Avqustun 25-də ABŞ-da Ermənistan konsulluğunun binası ermənilər tərəfindən əhatəyə alınıb.
Erməni mediası xəbər verir ki, Los-Ancelesdə “Vətəni təslim etməyi dayandırın!” şüarı ilə 24 saatlıq etiraz aksiyası keçirilib. Aksiya iştirakçıları Ermənistan konsulluğunun binası önündə Paşinyan hakimiyyətinin ünvanına sərt ifadələr işlədiblər.
ABŞ erməniləri bununla hansı prosesə təzyiq etməyi düşünür və niyə belə narahatdırlar?
Beynəlxalq Diaspor Mərkəzinin (BDM) rəhbəri İsmayıl Ağayev “Bakı-Xəbər”ə açıqlamasında bildirdi ki, Ermənistan hakimiyyəti Azərbaycan və Türkiyə ilə münasibətləri normallaşdırmağa çalışsa da, erməni diasporu buna qarşı çıxır: “İkinci Qarabağ müharibəsindən sonra nüfuzdan düşən erməni diasporu revanşist mövqe sərgiləyir və bu zərərli ideyanı dünya erməniləri arasında yaymağa çalışır. Əvvəla qeyd edək ki, İrəvanın 2020-ci il müharibəsindən sonra Azərbaycanla sülh razılaşması bağlamağa, eyni zamanda Türkiyə ilə əlaqələri bərpa etməyə çalışması erməni diasporunu fiaskoya uğradıb. Müharibədəki məğlubiyyətin sarsıntısından hələ də çıxa bilməyən revanşist düşüncəli ermənilər milli maraqlarının satılması ittihamı ilə yerli hakimiyyətə düşmən kəsilib və israrla Paşinyanın istefasını tələb edirlər. Əslində bununla xaricdəki erməni diasporunun məğlubiyyəti rəsmiləşir. ABŞ-dakı ən böyük erməni diaspor lobbi təşkilatı Amerika Erməni Milli Komitəsi (ANCA) də Baş nazir Nikol Paşinyana qarşı radikal mövqedən çıxış edir. Lakin bu heç də erməni diaspor fəallarının fikir həmrəyliyi kimi xarakterizə oluna bilməz. Müşahidələr göstərir ki, Paşinyanın siyasətinə yanaşma erməni diasporu arasında ikitirəlik yaradıb. Əgər əvvəllər diaspor erməniləri öz milli mənsubiyyətləri ilə fəxr edir, bunu daim vurğulayırdılarsa, indi onların çoxu təslim olmuş Ermənistanla birləşmək istəmir və özlərinə başqa kimlik aid etməyə üstünlük verirlər.
Yaxud əgər əvvəllər bir çox diaspor erməniləri arasında öz vətənlərinə qayıtmaq arzusu var idisə, bəziləri hətta gələcəklərini Ermənistanda görürdüsə, indi bu istək xeyli dərəcədə itib, çünki Ermənistan hətta öz sərhədlərinin toxunulmazlığını təmin edə bilmir. Real vəziyyətin təhlili göstərir ki, həqiqətən də baş nazir Paşinyan postmüharibə dövründə təkcə ölkə daxilində yox, həm də xaricdə dəstəyini itirir. Xüsusən də erməni diasporunun təmsilçilərinin ondan açıq şəkildə üz döndərdiyi özünü qabarıq formada büruzə verir. Elə bu səbəbdəndir ki, özünün xaricə səfərləri zamanı Paşinyan diaspor nümayəndələri ilə görüşdən qaçır. Eyni zamanda, diaspor qüvvələrinin də Ermənistan baş nazirinə qarşı fəaliyyəti genişlənir”.
Məhəmmədəli QƏRİBLİ
