Qazaxıstan prezidenti Kasım-Jomart Tokayevin Bakıya rəsmi səfəri və bu çərçivədə iki ölkə arasında imzalanan bir sıra sazişlər Qarabağdakı erməni serparatçılarını bərk narahat etməyə başlayıb. Onlar bunu özləri üçün ciddi təhlükə sayır. Bir növ dolayı da olsa işarə edirlər ki, bu kimi qərarlar Qarabağdakı erməni separatizminin birdəfəlik kökünü kəsəcək.
Bu baxımdan separatçıların qondarma “xarici işlər naziri” David Babayanın indidən vay-şüvən qaldırması diqqəti cəlb edir. D.Babayan erməni mediasına müsahibəsində bəyan edib ki, Qazaxıstanın atdığı addımlar təhlükəlidir: “Qazaxıstanın Qarabağla bağlı atdığı bəzi addımlar çoxlu suallar doğurur. Qazaxıstan və Azərbaycan çox sıx əməkdaşlıq edir və bəzən bu əməkdaşlıq daha təhlükəli bir şeyə çevrilir. Qazaxıstanın atdığı bəzi addımlar, xüsusən də Qarabağla bağlı həqiqətən də çoxlu suallar doğurur. Türküstanla Şuşanın qardaşlaşması haqqında müqavilə bunun bariz nümunəsidir. Niyə məhz Türküstan? Məgər Qazaxıstanda başqa şəhər yoxdur? Çünki burada zəif güc elementi, pantürkizm var. Fakt budur ki, bu proseslərdə Qazaxıstan faktiki olaraq iştirak etmək istəyir. Başqa qarşılıqlı fəaliyyət sahələri yoxdurmu, Şuşa müqaviləyə daxil edilməlidirmi? Bizə qarşı işləyən çoxlu qüvvələr, qütblər var. Onların sıralarında mütləq pantürkist elementlər var, bizi daxildən sarsıtmağa, qardaş ölkələrlə, xalqlarla əlaqələri kəsməyə çalışan ünsürlər var”.
Maraqlıdır, separatçılar Qazaxıstan prezidentinin Bakı səfərindən, atdığı addımlardan niyə bu qədər narahatdırlar?
Sözügedən məsələyə aydınlıq gətirən AMİP sədri Arzuxan Əlizadə separatçıların bu dərəcədə narahat olmasını bir sıra amillərlə əlaqələndirdi: “Bunun başlıca səbəbi son illər türkdilli dövlətlər arasında inteqrasiya meyillərinin praktiki müstəviyə keçməsi və dərinləşməyə doğru yön almasıdır. Xüsusən də Orta Asiyanın türkdilli dövlətlərinin bu yöndə atdığı addımlar erməniləri ciddi narahat edir. Məsələnin başlıca tərəfi ondan ibarətdir ki, Orta Asiya ölkələri 20 il əvvəlki dövrdən fərqli olaraq Qarabağ məsələsində daha konkret mövqe ortaya qoyurlar. Bir müddət əvvəl Özbəkistan Prezidenti Şavkat Mirziyoyev Bakıda səfərdə olarkən Prezident İlham Əliyevi ölkənin ərazi bütövlüyünü təmin etdiyi üçün təbrik etdi. Azərbaycanın bu sahədə uğurunu xüsusi qeyd etdi. O cümlədən, Özbəkistan vəsaiti ilə Füzuli şəhərində məktəb inşa olunur. Bənzər mövqeyi Bakıda səfərdə olan Qazaxıstan prezidenti Tokayev də xüsusi vurğuladı. Qeyd etdi ki, Azərbaycan tarixi Zəfərə imza atıb. Təhlükəsizlik Şurasının qətnamələrinə tam müvafiq olaraq ərazi bütövlüyünü bərpa edib. Qazaxıstan KTMT-də, Aİİ-də təmsil olunduğu üçün Tokayev diplomatik formada belə fikirlər səsləndirməkdən yayına bilərdi. Ancaq o, haqqın, ədalətin yanında dayanaraq ortaya mövqe qoydu. Heç bir tərəddüd etmədən Türküstanla Şuşanın qardaşlaşması haqqında müqaviləyə razılıq verdi. Bax bu kimi məqamlar ermənilərə od vurur. Separatçılarda əminlik yaranır ki, Qarabağdakı tör-töküntülərin birdəfəlik təmizlənməsi qaçılmazdır. Ermənistanla bir blokda təmsil olunan ölkələr təkcə sözdə Azərbaycanın ərazi bütövlüyünü tanımır. Bunu həm də əməldə ortaya qoyurlar”.
Partiya sədri hesab edir ki, kimin nə deməsindən asılı olmayaraq Azərbaycan bütün Qarabağa nəzarəti bərpa edəcək.
Vidadi ORDAHALLI
