Ermənistanın Baş naziri N.Paşinyan Müstəqillik Bəyannaməsinin qəbul edilməsinin 32-ci ildönümü münasibətilə xalqa müraciətində təkcə erməniləri təbrik etmədi, eyni zamanda vəziyyətin nə qədər ağır olduğunu onların nəzərinə çatdırmağa çalışdı. Bu səbəbdən müraciətdə müstəqillik haqqında deyilən fikirlər cəmiyyətdə heç bir əks-səda doğurmadı. Əsas diqqət Azərbaycan və Rusiya ilə əlaqədar deyilənlərə yönəldi.
Hətta bayram müraciətində də Azərbaycandan növbəti dəfə şikayət etmək imkanını əldən buraxmayan erməni lideri bizi münasibətləri normallaşdırmaq üçün yüksək bədəl tələb etməkdə günahlandırdı.
Bu şikayət erməni cəmiyyətini nə qədər narahat etsə də əsas müzakirə mövzusu təbrik mətnində yer alan və Rusiyaya ünvanlanan bir cümlə oldu. Həm adi insanlar, həm də siyasətlə əlaqəsi olanlar məhz bu cümləni müzakirə edir: “müstəqillik bizimçün möhkəm müttəfiqlik münasibətləridir, ancaq müttəfiqlər təkcə sizin deyil, həm də sizə qarşı olanın müttəfiqləridir”.
Bununla Ermənistan Baş naziri bir daha xatırlatmağı vacib saydı ki, ötən əsrin 90-cı illərində qazanılan qələbələr müttəfiq Rusiyanın ciddi yardımı ilə əldə olunmuşdu və artıq o böyük gücdən istifadə etmək imkanı yoxdur. Azərbaycan rəhbərliyi son dərəcə ağıllı siyasət aparmaqla erməniləri əsas müttəfiqlərindən məhrum etmişdir. Bu gün Rusiya həm də, bəlkə də daha çox Azərbaycanın müttəfiqidir və bir çox məsələlərdə onun yanında yer alır. Son aylar Qarabağda və ətrafında ermənilərin məruz qaldığı uğursuzluqların, Ermənistanda ciddi ruh düşkünlüyü yaradan güzəştlərin kökündə də ilk növbədə bu amil dayanır.
Erməni ekspertləri N.Paşinyanın hətta təbrik müraciətində də xalqı növbəti güzəştlərə hazırlamağa cəhd göstərməkdə ittiham erirlər. Onun istefasını tələb edənlər bu məqamdan da yararlanmağa çalışırlar. Bayram təbrikində belə xalqı güzəştlərə, növbəti məğlubiyyətə hazırlayan şəxsin hakimiyyətdə qalmaq haqqı yoxdur-deyirlər.
Eyni zamanda Ermənistanda Rusiya əleyhinə çıxışlar geniş vüsət almaqdadır. Bəzi siyasi partiyalar KTMT kimi əhəmiyyətsiz qurumdan çıxmağı, Rusiya bazalarını bağlamağı, rus hərbçilərini çıxarmağı və daha cəsarətlə qərbə yaxınlaşmağı tələb edirlər. Bu addımın son dərəcə təhlükəli olduğunu iddia edən digər partiyalar Ermənistanın Rusiyasız yaşaya bilməyəcəyini, antirus təbliğatının ermənilərə baha başa gələcəyini, qorxaqlığı dəfələrlə sübut olunmuş qərbə güvənməyin yanlış olduğunu bəyan edirlər. Azərbaycanın Avropa üçün birinci dərəcəli əhəmiyyət daşıyan məsələdə- enerji təhlükəsizliyinin təmin olunmasında oynadığı mühüm rola diqqət çəkərək xam xəyallara uymamağa çağırırlar. “Daşnaksütyun” partiyası hakimiyyətin öz qorxaqlığını etiraf etmək əvəzinə bütün günahları Rusiyanın üzərinə atmağa çalışdığını iddia edərək Laçında baş verən son hadisələrin bunun bariz nümunəsi olduğunu bəyan edir.
Yaxın günlərdə Brüsseldə və Moskvada keçiriləcək mühüm görüşlərə Ermənistan hakimiyyəti bu cür ziddiyyətlər içərisində, son dərəcə zəifləmiş vəziyyətdə gedir. Azərbaycan addım-addım həm sahədə, həm də danışıqlar stolu arxasında mövqelərini möhkəmləndirir və bu prosesin daha böyük qələbələrə gətirib çıxaracağı şübhə doğurmur.
Abutalıb SƏMƏDOV Azərbaycan Naminə Alyans Partiyasının sədri
