“Azərbaycanda bir neçə siyasətçini və qəzeti satın ala bilərsiniz, amma buna əmin olun ki, o diyarın Əli şiələrı alınıb-satıla bilən deyil. Azərbaycanın dəyərli xalqından soruşmaq istəyirəm ki, ölkənizdəki anti-İran kampaniyasının kimin əli ilə idarə olunduğu haqda düşünürsünüz?”
Azərbaycan mətbuatı yazır ki, bunu İranın dini rəhbərinin Ərdəbil əyalətindəki nümayəndəsi və imam cüməsi Seyid Həsən Amili cümə namazının xütbəsində deyib.
“Heç düşünmüsünüz ki, onların bu kampaniyanı aparmaqda məqsədi nədir və heç düşünmüsünüzmü, niyə dünyanın hər bir yerində, Azərbaycandan başqa, yaxşılığın cavabı yaxşılıqla verilir?” – deyə Amili vurğulayıb.
O, Laçının və Qarabağ ətrafındakı bəzi ərazilərin Azərbaycana qaytarılması münasibətilə Azərbaycan xalqını təbrik edərək deyib:“Allahdan arzum budur ki, Azərbaycanın işğal olunmuş bütün əraziləri tez bir zamanda Azərbaycana qaytarılsın”.
Ekspertlər hesab edirlər ki, Amili əslində bu təbrikində belə səmimi deyil və bunu özünü səmimi göstərmək üçün deyib.
Göründüyü kimi, Amili indi də siyasətçilərimizə və mediamıza şər atır, siyasət və media adamlarımızı hədəfə alıb. Nə baş verir, Amilinin məqsədi nədir? Bizim mediamızın və siyasilərimizin fəaliyyəti onu niyə narahat edir?
“...İran hakimiyyəti azad sözdən və azad fikirdən narahatdır”
Orta Doğu Araşdırma Mərkəzinin rəhbəri Sədrəddin Soltan “Bakı-Xəbər”ə bildirdi ki, bu şəxs həmişə Azərbaycana qarşı bu cür çıxışlar edib: “Bu Ərdəbilin imam cüməsi, yaxud İranın Ali rəhbəri Ayətullah Seyid Əli Xamneyinin Ərdəbil əyaləti üzrə nümayəndəsi höccətülislam Seyid Həsən Amilinin Azərbaycan Respublikasına qarşı ilk iftira dolu çıxışı deyil. Özünü din xadimi, nə bilim, regional din lideri sayan bu şəxs həmişə yalan danışır, iftira atır, şər-böhtan deyir. Əvvəllər belə olub. Məsələn, guya Azərbaycanda məscidlər bağlanır, dindarlara “təzyiqlər olunur” tipli çıxışları çox olub. Son zamanlar da yeni üsullara əl atırlar. İranın Azərbaycana yönəlik pozuculuq siyasətinə qarşı çıxışları guya Azərbaycanda İsrail təşkil edir. Bu kökündən yanlışdır. Azərbaycanda mətbuat orqanlarına, ayrı-ayrı ictimai-siyasi xadimlərə qarşı çıxışlar da ilk deyil. Xatirinizdədirsə, Sabir Rüstəmxanlıya qarşı fitva verildi ki, guya onu “edam etmək” lazımdır. Bunların hamısını İranın ali rəhbərləri, ayətullahları, ayrı-ayrı din xadimləri edib. Yaxud rəhmətlik Rafiq Tağı barəsində oxşar fikirlər səsləndirilirdi və sair. Amili də həmin o tipli din xadimlərindən sayılır ki, Azərbaycana qarşı ağzı, dili, fikri heç cür dürüst çıxışlar etmir”.
Bizim bunu 44 günlük müharibə dövründə də gördüyümüzü deyən S.Soltanın sözlərinə görə, Amili müharibədən əvvəl də cümə namazlarından birindəki çıxışında “Azərbaycanda torpaqları azad etmək üçün qeyrətli insanlar yoxdur” deyirdi. “Amma torpaqlarımız azad olunandan sonra Azərbaycana qarşı hədyan çıxışlar etməyə başladılar. O çıxışları edənlərdən biri də Amili idi. Yaxud sonrakı dövrdə İranın indiki ali rəhbəri Seyid Əli Xamneyinin guya torpaqların azad olunması ilə bağlı fitva verməsi barədə Allahşükür Paşazadənin verdiyi yalan informasiyanı Amili də ifadə etdi. Halbuki, Seyid Əli Xamneyi heç bir zaman Qarabağın işğaldan azad olunması ilə bağlı fitva verməyib. Yəni bu Amili Azərbaycana qarşı yalan, saxta, iftira dolu çıxışlar edən və özünü din xadimi sayan İranın siyasi adamlarındandır. Mənə elə gəlir ki, bir çox hallarda onun çıxışlarına əhəmiyyət vermək lazım deyil. Çünki o artıq bu şəkildə danışmağa, bəyanatlar verməyə adət edib. Ona görə də, onun dediklərini Jirinovskinin Azərbaycan barədə dedikləri ilə müqayisə edirəm. Jirinovsi bir neçə gün dalbadal Azərbaycan barədə ağlına gələn iftiraları deyirdi, bir neçə gün sonra Azərbaycanı tərifləməyə başlayırdı, yaxud Azərbaycan liderlərinin yanında başını aşağı salıb müticəsinə durub qulaq asırdı. Amili də Jirinovskiyə oxşar siyasilərdəndir. Odur ki, onun çıxışlarına çox da əhəmiyyət verməyə ehtiyac yoxdur. Bütün hallarda, İran hakimiyyəti azad sözdən və azad fikirdən narahatdır. Azərbaycan mətbuatı İranın regionda göstərdiyi pozuculuq fəaliyyətini dilə gətirməklə onu ölkə və dünya ictimaiyyətinə çatdırır. Azərbaycan mediası bildirir ki, İran işğalçı Ermənistana daim yardım edib və bu gün də o yardımları davam etdirməkdədir. Məsələn, Azərbaycan mediası çatdırır ki, Təbriz universitetdində ermənişünaslıq fakültəsi, şöbəsi açlır. Təbrizdə, Güney Azərbaycanda Azərbaycan türkcəsində bir sinif, bir məktəb olmadığı halda Təbriz Universitetində ermənişünaslıq şöbəsinin açılması Azərbaycan üçün heç də xoşagələn hadisə deyil. Kənardan ilk baxışdan məsələyə baxanda “burada nə var ki” deyib ötmək olar, amma məsələnin kökündə daha dərin mətləblər dayanır. İran hakimiyyəti bununla Azərbaycanı, dünya Azərbaycan türklərini aşağılamağa, onlara özünəməxsus “dərs verməyə” çalışır. Azərbaycan mətbuatı bunu yazıb göstərir ki, Ermənistan və İran Azərbaycana qarşı birlikdə fəaliyyət göstərir. Ayətullah Seyid Əli Xamneyinin Ermənistan-İran münasibətlərini kimsənin poza bilməyəcəyini deməsi, Zəngəzur dəhlizinə qarşı İran rəsmiləri tərəfindən açıq-aşkar çıxışlar göstərir ki, İran heç də Azərbaycana münasibətdə, bir sıra rəsmilərin bəyan etdiyi kimi, xoşməramlı deyil. Azərbaycan mediası da bunu açıb göstərir. Ona görə də İran hakimiyyəti, yaxud Amili kimilər İrandakı rejimin iç üzünü Azərbaycan ictimaiyyətinə göstərən medianı sevmir və onu guya kiminsə tapşırığını “icra edən” orqan kimi təqdim etməyə çalışır. Bu, İranda adətdir. İranın özündə də doğru sözü deyənlər ya ingilis, ya İsrail, ya da Amerika adamı adlandırılır ki, Amili də həmin təbliğatın, həmin şantajın aparıcılarındandır”-deyə S.Soltan vurğuladı.
İradə SARIYEVA
