Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi vəzifəsini icra edən general-mayor Bəkir Orucovun ittiham olunduğu maddələr məlum olub.
Baş Prokurorluğun mətbuat xidmətindən məlumat verilib ki, cinayət işinin istintaqı zamanı ayrı-ayrı hərbi qulluqçulara işgəncə verməsi, onları qanunsuz azadlıqdan məhrum etməsi və digər cinayət əməlləri ilə bağlı əsaslı şübhələr müəyyən edilən Bəkir Şirin oğlu Orucov və Ramil Bəşir oğlu Əhmədov Cinayət Məcəlləsinin 126.3 (ehtiyatsızlıqdan zərərçəkmiş şəxsin ölümünə səbəb olan qəsdən sağlamlığa ağır zərər vurma), 145.3 (qanunsuz azadlıqdan məhrum etmə), 293.3 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma) və 341.2.3-cü maddələri ilə təqsirləndirilən şəxs qismində cəlb edilərək barələrində məhkəmənin qərarları ilə 4 aylıq həbs-qətimkan tədbiri seçilib.
Qeyd edək ki, general-mayor Bəkir Orucovun “Tərtər işi” ilə bağlı şübhəli şəxs olduğu iddia olunur. Bəkir Orucov ötən ilin sentyabr ayının 27-də Cəmşid Naxçıvanski adına Hərbi Liseyin rəisi vəzifəsindən azad edilib, Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi təyin edilib. O, hərbi liseyin rəisi olarkən, orada rüşvət faktları ilə bağlı narazılıqlar olub və bu barədə mediada məlumatlar dərc edilib.
Xatırladaq ki, “Tərtər işi” ilə bağlı yenilənən cinayət işinin istintaqı zamanı ayrı-ayrı hərbi qulluqçulara işgəncə verilməsi, onları qanunsuz azadlıqdan məhrum etməsi və vəzifə səlahiyyətlərini aşmasına əsaslı şübhələr müəyyən edilən Niftəliyev Rəşid Ağaşərif oğlu, Mikayılov Ruslan Məhəmmədəli oğlu, Maşıyev Sənan Səxavət oğlu, Qəhrəmanov Cabir Babaxan oğlu, Əzizov Polad Seyfəddin oğlu, Əliyev Elçin Kalam oğlu və Məmmədov İntiqam Şərif oğlu Cinayət Məcəlləsinin 145.3 (qanunsuz azadlıqdan məhrum etmə), 293.2 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma), 341.2.3 və 128-ci (qəsdən sağlamlığa yüngül zərər vurma) maddələri ilə təqsirləndirilən şəxs qismində cəlb edilərək barələrində həbs-qətimkan tədbiri seçilib.
Uzun müddətdir Azərbaycanın ictimaiyyətində bu işlə bağlı müzakirə aparılır. Qeyd edilir ki, bu işdə Müdafiə Nazirliyinin sabiq Qərargah rəisi Nəcməddin Sadıxovun da əli var. Artıq bu işlə bağlı yüksək rütbəli bir general həbs edilibsə, izlərin həqiqətən də Nəcməddin Sadıxova aparıldığı qənaətinə gəlmək olarmı?
Hərbi ekspert Tərlan Eyvazov “Bakı-Xəbər”ə açıqlamasında bildirdi ki, bu işin adına şərti olaraq “Tərtər işi” deyiblər: “Əslində isə Bəkir Orucovun həbsi “Beyləqan işi” ilə bağlıdır. Qazaxdan tutmuş, Beyləqana qədər belə işlərin üstünün açılması prosesi gedib. Əsas proseslər Beyləqandakı korpusda aparılıb. Bu yöndə olan araşdırmalar daha çox “Tərtər”də həyata keçirildiyi üçün şərti adı belə hallanır. Fərq bundadır ki, Tərtərdəki dindirilmələr digər dövlət qurumlarının iştirakı ilə həyata keçirilirdi. Beyləqanda isə yalnız Müdafiə Nazirliyinin rəhbərliyinin göstərişi ilə onun təhqiqat idarəsi araşdırma aparıb. Nazirliyin göstərişi ilə yerli komandanlıq həmin işdə onlara yardım edib. Aparılan araşdırmalarda şahid və zərərçəkənlər general Bəkir Orucovun dindirilmələrdə iştirak etdiyini bildirirlər. Ona qarşı ifadələr var ki, barəsində həbs qətimkan tədbiri seçilib. Bilirsiniz, generalın həbsi ilə bağlı həm də yüksək iradə olmalıdır. Deməli, belə iradə də var. Bəkir Orucovu qanunlara əməl edən zabit kimi xarakterizə edirlər. Sovet ordusundan qalan, qanunlardan çəkinən və onlara əməl edən bir zabit kimi o bu işləri özbaşına edə bilməz. Təbiidir ki, belə bir əmr ona Müdafiə Nazirliyinin rəhbərliyi tərəfindən verilib. Belə mühüm məsələ ilə bağlı göstərişi isə nazir və ya qərargah rəisi verə bilər. Peşəkar zabit kimi Bəkir Orucov bütün həqiqətləri istintaqda etiraf edəcək. Belə tapşırığı ona Baş Qərargah rəisi və digər idarə rəisləri də verə bilər. Həmin vaxt Bəkir Orucov Beyləqandakı ordu korpusunun qərargah rəisi olub”.
Məhəmmədəli QƏRİBLİ
