Kabildə Rusiya səfirliyinin qarşısında baş verən partlayışda azı 10 nəfər ölüb, 8 nəfər yaralanıb. Bu barədə Rusiya XİN məlumat yayıb:
“5 sentyabr saat 10:50-də (yerli vaxtla) Rusiyanın Kabildəki səfirliyinin konsulluq bölməsinin girişinin yaxınlığında naməlum silahlı partlayıcını işə salıb. Hücum nəticəsində dipmissiyanın iki əməkdaşı ölüb, əfqan vətəndaşlar arasında da zərərçəkənlər var. Səfirlik təhqiqat aparan Əfqanıstan təhlükəsizlik xidmətləri ilə sıx əlaqə saxlayır”.
Kremlin mətbuat xidmətinin rəhbəri Dmitri Peskov hadisəni terror aktı adlandırıb:
“Söhbət terror aktından gedir. Hazırda əsas məsələ rus diplomatlarla nə baş verdiyi haqda məlumat almaqdır. Hazırda məlumatlar dəqiqləşdirilir”.
Qeyd edək ki, bundan öncə kamikadzenin Rusiya səfirliyi önündə partlayış törətdiyi, nəticədə 20 nəfərə yaxın şəxsin öldüyü bildirilmişdi.
İŞİD terror qruplaşması Kabildə Rusiya səfirliyi qarşısında terakta görə məsuliyyəti öz üzərinə götürüb.
İŞİD niyə Rusiyaya yönəlik terror aktı həyata keçirsin? Bu İŞİD-in öz işi ola bilər, yoxsa Risiyaya qarşı olan hansısa qüvvələrin sifarişi? Niyə terrorun məkanı kimi məhz Əfqanıstandakı səfirlik seçilib?
Politoloq Qabil Hüseynli “Bakı-Xəbər”ə açıqlamasında bildirdi ki, bu, Kabildəki Rusiya səfirliyinin qarşısında baş verən ilk partlayış deyil: “Əsas hədəf kimi Rusiya səfirliyi seçilsə də, əsasən mülki əhali ziyan çəkib. Birinci dəfə olan terrorda səfirliyin əməkdaşları yox idi. Amma ikinci terrorda Rusiya səfirliyinin iki əməkdaşı ölüb və binaya ciddi ziyan dəyib. Məncə, bu təsadüf deyil. Terror aktını İŞİDİ-in törətdiyi tam dəqiqləşməyib. Düzdür, onlar bunu öz üzərinə götürüb. Ancaq çox vaxt İŞİD etmədiyi terroru da özünün etdiyi ilə bağlı bəyanat verir. Hazırda dünyanın yarıdan çoxu Rusiya ilə düşməndir. Ukraynadakı müharibədən sonra Rusiyaya qarşı nifrət daha da güclənib. İstənilən halda, bu terror anti-Rusiya xarakteri daşıyır və Moskvaya nifrəti açıq şəkildə nümayiş etdirir. Əfqanıstanın seçilməsi də təsadüf deyil. SSRİ-nin Əfqanıstana basqını və orada apardığı 10 illik müharibə əfqan xalqına böyük zərbə vurub və onların yaddaşlarından silinməyib. Əfqanlar SSRİ-nin timsalında Rusiyanı görürlər. Mənim zənnimcə bu, həm də bir qisas əməliyyatı kimi dəyərləndirilə bilər. Rusiya bunlardan nəticə çıxarıb, öz siyasətində bir qədər humanizmi gücləndirməlidir. Dünyaya güclə meydan oxumağın sonu belə hadisələrlə nəticələnir”.
Məhəmmədəli QƏRİBLİ
