Məlum olduğu kimi, Ermənistanın baş naziri Nikol Paşinyan öz partiyasının üzvləri və deputatlarla qapalı görüş keçirib. O, görüşdə ilin sonuna qədər Azərbaycanla sülh sazişi imzalamaq niyyətində olduğunu bildirib.
Parlamentin müdafiə və təhlükəsizlik komissiyasının sədri, hakim partiyanın təmsilçisi Andranik Köçəryan jurnalistlərə görüş faktını və Paşinyanın bəyanatını təsdiq edib. O, sülh sazişinin imzalanması müddəti haqqında suala cavabdan yayınıb və belə deyib: “Bu istiqamətdə iş gedir, görüşlər keçirilir”.
Bununla belə, A.Köçəryan bəyan edib ki, Ermənistanın sülh danışıqlarını uzatmaq şansı yoxdur. Eyni zamanda o, sazişin imzalanmasının gecikməsinin Ermənistan tərəfin maraqlarına uyğun olmadığı haqqında mühüm bir məqama toxunub: “Hazırda biz elə bir vəziyyətə düşmüşük ki, bizim vaxtı uzatmaq şansımız yoxdur”.
Görünən odur ki, Ermənistanın ən yüksək rəsmiləri vaxt uzatmağın ölkənin ziyanına işlədiyinin fərqindədir və bunu etiraf edirlər. Bu isə o qənaətə gəlməyə əsas verir ki, revanşist qüvvələr sülh sazişinin imzalanmasına qarşı olsalar da, hakimiyyət sazişin imzalanmasında qərarlı görünür.
“Paşinyan vaxtdan düzgün istifadə etməsə və bəzi konkret praktiki addımlar atmasa, vəziyyət bir müddət sonra onun əleyhinə işləyəcək”
Məsələyə münasibət bildirən AMİP funksioneri Əli Orucovun fikrincə, Ermənistan rəsmilərinin sülh mesajları verməsi müəyyən amillərlə bağlıdır: “Əvvəla, Ermənistan hakimiyyəti gördü ki, dünya ölkələri, aparıcı beynəlxalq qurumlar Azərbaycanın hərb yolu ilə öz ərazi bütövlüyünü təmin etməsinə qarşı çıxmadılar. Müharibədən sonrakı dövrdə də bununla bağlı ermənilərin gözləntiləri özünü doğrultmadı. Bununla belə, erməni elitasında belə bir gözlənti var idi ki, ermənipərəst Cozef Baydenin prezident olmasından sonra geosiyasi vəziyyət hansısa formada onların xeyrinə dəyişəcək. Buna səbəb o idi ki, Bayden senator olduğu dövrdə erməni lobbisinin maraqlarından çıxış edərək müəyyən addımlar atıb. Üstəlik, Baydenin komandasında bir vaxtlar erməni lobbisi ilə xüsusi yaxınlığı olan şəxslərin təmsil olunması onları şirnikləndirdi. Ancaq zaman keçdikcə bunların heç biri özünü doğrultmadı. Bəlli oldu ki, ABŞ-ın dövlət maraqları erməni lobbisindən öndə gəlir. Baydenin qondarma “erməni soyqırımı”nı tanıması sözdən o tərəfə keçmədi. Konqresin bəzi bədnam qərarları da nəyisə dəyişmədi. Digər tərəfdən, Rusiyanın Ukraynaya hücumu və ondan sonra yaranan vəziyyət Ermənistanın ATƏT-in Minsk Qrupuna olan ümidlərini alt-üst etdi. Ən nəhayət, Avropa İttifaqının vasitəçilik fəaliyyəti və sülh sazişi imzalanarsa maliyyə tranşı ayıracağı ilə bağlı verdiyi vədlər erməni rəsmilərini düşünməyə məcbur edir. Bu o deməkdir ki, sülh sazişi nə qədər tez imzalansa, bu bir o qədər Ermənistanın iqtisadi iflasdan çıxmasına yardım edəcək. Ötən iki ildə Ermənistan gərəkən addımları atsaydı, bu onların xeyrinə olardı. Revanşistlərin küçədə uğur qazana bilməmələri onu göstərir ki, cəmiyyət onları dəstəkləmir. Ancaq Paşinyan vaxtdan düzgün istifadə etməsə və bəzi konkret praktiki addımlar atmasa, vəziyyət bir müddət sonra onun əleyhinə işləyəcək. Görünür, bunun fərqində olan onun komanda üzvləri belə mesajlar verirlər”.
Bir sözlə, partiya funksioneri hesab edir ki, Ermənistan hakimiyyəti daha ciddi kompromis addımlar atmalıdır.
Vidadi ORDAHALLI
