Ermənistanın baş naziri Nikol Paşinyan Vladivostokda keçirilən Şərq İqtisadi Forumunda çıxışı zamanı bir sıra məsələlərə toxunub.
Paşinyan beynəlxalq ictimaiyyətin diqqətinin Ukrayna böhranına yönəldilməsinin Cənubi Qafqazda vəziyyətin sabitliyinin pozulmasına gətirib çıxara biləcəyindən narahatlığını bildirib: “Hazırda Cənubi Qafqaz regionu üçün çətin dövrdür, təhlükəsizliyə təhdidlər var. İndi dünya birliyinin və Ermənistanın strateji tərəfdaşı Rusiyanın diqqəti Ukraynaya yönəlib. Bu, regionda sabitliyin pozulmasına gətirib çıxara bilər. Rusiyanın Ukraynadakı müharibə ilə həddən artıq məşğul olduğunu və bundan sabitliyi pozmaq üçün istifadə edə biləcəklərini düşünən qüvvələr var. Bu qüvvələr gələcəkdə öz hərəkətlərinə haqq qazandırmaq üçün Moskvada Ermənistanı qərbyönlü, Qərbdə isə Rusiyapərəst hökumətli ölkə kimi təqdim etmək istəyirlər”.
Maraqlıdır, Paşinyan başınız Ukraynada qarışıb, Qafqaz unudulub deməklə Rusiyanı nəyə təhrik edir?
“Bundan sonra regionun əsas konfiqurasiyasını Bakı müəyyənləşdirəcək”
Məsələyə münasibət bildirən politoloq Tural İsmayılovun sözlərinə görə, əslində Paşinyanın sözügedən tədbirdə çıxışı Rusiya rəhbərliyi tərəfindən də ciddi qarşılanmır: “Hətta Rusiyada olan erməni miqrantları ilə bağlı Paşinyanın açıqlaması da prezident Vladimir Putinin xoşuna gəlmədi. Növbəti dəfə Putin ictimaiyyət qarşısında miqrantlar məsələsinə toxunaraq, bir növ Paşinyana siyasi şapalağını göstərdi. O baxımdan hesab edirəm ki, məlum açıqlama bu qəbildən hesab edilməlidir. Paşinyanın əsas məqsədlərindən biri odur ki, Rusiya Ermənistana görə Azərbaycan və Türkiyəyə təzyiq göstərsin. Nəzərə almaq lazımdır ki, Ermənistan iqtidarının hazırkı qeyri-siyasi xətti, eyni zamanda həm Qərb, həm də Rusiya ilə “siyasi manevr” etmək cəhdi Kreml rəhbərliyi tərəfindən qıcıqla qarşılanır. Ermənistanın daxili siyasi auditoriyasında baş verənlər də göstərir ki, Rusiyaya bağlı olan siyasi qüvvələr Paşinyana qarşı birləşiblər. Bunun nəticəsidir ki, qarşıdakı aylarda Paşinyana qarşı mitinqlərin güclənəcəyi gözlənilir. Ona görə də Paşinyan Vladivostokda keçirilən tədbirdə bir növ Rusiya rəhbərliyinə yalvardı. Nəzərə almaq lazımdır ki, bundan sonra regionun əsas konfiqurasiyasını Bakı müəyyənləşdirəcək. O üzdən, Rusiya Azərbaycan tərəfindən irəli sürülmüş bir çox şərtləri, həmçinin kommunikasiya xətlərinin açılmasını, sərhədlərin delimitasiyasını təmin etməlidir. Həmçinin, Kreml Zəngəzur dəhlizi məsələsində Azərbaycanın mövqeyi ilə razılaşır. Sadəcə olaraq, Ermənistanı gələcəkdə Azərbaycan və Türkiyəyə qarşı hansısa təzyiq vasitəsi kimi istifadə etmək üçün əlində saxlamağa çalışır. Digər tərəfdən, Rusiya hakimiyyətinə yaxşı məlumdur ki, bu gün Ermənistanda Sorosa yaxın siyasi qüvvələr hakimiyyətdədir. Onlar bütün dövlət institutlarına sızmağı bacarıblar. Bu baxımdan indiki Ermənistan hakimiyyətinin riyakarlığı Rusiya hakimiyyətinə yaxşı bəllidir. O üzdən, Paşinyan yaxşı bilir ki, onun istəklərini Putin qəbul etməyəcək. Sadəcə, Nikol belə fikirlər səsləndirməklə daxili auditoriyaya oynayır”.
Bu baxımdan politoloq hesab edir ki, ümumən Paşinyanın sonuncu Rusiya səfəri uğursuz oldu.
Vidadi ORDAHALLI
