“Biz Avropanın üç ölkəsi ilə, yəni İtaliya, Yunanıstan və Bolqarıstanla müqavilələr imzalamışıq. Avropanın digər ölkələrinin də tələbatı var və biz həmin tələbatı qiymətləndiririk”.
Bunu Prezident İlham Əliyev İtaliyanın “İl Sole 24 Ore” qəzetinə müsahibəsində deyib.
Ölkə başçısının fikrincə, bütün bunlar masanın üzərində bir pazlı xatırladır: “Sizin də qeyd etdiyiniz kimi, digər layihələr də var. Məsələn, Balkan dövlətlərinə qədər uzanan İon-Adriatik kəməri, tezliklə istifadəyə veriləcək Yunanıstan-Bolqarıstan interkonnektoru və digər interkonnektorlar. Ancaq bütün bunlar masanın üzərində bir pazlı xatırladır. Bizim potensial istehlakçılarla fəal dialoq aparmağımız, sərmayədarlarla, maraqlı tərəflərlə həm istehsalat, həm də distribütor işlərində, həmçinin qiymətlə bağlı danışıqlar aparmaq kimi qarşımızda görüləsi çox iş dayanır”.
Maraqlıdır, Avropa dövlətləri həll edilməli olan bu məsələlərə necə yanaşacaq?
“Çünki Avroittifaq böyük dərəcədə enerji resurslarından asılıdır”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, çox güman ki, Avropa dövlətləri bu yöndə işləri sürətləndirməyə səy göstərəcəklər: “Məsələ ondadır ki, Avropa İttifaqı qaz tədarükü mənbələrinin diversifikasiyasını prioritet elan edib. Bütün bunlarda məqsəd birdir - Rusiyadan qaz asılılığını minimuma endirmək. Ona görə də Əlcəzairdən, Azərbaycandan, Yaxın Şərq ölkələrindən qaz idxalının artırılması başlıca hədəflərdən biridir. Azərbaycandan qaz almaq istəyən Avropa ölkələri maksimum çalışmalıdılar ki, bunun üçün müvafiq infrastrukturu tez yaratsınlar. Qazın alışı və satışı ilə məşğul olan şirkətlər işi sürətləndirməlidir. Əsasən də bürokratik prosedurların mümkün qədər tezləşdirilməsi vacib məsələdir. Qiymət məsələsində razılaşmalar olmalıdır və bu, müvafiq müqavilələrlə tənzimlənməlidir. Əlbəttə ki, beynəlxalq bazarda qazın qiyməti nəzərə alınmaq şərti ilə. Özü də biz nəzərə almalıyıq ki, Avropa İttifaqı ölkələri Azərbaycandan təkcə qaz idxal etməyəcək. Qarşıdakı planlardan biri də Azərbaycandan elektrik enerjisinin idxalıdır. O baxımdan hesab edirəm ki, Azərbaycanla Aİ ölkələri arasında çoxşaxəli əlaqələrin yaxın illərdə daha da genişlənməsi qaçılmazdır. Çünki Avroittifaq böyük dərəcədə enerji resurslarından asılıdır. Avropa iqtisadiyyatı böyüdükcə, sözügedən məhsullara olan tələbat daha da artır”.
Bir sözlə, ekspert sözügedən sahədə elə də ciddi problemlərin olmayacağı qənaətindədir.
Vidadi ORDAHALLI
