Hələ də Ermənistanın Rusiyadakı fövqəladə və səlahiyyətli səfiri Vağarşak Harutyunyanın etimadnaməsini Rusiya prezidenti Vladimir Putinə nə vaxt təqdim edəcəyi məlum deyil. Baxmayaraq ki, 8 ay keçir.
Halbuki, səfir xidmət etdiyi ölkəyə gəldikdən sonrakı günlərdə Xarici İşlər Nazirliyinə gedir və etimadnaməsinin surətini təqdim edir, bundan sonra 1-2 həftə ərzində ölkə rəhbərinə təqdim edir. V.Harutyunyanın Moskvada olmasının 8 ayı tamam oldu. Lakin etimadnamələrin qəbulu tarixi hələ Rusiya tərəfindən müəyyən edilməyib. Erməni mediası yazır ki, adətən ölkə prezidenti dövlət səfərləri zamanı yeni səfirin etimadnaməsini qəbul edə bilər. Artıq son 8 ayda iki belə səfər olub. Apreldə Paşinyanın Moskvaya rəsmi səfəri, iyunda isə Ermənistan prezidentinin Sankt-Peterburqa səfəri və həmin səfərlər zamanı Ermənistan səfiri razılaşmanı çatdıra bilərdi. Ancaq o da yerinə yetirilmədi. Diplomatik dairələrdə belə bir fərziyyə var ki, Rusiya prezidenti Ermənistan baş nazirinə və ya səfirin özünə qarşı “xüsusi” münasibətini məhz belə göstərir ki, Rusiya rəsmi dairələri bundan çox narazıdırlar. Yayılan digər versiyaya görə, Vağarşakın müqaviləsinin qəbulu prosesini xüsusi olaraq ləngidirlər, çünki onun xidmətindən o qədər də razı deyillər və başqa namizəd tapmaq istəyirlər.
Bütün hallarda, Rusiya prezidenti səfirin etimadnaməsini qəbul etməsə də, Ermənistan geri də addım atmır. Bütün bu baş verənləri ekspertlər necə dəyərləndirir?
“Paşinyan hakimiyyətə gələndən sonra faktiki olaraq forpost olduqlarını unutdular”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, bütün bunlar onu göstərir ki, Rusiya ilə Ermənistan hakimiyyəti arasında gərginlik xeyli müddətdir davam edir: “Bu onunla bağlıdır ki, Qərbin dəstəyi ilə Paşinyan hakimiyyətə gəldi və nəticədə Ermənistan Moskvaya arxa çevirdi. Faktiki olaraq Rusiyanın forpostu olduqlarını unutdular. Rusiya da bunlara öz gücünü göstərir və yeri gələndə yerində oturdur. Ən başlıcası isə, Ermənistanı ara-sıra aşağılayır. O üzdən, Ermənistan səfir məsələsində nə qədər təkid etsə də, Rusiya mövqeyindən geri çəkilmir və erməniləri aşağılayır. Bütün bunlar o deməkdir ki, Rusiya Ermənistanı müstəqil dövlət kimi qəbul etmir. Sadəcə, lazım olanda hansısa atributlardan formal şəkildə istifadə edir. Digər hallarda ona öz əlaltısı kimi baxır. Yəni iki ölkə arasında bərabərhüquqlu yanaşma yoxdur. O üzdən, Rusiyanın Ermənistana belə aşağılayıcı yanaşması davam edəcək. Bir sözlə, Ermənistan da Rusiyanın forpostu olmağa məhkumdur. Ona görə də Ermənistan hakimiyyəti doğru-düzgün siyasi addımlar atmalıdır. Türkiyə və Azərbaycanla münasibətləri yoluna qoymalıdır”.
Əks halda partiya sədri hesab edir ki, Ermənistan aşağılayıcı vəziyyətdə qalacaq.
Vidadi ORDAHALLI
