Məlum olduğu kimi, bir neçə gün əvvəl Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi vəzifəsini icra edən general-mayor Bəkir Orucov hüquq-mühafizə orqanları tərəfindən saxlanılıb.
Qeyd edək ki, general-mayor Bəkir Orucov bundan əvvəl Cəmşid Naxçıvanski adına Hərbi liseyin rəisi olub.
Bir neçə gün ərzində Bəkir Orucovun hansı səbəbdən həbs edilməsi ilə bağlı rəsmi məlumatın verilməməsi müəyyən ehtimalların ortaya çıxmasına rəvac verdi. Həbslə bağlı daha çox iki versiya səslənməyə başladı: korrupsiya və "Tərtər işi". Nəzərə alsaq ki, “Tərtər işi” ilə bağlı istintaq uzun müddətdir davam edir, onda generalın indiki məqamda bu səbəbdən həbs edilməsi sual doğurmaya bilmirdi.
Rəsmi məlumat açıqlanmayana kimi sosial şəbəkələrdə həbslə bağlı çeşidli məlumatlar yayıldı. Əsasən iddia olunurdu ki, Bəkir Orucovun həbsi bir vaxtlar ordu korpuslarından birində qərərgah rəisi işlədiyi dönəmlə birbaşa əlaqəlidir. İddialarda deyilirdi ki, Bəkir Orucovun həmin zaman hərbçilərə verilən işgəncələrdə birbaşa əli olub.
Rəsmi məlumat yayılmamış biz bu həbslə bağlı Hərbi-siyasi ekspert Ramil Məmmədli ilə fikir mübadiləsi apardıq. O, “Bakı-Xəbər” ə açıqlamasında bildirdi ki, Bəkir Orucov orduda intriqa və qruplaşmalardan uzaq zabit olub: “Onun adı korrupsiya qalmaqallarında da hallanmayıb. Orduda bir sıra mühüm postlarda xidmət apardığı dönəmdə vəzifəsinin öhdəsindən gəlməyi bacaran zabit kimi xarakterizə edilib. Ancaq ortada bir generalın həbsi varsa, deməli, söhbət ciddi məqamlardan gedir. Təbiidir ki, rəsmi məlumat verilmədən, ehtimallar üzərində çox dayanmamalıyıq. Məlumatlı bir şəxs kimi mən daha çox “Tərtər” işinin üzərində dayana bilərəm. Çünki həmin dönəmlərdə general hadisələrin baş verdiyi istiqamət üzrə fəaliyyət göstərib”.
Bu gün Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi vəzifəsini icra edən general-mayor Bəkir Orucovun ittiham olunduğu maddələr məlum olub. Bu barədə Baş Prokurorluğun Mətbuat Xidmətindən məlumat verilib. Bildirilib ki, cinayət işinin istintaqı zamanı ayrı-ayrı hərbi qulluqçulara işgəncə verməsi, onları qanunsuz azadlıqdan məhrum etməsi və digər cinayət əməlləri ilə bağlı əsaslı şübhələr müəyyən edilən Orucov Bəkir Şirin oğlu və Əhmədov Ramil Bəşir oğlu Cinayət Məcəlləsinin 126.3 (ehtiyatsızlıqdan zərərçəkmiş şəxsin ölümünə səbəb olan qəsdən sağlamlığa ağır zərər vurma), 145.3 (qanunsuz azadlıqdan məhrum etmə), 293.3 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma) və 341.2.3-cü maddələri ilə təqsirləndirilən şəxs qismində cəlb edilərək barələrində məhkəmənin qərarları ilə həbs qətimkan tədbiri seçilib.
Rısmi məlumat açıqlananda sonra sosial şəbəkələrdə maraqlı versiyalar səslənməyə başlayıb. İddia olunur ki, "Tərtər işi" ilə yanaşı, eyni vaxtda törədilmiş "Beyləqan işi" üzrə bir cinayət mövcuddur. Əslində, "Beyləqan işi" üzrə törədilmiş cinayət "Tərtər işi" ilə eyni hadisədir. Və eyni vaxtda törədilmiş cinayətdir. Əlbəttə, şübhəsizdir ki, "Beyləqan işi" və "Tərtər işi" üzərində cərəyan edən hadisələr bir-biri ilə əlaqə təşkil edir.
Çox maraqlıdır ki, "Beyləqan işi" üzrə törədilmiş cinayət indiyə qədər gizli saxlanılır. Bəkir Orucovun da adı Beyləqanda törədilməş və "Beyləqan işi" üzrə cinayət işində keçir.
Bildirilir ki, həmin vaxt Müdafiə Nazirliyinin 2-ci Ordu Korpusunun zabitlərinin göstərişi ilə “N” saylı hərbi hissənin zabiti Sabirli Adil Tehran oğlu "Vətənə xəyanət"də ittiham olunaraq ağır işgəncələrə məruz qalıb və işgəncələrə tab gətirməyib ölüb. Həmin vaxt Bəkir Orucov II –ci Korpusun qərərgah rəisi vəzifəsində işləyib.
Yəqin ki, bu barədə daha dəqiq bilgilər istintaqın gedişi və məhkəmədə ortaya çıxacaq.
Məhəmmədəli QƏRİBLİ
