Qarabağla bağlı bütün məsələlərin Azərbaycanın daxili işi olmasını artıq Ermənistanda da qəbul edirlər. Elə bu səbəbdəndir ki, son illərdə ilk dəfə olaraq Ermənistandan rəsmi nümayəndə heyəti “Qarabağın müstəqilliyinin” elan edilməsi münasibətilə təşkil olunan tədbirlərdə iştirak etmək üçün Xankəndiyə göndərilməyib.
Erməni mediası yazır ki, bu hal Qarabağın sırf Azərbaycanın daxili işi olması ilə bağlı Bakının dediklrinin İrəvan tərəfindən qəbulunun real təzahürüdür. Bu xüsusda “Azatutyun” radiosu yazır: “Ötən il sentyabrın 2-də, Azərbaycanla 44 günlük müharibənin birinci ilində rəsmi İrəvan Qarabağa hökumət nümayəndələrini göndərməkdən yayınsa da, yenə də həmin gün vitse-spiker Ruben Rubinyanın başçılıq etdiyi parlamentin rəsmi nümayəndə heyəti Qarabağda idi. Amma bu il Ermənistan parlamentinin rəsmi nümayəndə heyəti də Qarabağa getməyib. Yalnız Ermənistan parlamentinin hər üç fraksiyası öz nümayəndə heyətini Qarabağa göndərib. Bu da rəsmi səfər deyil”. Gözlənilir ki, gələn il ümumiyyətlə Ermənistandan Qarabağa gələn olmayacaq. “Azatutyun” radiosu Ermənistanın Qarabağa rəsmi səfərlərdən imtina etməsi ilə bağlı hakim “Vətəndaş müqaviləsi” fraksiyasından olan deputat Rüstəm Bakoyana sual ünvanlayıb. Parlamentin nümayəndə heyətinin bu il rəsmi səfərinin olmamasının səbəbləri ilə bağlı suala hökumətyönlü deputat belə cavab verib: “Siz mənə deyil, başqa şəxsə ünvanlanmalı olan sualı verdiniz. Bu sualı parlament spikeri Alen Simonyana verə bilərsiniz”. Radionun cəhdlərinə baxmayaraq, Ermənistan parlamentinin rəhbərliyi Qarabağa rəsmi nümayəndə heyəti göndərməkdən yayınmasının səbəblərini izah etməyib. Amma erməni mediası yazır ki, İrəvan Bakını qəzəbləndirməkdən qorxur və həm də artıq Qarabağı Azərbaycanın daxili məsələsi hesab edir. Bundan başqa, məlumdur ki, Ermənistan Təhlükəsizlik Şurasının katibi Armen Qriqoryan Azərbaycanın razılığı olmadan Qarabağa gəlib. Məsələyə artıq Azərbaycan Xarici İşlər Nazirliyi sərt reaksiya verib. Nazirliyin Mətbuat xidməti idarəsi Ermənistan Təhlükəsizlik Şurası katibinin Azərbaycanın Xankəndi şəhərinə qanunsuz səfərini belə şərh edib: “2 sentyabr 2022-ci il tarixində Ermənistan Təhlükəsizlik Şurasının katibi Armen Qriqoryanın Azərbaycan Respublikasının Xankəndi şəhərinə qanunsuz səfər etməsi Ermənistan tərəfinin növbəti təxribatıdır və iki dövlət arasında münasibətlərin normallaşması cəhdlərinə xələl gətirir. Azərbaycan və Ermənistan liderləri arasında Brüsseldə baş tutan növbəti görüşdən dərhal sonra Ermənistan rəsmisi tərəfindən məqsədyönlü şəkildə atılan bu qanunsuz addım, görüş zamanı əldə edilmiş razılıqlara kölgə salmaqla yanaşı, Ermənistan tərəfinin normallaşma prosesində səmimi olmadığını açıq nümayiş etdirir. Bu qanunsuz səfər, Ermənistanın Azərbaycana qarşı ərazi iddiasının olmadığı, suverenlik və dövlət sərhədləri prinsiplərini qəbul etdiyinə dair bəyanatlarının səmimiyyətdən uzaq olduğunu göstərir. Bu, həmçinin rəsmi İrəvan tərəfindən beynəlxalq vasitəçilərin səylərinə hörmətsizlikdir. Ermənistan rəsmisinin təxribatçı addımını qətiyyətlə qınayır və vurğulayırıq ki, Azərbaycanın beynəlxalq sərhədləri çərçivəsində ərazi bütövlüyünə qarşı atılan hər hansı addımlar cavablandırılacaq”.
Ölkəmizin bu reaksiyasından sonra Armen Qriqoryan Azərbaycandan üzr istəyib. Ermənistanın “168.am” saytının məlumatına görə, Armen Qriqoryan üzrünü Azərbaycana çatdırıb: “Qarabağdakı qurumun “bayramı” münasibətilə Ermənistan Təhlükəsizlik Şurasının katibi Armen Qriqoryan Qarabağa gedib və oradan fotolar dərc edib. Qriqoryan “feysbuk”da foto paylaşaraq yazıb: “Sentyabrın 2-də mən Xankəndidə “qardaşlıq memorial-panteonunu” ziyarət etdim və müharibə zamanı həlak olmuş “qəhrəmanların” abidəsinin podstamenti önünə gül dəstələri qoydum”. Gözlənildiyi kimi, Azərbaycan Xarici İşlər Nazirliyi bu səfərə dərhal reaksiya verib, onu kəskin şəkildə pisləyib. Armen Qriqoryan Azərbaycanın onun səfərinə reaksiyasından o qədər şoka düşüb ki, qapalı kanallar vasitəsilə Qarabağa səfərinə görə Azərbaycan tərəfindən üzr istəməyə tələsib. Armen Qriqoryan izah edib ki, Qarabağ sakinidir və Qarabağa səfəri siyasi deyil, şəxsi məqsədlər üçündür: atasının evini və atasının məzarını ziyarət etmək istəyib. Başqa sözlə, o özünə bəraət qazandırmağa çalışıb: Qarabağa dövlət xadimi kimi yox, adi bir Qarabağ sakini kimi gedib və Xankəndinin “qardaşlıq memorial-panteonunu” ziyarət etməyə bilməzdi. Və əslində, Armen Qriqoryan öz fotosunu sentyabrın 2-də dərc etsə də, “arsaxın müstəqillik gününü” qeyd etməyib. Sadəcə qeyd edib ki, Xankəndi “qardaşlıq memorial panteonunu” ziyarət edib və abidənin podstamenti önünə gül dəstələri qoyub. Bundan əlavə, bu fotoda Armen Qriqoryanı Qarabağın heç bir "rəsmisi"nin müşayiət etmədiyi də görünür”. Burada qeyd edək ki, Qriqoryanın səfəri haqda rəsmi məlumat nə Ermənistan, nə də separatçılar tərəfindən verildi: sadəcə, özü sosial şəbəkədə bir cümlə ilə foto paylaşıb. Hesab olunur ki, əslində, Qriqoryan Qarabağdakı daxili vəziyyəti öyrənmək məqsədilə Xankəndiyə gəlib. Çünki Ermənistan Qarabağdan əlini çəkib, bunu Azərbaycanın daxili işi hesab edir. Qriqoryanın İrəvan üçün asan keçməyən Brüssel görüşündən sonra gəlməsi də xüsusi diqqət çəkir. O, həmin görüşün nəticələrinin Qarabağdakı separatçı rejim tərəfindən də qəbul edilməsini istəyir.
Samirə SƏFƏROVA
