“Tərtər işi” ilə bağlı həbs olunan Rahib Məmmədovun kimliyi ilə bağlı bəzi məlumatlar məlum olub. Rahib Məmmədov həbs olunana qədər ədliyyə mayoru rütbəsində hərbi hüquqşünas kimi xidmət edib. O, həmçinin Rahib Bəşər imzası ilə tanınan şairdir. Rahib Məmmədov Azərbaycan Yazıçılar Birliyinin üzvü, “Qızıl qələm” və “Azərbaycan Bayrağı” mükafatları laureatıdır.
Onun “Həyat eşqi”, “Sevgi dünyam”, “Zirvəyə doğru” adlı kitabları nəşr olunub.
Xatırladaq ki, Rahib Məmmədov Cinayət Məcəlləsinin 145.3, 293.2, 341.2.2 və 341.2.3-cü maddələri ilə təqsirləndirilən şəxs qismində cəlb edilməklə barəsində məhkəmə qərarı ilə həbs qətimkan tədbiri seçilib.
Maraqlıdır, bu qədər zəngin yaradıcllıq işləri olan bir şəxsin adı niyə belə qalmaqallı hadisədə hallanır?
Hərbi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Rahib Bəşər kimi tanınan bu adamın ədəbi mühitdə elə bir ciddi reputasiyası yoxdur: “Sadalanan ədəbi mükafatların özünə belə münasibət birmənalı deyil. Onun yaradıcılıq nümünəsinə aid olan bir şeiri oxudum. Bədii cəhətdən, obrazlılıq baxımından çox zəif idi. Ancaq dəxli yoxdur, şeir yazıb, kitab çıxarırsa, deməli yaradıcı adamdır. Bəri başdan deyim ki, “Tərtər işində” çox adam burulğana düşüb. Elə adamlar var ki, əmrə tabe olub, axına qarşı gedə bilməyib. Hesab edirəm ki, bu istiqamətdə araşdırma aparan qurumlar da bəzi detalları nəzərə almalıdır. Həmin prosesdə iştirak edənlərə əmr yuxarıdan verilib. Onlar kimisə dindirəndə, həmin adama erməniyə işləyən adam kimi baxıblar. Hesab edirəm ki, bu adam da həmin axına düşüb. Gözü qızan adamlara qarşı çıxmaq çətin olub. Rahibin adı bu işdə təsadüfən hallana bilməz. Onun bu məsələyə hansısa səviyyədə aidiyyətinin olub-olmadığını istintaq və məhkəmə araşdıracaq. Ancaq günahsız insanlara qarşı hədsiz insafsızlıq göstərənləri də bağışlamaq olmaz. Onların şəxsiyyəti alçaldılıb, qürurları sındırılıb. Bir neçə nəfəri isə döyüb öldürüblər. Çox təəssüf ki, bunu edənlər də öz millətimizin nümayəndələri olub. Hər iki halda biz itiririk. Gözləyək görək, hüquq-mühafizə orqanları nə qiymət verir. Rahib təhqiqatçı olub. Ona görə də məsuliyyət daşıyır. Haqsızlıq görürdüsə, mütləq mənada şikayət erməliydi. Təəssüf ki, belə hala qarşı ortaya xarakter qoya bilməyib. Təbiidir ki, həm də qələm əhli olan şəxs kimi ondan daha çox hummanistik gözləmək olardı. Bilirsiniz ki, bu çox səsli-küylü işdi və ölkə rəhbərliyinin nəzarətindədir. Bu məsələdə günahı olmayanı məsuliyyətə cəlb etməzlər. Başa düşürəm ki, indi bunu demək çox asandır. O vaxt “erməniyə işləyənləri təmizləyirik” şüarı altında bu işləri görürdülər”.
Məhəmmədəli QƏRİBLİ
