan neytrallıq siyasətini Ukrayna münaqişəsi ilə bağlı düzgün mövqe hesab edir: “Türkiyə həmişə Rusiya ilə Ukrayna arasında balans siyasəti aparıb. Biz neytrallıq siyasətimizi davam etdirəcəyik . Bu müharibədə qaliblərin olduğunu deyə bilərikmi? Qalib yoxdur, amma itirənlər çoxdur. İnsanlar ölür”. NATO, eləcə də adının açıqlanmasını istəməyən Aİ rəsmiləri və diplomatlar CNN-ə bildiriblər ki, Avropada bu qış gözlənilən enerji böhranı Qərb ölkələrinin Rusiya-Ukrayna müharibəsi ilə bağlı mövqeyini dəyişə bilər. CNN həmsöhbətləri qeyd ediblər ki, yalnız bir məqamda Avropa vətəndaşlarının maraqları Ukraynaya hərbi dəstək həvəsindən üstün ola bilər.
Ərdoğanın bu ittihamlarına Qərb ölkələri və Ukrayna cavab verəcəkmi?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ərdoğanın səsləndirdiyi fikirlər tam reallığı əks etdirir: “Ukrayna bu ittihamlara heç bir cavab verməyəcək. Çünki bu ittihamları Ukrayna prezidenti Zelenskinin özü də dəfələrlə Qərbin və ABŞ-ın ünvanına səsləndirib. Bəyan edib ki, onlara lazımi müasir silahlar vermirlər. Hətta bu yaxınlarda deyilən məzmunda şikayəti Ərdoğanın özünə etdi. ABŞ yaxasını kənara çəkərək Qərbin və Ukraynanın əli ilə Rusiyada müharibə aparır. Həm də maksimum az xərc çəkməklə ciddi nəticələr əldə etməyə çalışır. Qərb ölkələri də hadisələrin plan üzrə getmədiyini görür. Avropanın Rusiya qazından asılılığı çoxdur. Heç bir alternativ mənbə bu itkini kompensasiya etmək gücündə deyil. Qarşıdan soyuq qış gəlir. Artıq bəzi Avropa ölkələri çıxış yolunu Rusiya ilə münasibətləri normallşdırmaqda görür. Rusiya bir çox strateji təbii ehtiyatlara sahibdir. Əlində olan bu rıçaqla Qərbi böhrana salacaq. Onlar müharibənin belə uzun sürəcəyini proqnozlaşdırmayıblar. Qərb informasiya müharibəsində Rusiyanı çox üstələyir. Təbiidir ki, Ərdoğanın “metallom” ittihamına da lazımi cavabı verəcək. Ancaq bu, yekun nəticəni dəyişməyəcək. Ərdoğan çox doğru siyasət yürüdərək, bu məsələdə neytral yol seçib. Bununla da ölkəsini iqtisadi kataklizmlərdən xilas edib. Belə davam edəcəyi təqdirdə Qərb ölkələrinin özündə yerli hökümətlərə etirazlar ediləcək. Müharibənin bu şəkildə uzanması heç kimə sərf etmir”.
Məhəmmədəli QƏRİBLİ
