İrəvanın tarixi mərkəzində hələ ki, mövcudluğunu birtəhər qoruyub saxlayan qədim Təpəbaşı məhəlləsinin xilas edilməsi bizim üçün əsas pioritetlərdən biridir. Ölkəmizin bir qrup alim, ziyalı, elm xadimininin UNESCO-nun baş direktoru Odri Azuleyə müraciətinə hələ də reaksiya gəlməyib.
Təpəbaşı məhəlləsinin Ermənistan dövlətinin qərarı ilə uçurulub-dağıdılması prosesinin növbəti mərhələsi başlayır və ermənilər açıq şəkildə Təpəbaşını dağıdacaqlarını göstərirlər. Azərbaycan xalqının tarixi irsi olan Təpəbaşı məhəlləsinin qalan hissəsinin erməni vandalizmindən, saxtakarlığından qurtulması hava-su kimi lazımdır. Azərbaycan tərəfi bu barədə UNESCO-nun baş direktoruna müraciət edən kimi, Ermənistanın saxtakar alimləri, QHT nümayəndələri anti-Azərbaycan hərəkətinə keçdi. Buna baxmayaraq, onların təqdim etdikləri məlumatlar heç nəyə yaramadı, çünki saxta məlumat saxta pul kimidir, onunla heç bir görmək olmaz.
Azərbaycan tərəfi UNESCO-nun hərəkətsizliyini görüb onu hərəkətə gətirmək üçün yeni kampaniyaya başlayıb. Belə ki, UNESCO-nun Baş direktoru Odri Azuleyə Ermənistanın paytaxtı İrəvanın Təpəbaşı məhəlləsində Azərbaycan xalqının mədəni irsinin məhv edilməsinin qarşısını almaqla bağlı çağırış edilib.
Müvafiq petisiya change.org saytında yerləşdirilib.
Petisiyaya nə qədər adam qoşulub, nə vaxtdan başlanıb? Gözləntilər nədir? Bu petisiya ilə UNESCO-nu hərəkətə gətirə bilərikmi?
“Müraciət mənim tərəfimdən 5 gün öncə change.org platformasında yerləşdirilib”
Bununla bağlı Azərbaycan Milli Elmlər Akademiyasının (AMEA) Tarix İnstitutunun baş mütəxəssisi, “İrəvan şəhərində Azərbaycan milli-mədəni, tarixi irsinin sonuncu qalığı Təpəbaşı məhəlləsinin taleyi: Ermənistanda Azərbaycan xalqının irsinin dağıdılması və tarixi izlərin silinməsi” üzrə araşdırmanın müəllifi Səbuhi Hüseynov bunları bildirdi: “İrəvan şəhərində Təpəbaşı məhəlləsi Azərbaycan xalqının maddi mədəniyyət irsinin böyük nümunələrini özündə saxlayır. Məhəllə bilirsiniz ki, bir zamanlar mövcud olmuş Təpəbaşı hissəsinin bir neçə məhəllə və küçələrindən qalan yeganə yerdir. İrəvanın digər hissələri və onlarda mövcud olmuş məhəllələri ermənilər tərəfindən məqsədli şəkildə tamamilə yerlə yeksan edilib. Azərbaycan xalqına məxsus olan qalan digər maddi-mədəni irs nümunələri yalnız və yalnız Təpəbaşı məhəlləsində və bir vaxtlar eyni adlı hissədə azərbaycanlıların cümə məscidi olan Göy məscid abidəsidir”.
Bilirsiniz ki, bir neçə müddət öncə biz Təpəbaşı məhəlləsi ilə bağlı araşdırmamızı təqdim etdik. Araşdırma nəticəsində məlum oldu ki, İrəvan şəhərində hələ də Azərbaycan xalqının böyük maddi irs nümunələri qalmaqdadır. Bu işi sübutları ilə cəmiyyətə və beynəlxalq ictimaiyyətə təqdim etdik.
Ermənilər tərəfindən Azərbaycanlı şəhərinin bir erməni şəhərinə çevrilməsi prosesi olduqca uzun bir proses olmuş və bu gün artıq son abidələrimizin vandalcasına məhvi prosesi getməkdədir.
Ermənistan dövləti bu prosesi təpəbaşının məhvi ilə sona çatdırmaq istəyirlər.
Bu üzdən yadınızdadırsa, biz UNESCO-nun baş direktoru Odre Azulaya da Azərbaycanın elm və ictimai xadimləri ilə birgə müraciət etdik.
Bu müddətdə, istər mətbuatda və istərsə də sosial şəbəkələrdə Azərbaycan ictimaiyyətinin böyük narahatlığını da gördük. UNESCO-nun Baş direktoruna ünvanlanan indiki petisiyamız azərbaycan ictimaiyyətinin narahatlığını özündə əks etdirir. Biz müraciət ünvanlayaraq bəşəri dəyəri olan bu Azərbaycan memarlığı və mədəni irsinin xilas edilməsi və dağıdılmasına son qoyulmasında Ermənistan Respublikasına təsir etmək və bu unikal abidənin xüsusi mühafizəyə götürülməsini istəyirik. Bu məsələyə, birbaşa UNESCO-nun özünün münasibət bildirməsini istəyirik. Bütün Avropada bu proseslər belə gedir. Əgər cəmiyyət narahatdırsa öz etirazını və müraciətini bir yerdə edir. Biz də belə etmişik. Biz abidələrimizə toxunulmamasını istəyirik. İzimizin itirilməməsini istəyirik.
Müraciət mənim tərəfimdən 5 gün öncə change.org platformasında yerləşdirilib. Hazırda 1777 nəfər bu müraciətə imza atıb”.
S.Hüseynov “Bakı-Xəbər” vasitəsilə istər Azərbaycanda və istərsə də ondan kənarda yaşayan hər bir azərbaycanlını bu petisiyaya qoşulmağa dəvət etdi. “Bu müraciət birbaşa UNESCO-nun baş direktoru Odre Azulaya ünvanlanıb.
İnanın ki, hər bir imzanın çox böyük önəmi var. Odur ki fəal olaq. Cəmiyyətimizin narahatlığını beynəlxalq təşkilata, UNESCO-ya çatdıraq. Səsimiz eşidilsin. Petisiyaya qoşulmaq istəyənlər aşağıdakı linkdən müraciət edərək öz imzalarını qeydiyyatdan keçirə bilər. Lakin qeydiyyatdan sonra mailinizə gələcək təsdiq məktubunu da təsdiqləməlisiniz ki, imza qeydə alınsın.
https://www.change.org/SaveTapabashi”-deyə S.Hüseynov bildirdi.
İradə SARIYEVA
