“ADEX-2022” Vətən müharibəsində qazanılmış parlaq qələbədən sonra Azərbaycanın təşkil etdiyi ilk beynəlxalq müdafiə sərgisidir. Tədbirdə real döyüş əməliyyatları zamanı uğurla sınaqdan çıxmış yerli hərbi təyinatlı məhsulların nümayiş etdirilməsi onun əhəmiyyətini daha da artırır”.
Bu, Prezident İlham Əliyevin Dördüncü Azərbaycan Beynəlxalq Müdafiə Sərgisinin iştirakçılarına müraciətində öz əksini tapıb.
Ölkə başçısının sözlərinə görə, XXI əsrin müharibəsini aparmış Azərbaycan Silahlı Qüvvələrinin döyüş təcrübəsi bu gün inkişaf etmiş ölkələrin hərbi mərkəzlərində diqqətlə öyrənilir: “Son dərəcə çətin relyef şəraitində ən müasir döyüş silahlarını tətbiq etməklə Azərbaycan Silahlı Qüvvələri düşmənin möhkəmləndirilmiş müdafiə xətlərini yarmış və sürətlə irəliləyərək cəmi 44 gün ərzində onu təslim olmağa məcbur etmişdir. Azərbaycanın tarixi qələbəsi göstərdi ki, hərbi sahədə qarşıya qoyulmuş məqsədlərə nail olmaq üçün müasir ordu quruculuğu, ölkənin hərbi qüdrətinin yüksəldilməsi istiqamətində ardıcıl və məqsədyönlü tədbirlərin həyata keçirilməsi son dərəcədə əhəmiyyətlidir”.
Ümumilikdə, Vətən müharibəsindən sonra ilk Müdafiə Sərgisinin keçirilməsinin əhəmiyyəti nədən ibarətdir? Azərbaycanın 44 günlük müharibədə qələbəsindən sonra bunun ilk dəfə keçirilməsi nə kimi mesajlara malikdir? Belə geniş tərkibdə dünya dövlətlərinin iştirakının səbəbi nədir?
“Azərbaycan silahları praktiki döyüşlərdə tətbiq etdiyi üçün dünya bizim təcrübəmizə önəm verir”
Məsələyə münasibət bildirən hərbi ekspert İbrahim Rüstəmlinin fikrincə, Vətən müharibəsindən sonra belə bir sərginin keçirilməsi Azərbaycan üçün çoxşaxəli əhəmiyyət kəsb edir: “Azərbaycan müharibəyə qədər çoxsaylı beynəlxalq silah sərgilərində iştirak edirdi. Sözügedən sərgilərdə nümayiş olunan ən yaxşı silahları, produktiv hərbi sənaye məhsullarını əldə edərək ordunun silahlanmasına yönəldirdi. Nəzərə almaq lazımdır ki, hərbi sərgilər ordunun inkişafında müstəsna rol oynayır. Çünki sərgilərdə dünya hərbi sənaye məhsullarının ən yaxşı nümunələri nümayiş olunur. Bu da, təbii ki, hərbi sənayedə rəqabət mühiti yaradır. Bunun sayəsində ən yaxşı silahları seçmək mümkün olur. Eyni zamanda bu, ordunun dünya ordularına inteqrasiyası deməkdir. Silahların taktiki, texniki göstəricilərinin öyrənilməsi, kadrların hazırlanması baxımından mühüm əhəmiyyət kəsb edir. Yəni bütün bunlar təcrübə mübadiləsini zəruri hala gətirir. Təlimlər, silah sərgiləri ordunun inkişafı üçün müstəsna əhəmiyyət kəsb edir. Budəfəki sərginin xüsusi özəlliyi ondadır ki, Vətən müharibəsində qələbədən sonra keçirilir. Çünki əksər dünya ölkələri Azərbaycanın Vətən müharibəsindəki uğurlu hərbi strategiyasını öyrənir. Müharibədə tətbiq olunan silahlara, xüsusən də PUA-lara maraq göstərilir. Elə silahlar var ki, onlara elə də ehtiyac olmadığı ortaya çıxdı. Bu və digər məsələlər üzündən “ADEX-2022” 4-cü Azərbaycan Beynəlxalq Müdafiə Sərgisində iştirak edən dövlətlərin, şirkətlərin sayı çoxdur. Dünyada ən aparıcı silah və müdafiə sənayesi şirkətləri öz məhsullarını Azərbaycanda nümayiş etdirir. Azərbaycan silahları praktiki döyüşlərdə tətbiq etdiyi üçün dünya bizim təcrübəmizə önəm verir. Bax, ən mühüm mesajlardan biri də budur”.
Hərbi ekspert onu da əlavə etdi ki, “ADEX-2022” sərgisi həm də postmüharibə dövründə Azərbaycanın hərb sahəsində qazanacağı növbətu uğurların başlanğıcıdır.
Vidadi ORDAHALLI
