“Azərbaycan Respublikası öz Silahlı Qüvvələrinin döyüş qabiliyyətinin artırılmasına və maddi-texniki bazasının gücləndirilməsinə daim xüsusi önəm verir. Ölkəmiz hərbi-texniki sahədə dünyanın qabaqcıl dövlətləri ilə əməkdaşlığını inkişaf etdirməklə yanaşı, milli müdafiə sənayesi sahəsində də imkanlarını genişləndirir.
Hazırda Azərbaycan aviasiya, naviqasiya, cihazqayırma və digər istiqamətlər üzrə dünyanın 50-dən çox ölkəsinin aparıcı şirkətləri ilə sıx əməkdaşlıq edir, ölkəmizin müdafiə sənayesi müəssisələrində istehsal olunan məmulatların həcmi ildən-ilə artır. Biz qarşıdan gələn dövrdə də müasir silah, hərbi texnika, döyüş sursatı, arxa xidmət əmlakı və digər maddi vasitələrin istehsalına xüsusi diqqət yetirməklə Azərbaycan Silahlı Qüvvələrini və ölkəmizin müdafiə qabiliyyətini daha da gücləndirəcəyik”. Bu fikirlər Prezident İlham Əliyevin “ADEX-2022” 4-cü Azərbaycan Beynəlxalq Müdafiə Sərgisinin iştirakçılarına ünvanladığı müraciətdə yer alıb.
Dövlət başçısının bu fikirlərindən bir daha görünür ki, Azərbaycan qarşıdakı dövr ərzində ordusunu daha da gücləndirməyə, onu müasir silahlarla təmin etməyə hazırdır. Elə bu da Ermənistanda ciddi narahatlıq yaradıb. Məsələ ilə bağlı “armenianreport” portalı yazır: “Azərbaycanla çoxları hərbi əməkdaşlığa hazırdır, Ermənistanın maraqları isə heç kəsi, hətta müttəfiqlərini belə maraqlandırmır. Bütün dünya Rusiya ilə Ukrayna arasında davam edən hərbi qarşıdurmanı seyr edərkən bizim regionda da mühüm hadisələr baş verir ki, bu da dünya ictimaiyyətinin diqqətinə çatdırılmalıdır. Azərbaycan yenə ordusunu yeni silahlarla gücləndirir. “ADEX-2022” Dördüncü Azərbaycan Beynəlxalq Müdafiə və 13-cü Beynəlxalq Daxili təhlükəsizlik, Mühafizə və Xilasetmə “Securex Caspian” sərgisi bunu bir daha təsdiqlədi. Artıq məlum olub ki, Azərbaycan Türkiyə və İsraillə yeni silahların alınması ilə bağlı müqavilələr imzalayacaq. Bunu müdafiə sənayesi naziri Mədət Quliyev deyib. Onun sözlərinə görə, Azərbaycan həm Türkiyə, həm də İsrail şirkətləri ilə əməkdaşlığı davam etdirir: “Türkiyə ilə birgə elə silahlar üzərində işləyirik ki, 10-15 il sonra üçün nəzərdə tutulub. Yəni biz gələcəyə baxırıq. Hətta 20 il qabağa baxırıq. Bu, dövlət başçısının tapşırığıdır”. Azərbaycan bu silahları kimə qarşı istifadə edəcək? Cavab bəllidir - əsas düşməni olaraq gördüyü Ermənistana qarşı. Azərbaycan prezidenti İlham Əliyevin “Dəmir yumruq”la bağlı mütəmadi təhdid dolu bəyanatlarını necə xatırlamamaq olar?! Bəli, İtaliyada və digər Avropa ölkələrində məmnuniyyətlə qarşılanan qonşu dövlətin başçısı reallıqda istədiyinə nail olmaq üçün güc üsullarından da istifadə edir. İndi biz artıq eşidirik ki, Azərbaycan və Türkiyə müdafiə sənayesində birgə istehsal yaratmağı planlaşdırır. Azərbaycan naziri Mədət Quliyev bu xüsusda bildirib: “Türkiyədə müdafiə sənayesi çox sürətlə inkişaf edir, bu gün ölkədə silah istehsalı ilə məşğul olan 1500-ə yaxın şirkət var. Türkiyənin 7 şirkəti müdafiə sənayesi üzrə dünyanın TOP-100 istehsalçısı sırasına daxil edilib”.
Türkiyə ilə Azərbaycanın bu birgə hərbi istehsalının nə qədər həcmli ola biləcəyini başa düşürsünüzmü?! Maraqlıdır ki, bu baxımdan biz Ermənistan rəhbərliyindən gözlənilən əks bəyanatları eşitməmişik. Bundan daha çox, rəsmi İrəvan Azərbaycanla sülhə hazırlaşır. Paşinyan artıq sülh bəyanatının imzalanmasının şərtlərini açıqlayıb. Ölkəmizin rəhbərliyinin planları hamıya və hər kəsə aydındır. Bu, Bakı və Ankaranın istəyi fonunda kapitulyasiya adlanır. Bakı və Ankara öz niyyətlərini açıq şəkildə nümayiş etdirirlər, güclü və əsaslı hərbi əməkdaşlığı inkişaf etdirirlər. İsrailin də bu işdə Azərbaycana kömək etməsi adi haldır. Yəhudi dövləti uzun müddətdir ki, Azərbaycanla əməkdaşlıq edir. İsrailin motivləri sadə və başadüşüləndir, o, Azərbaycanı müttəfiq kimi görür. Ancaq burada bizi başqa bir şey maraqlandırır. Həmin Mədət Quliyev bildirib ki, Azərbaycanla Rusiya arasında hərbi-texniki əməkdaşlıq bir çox sahələrdə inkişaf edir. Bakı silah tədarükü ilə bağlı mütəmadi olaraq Moskvaya müraciət edir. Bunu necə başa düşmək olar? Axı Rusiya indi Ukrayna çöllərində öz hərbi potensialını aktiv şəkildə israf edir! Amma gördüyümüz kimi, müharibə müharibədir və Azərbaycana silah satışı qrafikə uyğun gedir. Bu da bizim “strateji müttəfiqimizin” mövqeyi! O, bütün istiqamətlərdə Ermənistana xəyanət kursunu davam etdirir. Ancaq bununla təkcə Rusiya məşğul deyil. Məlum olur ki, Azərbaycanın müdafiə naziri Zakir Həsənov Belarusun Dövlət Hərbi-Sənaye Komitəsinin sədri Dmitri Pantusla görüşüb. Minskin bu elçisi “ADEX 2022” beynəlxalq müdafiə sərgisində iştirak etmək üçün xüsusi olaraq Bakıya gəlib. Və tamamilə məntiqlidir ki, tərəflər hərbi və hərbi-texniki əməkdaşlığın inkişaf perspektivlərini müzakirə ediblər. Belarusun Azərbaycana nə təklif edə biləcəyi ayrıca müzakirə mövzusudur. KTMT-yə üzv olan iki dövlətin Ermənistana xəyanət etməsi faktı önəmlidir. Onlar açıq-aşkar Azərbaycanı aktiv şəkildə silahlandırırlar. Qərb isə yenə susur. İsrail və Rusiya silahları ilə silahlanmış Türkiyə-Azərbaycan tandeminin güclənməsini görmək istəmir. Bunlar Ermənistanın düşdüyü vəziyyətin mürəkkəbliyini göstərir. Və baş verənlərdə daha çox günahkar olan birini axtarmaq Ermənistan üçün onsuz da faydasızdır”.
Erməni mediasında yer alan bu fikirlər Azərbaycanın silahlanmasından qarşı tərəfin nə dərəcədə narahat olduğunu açıq göstərir.
Samirə SƏFƏROVA
