Bütün sahələrdə ictimai və dövlət maraqlarının vəhdət təşkil etməsi vacibdir və bu çox müsbət nəticələr doğurur. Heç şübhəsiz ki, dövlətin həyata keçirdiyi siyasət nəticəsində biz ictimai və dövlət maraqlarının müdafiəsinin vətəndaşlar üçün əsas olduğunu müşahidə edirik. Biz hər sahədə bu iki məfhumu qorumasaq, müdafiə etməsək istədiyimiz nəticəni əldə edə bilmərik.
Ekspertlər haqlı olaraq vurğulayırlar ki, Azərbaycanda dövlət və cəmiyyət maraqlarının mükəmməl vəhdəti ümumilli lider Heydər Əliyevin müəllifi olduğu azərbaycançılıq ideologiyasına əsaslanır. Biz Azərbaycançılıq ideologiyasının ictimai və dövlət maraqlarının çuğlaşmasında oynadığı rolu hər zaman görük. Əsasən də xalqımızın dövlətçilik və ictimai maraqların müdafiəsi naminə nümayiş etdirdiyi birlik nümunlərində bunu dərindən müşahidə edirik.
Qeyd etdiyimiz kimi, bütün sahələrdə ictimai və dövlət maraqlarının müdafiəsi əsasdır. Bu baxımdan, azad edilmiş rayonların bərpasında, infrastruktur layihələrinin həyata keçirilməsində, qaçqınların geri qayıdışı məsələsinin reallaşmasında dövlət və ictimai maraqlar vəhdət təşkil edir.
Biz bu vəhdətə necə nail oluruq?
“Müasir İnkişaf” Birliyinin sədri, Yeni Media Qrupun rəhbəri Mübariz Göyüşlü bizimlə söhbətində bildirdi ki, bu keyfiyyət xalq olaraq bizdə hər zaman olub. Milli birlik, ictimai və dövlət maraqlarının müdafiəsi sahəsində hər zaman nümunələr göstərdiyimizi qeyd edən M.Göyüşlü hesab edir ki, məhz torpaqlarımızın işğaldan azad edilməsində də birliyimiz böyük rol oynayıb. O, vurğuladı ki, bu gün xalq olaraq ən böyük arzularımızdan biri azad edilən rayonlarda, kəndlərdə abadlıq, quruculuq, bərpa işlərinin daha sürətlə aparılması, kəndlərimizin, şəhərlərimizin yenidən qurulması, infrastruktur layihələrinin genişlənməsi, insanlarımızın öz evlərinə qaytarılmasınının təmin edilməsidir. “Qeyd edim ki, torpaqlarımızın azad olunması Azərbaycan dövləti və xalqı üçün bir nömrəli məsələ, dövlətçilik maraqları baxımından ən önəmli bir məqam idi. Çünki dövlətimizin suverenliyi və ərazi bütövlüyü pozuldu, bunu bərpa etmək lazım idi. Biz 2 il bundan əvvəl zəfər yürüşünə başladıq və torpaqlarımızı azad edib, ərazi bütövlüyümüzü təmin etdik. Hazırda həmin ərazilərdə dövlət maraqlarımız ən yüksək səviyyədə müdafiə olunur. Bilirsiz ki, hazırda o ərazilər kütləvi olaraq minalardan təmizlənir, yol və digər infrastrukturlar yenidən qurulur. Tarix – mədəniyyət abidələrimizin bərpası həyata keçirilir, yeni yaşayış binaları, təhsil, mədəniyyət, səhiyyə müəssisələrinin tikintisi gerçəkləşdirilir. Eyni zamanda ən mühüm məsələ əhalinin azad edilən ərazilərə qayıdışı ilkin mərhələdə həyata keçirilib. Artıq biz Zəngilanın Ağalı kəndində Böyük Qayıdışın ilk addımlarını atdıq. Bu müdafiəsinin yüsək səviyyədə təmin olunması deməkdir. İctimai maraqlar da çoxluğun maraqlarının təmin olunmasıdır. Biri var fərdi maraqlar, bu vətəndaşların fərdi olaraq maraqlarının təmin olunması və hüquqlarının qorunmasıdır, biri də var ictimai maraqlar, bu da çoxluğun maraqlarının təmin olunmasıdır”.
“Bu prosesdə dövlət qurumları ilə yanaşı...”
İşğaldan azad olunan ərazilərdə hazırda sosial infrastrukturun yenidən qurulması və əhalinin işlə təmin olunması sahəsində də ciddi işlər görüldüyü deyən M.Göyüşlü hesab edir ki, burada görülən hər bir iş bizim maraqlarımızın təmin edilməsidir.
Azərbaycanda ictimai maraqların müdafiəsi istiqamətində də işlər görüldüyünü qeyd edən M.Göyüşlü istər dövlət, istərsə də QHT-ləri, istər media, istərsə də siyasi partiyalar bu sahədə töhfələr verirlər. Azad edilən ərazilərdə həyatın canlanmasının tamamilə ictimai və dövlət maraqları ilə üst-üstə düşdüyünü vurğulayan müsahibimiz vurğuladı ki, qaçqınların bir nəfər kimi geri qayıtması prosesinə xalq olaraq böyük dəstək veririk: “Bu prosesdə dövlət qurumları ilə yanaşı QHT-lər, media və başqa qurumlar da aktiv dəstək nümayiş etdirir. İşğaldan azad edilmiş ərazilərdə görülən işlərin, həyata keçirilən tədbirlərin sürətlə aparılması onu deməyə əsas verir ki, biz tezliklə o ərazilərimizi abad görəcəyik və vətəndaşlarımız öz evlərində şad-xürrəm yaşayacaqlar. Biz xalq olaraq Qarabağda aparılan tikinti-quruculuq, bərpa prosesinə hər tərəfli dəstək oluruq. Bu gün azad rayonların bərpası işində yerli şirkətlərlə yanaşı xarici şirkətlər də çalışır. Ümumiyyətlə, onlar da bu ərazilərimizə ciddi maraq göstərirlər. Çünki Prezident neçə dəfə qeyd edib ki, Qarabağın bərpasına investisiya qoyulması üçün respublikamızda hər cür əlverişli şərait var. Biz bunu hazırda əməldə, işdə görürük. Sirr deyil ki, azad edilən torpaqlarda tikinti-quruculuq işlərinin vüsət alması, genişlənməsi ölkəmizdə böyük iqtisadi canlanma baş verir. Təsəvvür edin ki, bizim üçün nə deməkdir. Bu həm mənəvi məsələdir, həm də arzularımızın gerçəkləşməsi, xalq və dövlət olaraq gücümüzün, iradəmizin ifadəsidir. Azad edilən rayonların bərpasında, infrastruktur layihələrinin həyata keçirilməsində, geri qayıdış məsələsində Azərbaycan dövləti inanılmaz dərəcədə möhtəşəm işlər görür. Bir neçə ay ərzində yolların tikilməsi, hava limanlarının açılışı, ərazlərin böyük hissəsinin minalardan təmizlənməsi, qayıdışın gerçəkləşdirilməsi, həm azad olunan ərazilərdə möhtəşəm tədbirlərin, konfransların, beynəlxalq simpoziumların, festivalların həyata keçirilməsi artıq orada qaynar bir həyatın təmin olunması dövlət və ictimai maraqların ən yüksək səviyyədə müdafiə olunması, qorunması deməkdir”-deyə M.Göyüşlü qeyd etdi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
