Ermənistan mətbuatı baş nazir Nikol Paşinyanın hakim “Vətəndaş müqaviləsi” partiyasının deputatları ilə keçirdiyi qapalı görüş barədə yeni məlumatlar yayıb. Bildirilir ki, Dilican şəhərində keçirilən qapalı görüşdən dərhal sonra hakimiyyətin təsiri altında olan KİV-lər Azərbaycanla “sülh müqaviləsi”nin imzalanması məsələsinin aktuallığını gündəm ediblər.
Paşinyan qapalı görüşdə deputatlara deyib ki, avqustun 31-də Azərbaycan lideri İlham Əliyevlə danışıqların əsas konstruktiv epizodu və ya nailiyyəti onların sülh müqaviləsi ilə bağlı ilkin razılığa gəlmələri olub. Paşinyan deyib ki, Avropa İttifaqı Şurasının prezidenti Şarl Mişelin iştirakı ilə keçirilən son görüşdə danışıqlar nəticəsiz qalmayıb. Baş nazirin sözlərinə görə, rəsmi Bakı üçün Ermənistanın Qarabağdan imtina etməsi prinsipial məsələdir:
“Brüsseldə Əliyev “Artsax məsələsi”nin həll edildiyi, tərəflərin bir-birinin ərazi bütövlüyünü tanımalı olduğu və “Artsax erməniləri”nin Azərbaycan daxilində milli azlıq statusunu davam etdirməli olduğunda təkid edib”.
Paşinyan deyib ki, Ermənistan Qarabağ ermənilərinin öz müqəddəratını təyinetmə hüququnu qorumalıdır, amma indiki şərtlər daxilində müstəqillikdən danışmaq real deyil, lakin şərtlərə uyğun olaraq hansısa status müəyyən edilməlidir. O həmçinin əlavə edib ki, Qarabağla bağlı istənilən variant İlham Əliyev üçün qəti şəkildə qəbuledilməzdir.
Paşinyanın bu etiraflarından hansı nəticələri çıxarmaq olar?
Politoloq Əhəd Məmmədli “Bakı-Xəbər”ə açıqlamasında bildirdi ki, əslində Paşinyan bütün reallıqları qəbul edib: “Sadəcə, sona qədər mübarizə apardığına dair görüntü yaratmağa çalışır. Bilirsinizmi, bu mənə hansı dönəmi xatırladır? 1918-20-ci illərdə ruslar Azərbaycanı və Ermənistanı işğal edəndən sonra ortaya belə bir sual çıxdı: Qarabağ kimdə qalacaq? Həmin vaxt ermənilər Qarabağda yalnız muxtar vilayət statusunu əldə etməyə nail olublar. Sonrakı dönəmlərdə isə həmin muxtar vilayətin üzərində separatçılıqlarını davam etdiriblər. Paşinyan eynən bu yolu gedir. Çalışdığı budur ki, nə adla olursa-olsun, oradakı ermənilərə status əldə etsin, sonra yenidən separatçılıqlarını davam etdirsinlər. Azərbaycan qətiyyən güzəştə getməyəcək. Bununla bağlı dəfələrlə rəsmi mövqeyimiz ifadə olunub. Prezident səviyyəsində belə bəyan olunub ki, oradakı ermənilərə heç bir status verilməyəcək. Azərbaycan unitar ölkədir, heç bir milli azlıq, o cümlədən ermənilərə status verilə bilməz. Bunun gələcəkdə böyük fəsadları ola bilər. Azərbaycan Prezidenti də dəfələrlə qeyd edib ki, biz sülhə hazırıq. Bu istəyimizlə əlaqədar beş prinsip irəli sürmüşük və həmin o beş şərti də Ermənistan qəbul edib. Amma təəssüflər olsun ki, həmişə Brüssel görüşlərindən sonra Ermənistan prosesi uzatmağa çalışır. Lakin tərəflər bu dəfə bir ay müddətində işçi qrupun yaradılması və həmin işçi qrupun sülh müqaviləsinin mətninin hazırlanması üzərində fəaliyyətə başlaması barədə razılığa gəliblər. Ermənistan baş naziri Paşinyan da hökumətin iclasını keçirib və qeyd edib ki, o Azərbaycanla sülh müqaviləsinin bağlanmasını istəyir. Başqa müzakirələr daxili ictimai rəyi sakitləşdirmək üçündür”.
Məhəmmədəli QƏRİBLİ
