Rusiya Dövlət Dumasının fəaliyyətini işıqlandıran “Duma TV”-də Azərbaycana qarşı təxribat törədilib. Belə ki, “Duma TV”-də Azərbaycana qarşı təxribatçı məzmunlu material yerləşdirilib.
Məsələ ondadır ki, Prezident İlham Əliyevin Rusiya Sülhməramlı Qüvvələrinin müvəqqəti nəzarətində olan Laçın şəhərinin, Sus və Zabux kəndlərinin Azərbaycanın nəzarətinə qaytarılması, Azərbaycan ordusunun Laçında yerləşməsi ilə bağlı bəyanatından sonra Duma TV-də “Dağlıq Qarabağda Azərbaycan ordusu yerləşdirilib” başlıqlı qərəzli material yerləşdirilib. Materialda əvvəldən axıra qədər anti-Azərbaycan mövqe əks olunub. Hərbi tarixçi, politoloq Nikita Buranov Azərbaycanın ünvanına iftira xarakterli fikirlər səsləndirib: “Azərbaycan hər zaman öz məqsədini açıq bəyan edib, heç vaxt Qarabağı zəbt etmək məqsədini gizlətməyib. Təəssüflər olsun son hadisələr göstərir və sübut edir ki, Azərbaycan istisnasız olaraq hərbi yolla buna nail olacaq. Onlar istisnasız olaraq bu məsələnin hərbi yolla həllinə ümid edirlər. Hətta orada yerləşdirilən Rusiya sülhməramlıları da kifayət qədər gücə malik deyillər. Bunun səbəbi onların ağır silahlarının olmamasıdır. Gördüyümüz kimi Azərbaycan tərəfi heç bir güzəştə getməyə hazılaşmır, “DQR” üzərində tam nəzarəti ələ keçirməyə çalışır”.
Bu, hansısa özəl telekanalda, yazılı mediada səslənsəydi, bəlkə də bunu görməzdən gəlmək olardı. Onsuz da Rusiyada bir sıra erməniyönümlü media orqanları davamlı olaraq Azərbaycan əleyhinə fəaliyyət göstərir. Ancaq nəzərə alsaq ki, son qaralama kampaniyası Dövlət Dumasının rəsmi orqanında yer alıb, o zaman bu, bir sıra suallara yol açır. İki ölkə arasında müttəfiqlik sazişi olmasına rəğmən, Rusiya parlamentinin televiziya kanalında Azərbaycan əleyhinə materialın yayımlanması nə deməkdir?
Məsələyə münasibət bildirən media eksperti Azər Həsrətin fikrincə, bütün bunlar bir daha onu göstərir ki, Rusiya dövləti düzələn deyil: “Azərbaycan dövləti nə qədər xoşməramlı davransa da Rusiya yenə də öz bəd əməllərindən əl çəkmir. Dövlət olaraq Azərbaycana qarşı ədəbsizlik edir. Ölkəmizi aşağı görür və dövlətimizə nəzarət etmək istəyir. Ümumiyyətlə, Azərbaycanın müstəqilliyini Rusiya həzm edə bilmir. Ona görə də belə qərəzli materiallara Dövlət Dumasının fəaliyyətini işıqlandıran “Duma TV”-də yer verilir. Hətta heç vaxt keçmiş Dağlıq Qarabağa aid olmamış Laçında ordumuzun yerləşməsini belə həzm edə bilmirlər. Bu, o deməkdir ki, Rusiyada müəyyən dairələr hələ də köhnə havanı çalırlar. Ona görə də Azərbaycan dövləti özünün strateji hədəfləri çərçivəsində mümkün qədər Rusiyadan uzaqlaşma xətti götürməlidir. Yəni, biz qonşu olsaq da Rusiya ilə istənilən səviyyədə əlaqələrimizi ehtiyatlı bir həddə qədər endirməliyik. O dövlətdən nəsə ədalət, haqlı davranış, məsələlərə obyektiv yanaşma gözləmək sadəlövhlükdür. Bu, bir daha onu göstərir ki, Rusiya bizə heç vaxt dost olmayıb və olan da deyil. Rusiya dövləti Azərbaycana Ermənistan kimi öz əlaltısı kimi baxmaq istəyir. Ancaq Azərbaycan özünə hörmət edən, ləyaqətini qoruyan, öz müstəqil siyasəti olan dövlətdir”.
Bir sözlə Azər Həsrət hesab edir ki, Azərbaycan Ermənistan kimi marionet dövlət olmadığına görə Rusiya bizi küncə sıxışdırmaq istəyir.
Vidadi ORDAHALLI
