Rusiya və Ermənistan arasında mövcud münasibətlərin inkişaf səviyyəsinin hansı nəticələrlə yekunlaşacağı indi hər iki ölkədə, eləcə də regionda marağı olan dövlətlərdə xüsusi maraq doğurur. Çünki proseslərin gedişi Rusiyanın Ermənistana təzyiqlərinin artacağını, hətta bu ölkə ərazisində hərbi güc tətbiq edəcəyini istisna etmir. Bütün bunlara səbəb Rusiyanın Ermənistandakı “Sürməli” ticarət mərkəzində baş verən patlayışda günahkar olmasına dair erməni media vasitələrində ittiham edilməsidir.
Xatırladaq ki, Rusiya bu görə avqustun 17-də Ermənistana nota verib. Rusiya Xarici İşlər Nazirliyinin İnformasiya və Mətbuat Departamentinin direktor müavini İvan Neçayev qeyd edir ki, İrəvan notaya cavabı gecikdirir: “Biz Ermənistana verdiyimiz nota ilə əlaqədar bu ölkədən cavab gözləyirik. Rusiyanın müvəqqəti işlər vəkili ilə Ermənistan Xarici İşlər Nazirliyinin rəhbərliyi arasında konstruktiv söhbət baş tutub. Biz cavab gözləyirik”. Öz növbəsində İrəvan Rusiyaya cavab olacağını bildirir. Lakin erməni mediası yazır ki, məsələ təkcə nota və ona cavabla məhdudlaşmır. Kremlin İrəvanda əsl niyyəti başqadır. Ermənistanın “epress.am” saytı yazır ki, Kreml İrəvanda hərbi yolla hakimiyyət dəyişikliyinə nail ola bilər: “Təsadüfi deyil ki, indi Rusiya teleqram kanalları “İrəvanı qarşıda şən dövrlər gözləyir, Ermənistanın denasifikasiyası qaçılmazdır” başlıqları altında yazılar dərc edirlər. Rusiya müxtəlif bəhanələr altında Ermənistanın denasifikasiyası prosesinə başlamaq məcburiyyətində qalacağını bəyan edəcək. Kremldə belə hesab olunur ki, həqiqətən Moskvanın artıq İrəvana barmaq silkələməsinin vaxtıdır. Ermənistana “müttəfiq özünü necə aparmalıdır” sualı verilməlidir. Kreml artıq İrəvanın bu hərəkətlərinə dözməyəcək və adekvat cavab tədbirləri görəcək”. Məsələ ilə bağlı “armenianreport” portalı Rusiyanı daha sərt şəkildə ittiham edir. Qeyd edilir ki, ruslar Ermənistana qarşı yeni təzyiq siyasətinə başlayıblar: “Bu fonda biz şiddətli narazılığın imitasiyasını gördük. Biz primitiv manipulyasiya gördük. Yalan gördük. Biz bütün bunları Rusiyanın Ermənistandakı səfirliyindən gördük, o öz “facebook” səhifəsində mesaj yerləşdirdi və buradan belə çıxır ki, ruslar “yerli informasiya məkanında həyasız yalanın şişirdilməsindən qəzəblənirlər”. Bunları Rusiya səfirliyi bəyan edir. Bu, trol fabrikləri, çoxlu sayda saxta xəbərləri, yalan, nifrət, müharibə, fəlakət təbliğatı aparan bir səfirlikdir. Buna görə Qərbin sanksiyaları altında olan siyasətçiləri və təbliğatçıları ilə dünyaca məşhur olan bir ölkənin səfirliyidir. Rusiyanın informasiya şantajı bir saat belə dayanmır. Rus təbliğatçılarından biri olan Vladimir Solovyov Avropanın ruslar üçün bağlanmasına cavab olaraq Latviyaya qoşun yeritməyə çağırdı. Təbliğatçı bəzi Avropa ölkələrinin ruslara Şengen vizalarının verilməsini qadağan etmək fikrinə belə reaksiya verib: “Yaxşı, biz indi Latviyadakı rusdilli əhalinin 40%-ni qorumaq üçün qoşun göndərəcəyik. Berlin, Paris, London, Brüssel bizim raket zərbələrimizdən yanmağa hazırdırlarmı?” Bundan əlavə, ekstremal hallarda Rusiya nüvə silahından istifadə edə bilər. Yəni Solovyov Kreml təhlükəsini təkcə Latviyaya deyil, bütün dünyaya göstərir.
Bunun fonunda Rusiyanın ölkəmizdəki səfirliyinin bəyanatı ortaya çıxır. Həqiqətən də rus sinizminin sərhədləri yoxdur. Onların nankorluğunun həddi-hüdudu yoxdur. Axı Solovyov öz bəyanatı ilə çox təhlükəli bir şeyi xatırladıb - o, dünyanın istənilən ölkəsində Rusiya pasportu daşıyıcılarının olması təhlükəsini xatırladıb. Biz onların üzünə qapıları açdıq, Ermənistana buraxdıq. Onlar burada özlərini rahat hiss edirlər. Amma Rusiyanın ölkəmizdəki səfirliyindən minnətdarlıq əvəzinə axmaqlıq, yalanlar eşidirik. O, “Rusiya strukturlarına qarşı “Sürməli” ticarət mərkəzində partlayışda iştirakla bağlı küfr və saxta ittihamlar”dan bəhs edir. “Sürməli” ticarət mərkəzinin ərazisində faciə. Eyni zamanda, bu hərf və söz yığınında heç bir konkretlik yox idi. Onlar bunu guya “Rusiya-Ermənistan müttəfiqlik münasibətlərinə xələl gətirmək məqsədi daşıyan bu cür eyhamların arxasında duran siyasi qüvvələrin birbaşa təxribatı” kimi qiymətləndirirlər. Belədirsə, ad verin, ad! Heç nə yoxdur. Yalnız isterika, diş qıcırtıları. Onlardan fərqli olaraq biz konkret danışa bilərik. Xüsusilə xatırlada bilərik ki, İrəvanda “Sürməli” yarmarkasında baş verən partlayışlar barədə Aram Qabrelyanovun nəzarətində olan “life.ru” resursu məlumat yayıb. Üstəlik, partlayışdan iki saat əvvəl. Qabrelyanovun kim olduğunu hamı bilir. Ona Rusiya xüsusi xidmət orqanları nəzarət edir. Və açıq şəkildə ölkəmizin rəhbərliyinə qarşı çıxır. Bəli, Paşinyan hökumətinə çoxlu suallar olub, var və olacaq. Ən geniş mövzular üzrə. Amma bunu ondan ruslar yox, biz soruşa bilərik. Öz növbəsində, rusların hürdürdüyü başqa bir ev iti də var - Semyon Peqov. O, “Sürməli”də partlayışı “WarGonzo” adlı teleqram kanalında yerləşdirib və burada deyilirdi ki, partlayış nəticəsində 5 yaşlı qız ölüb. Guya ki, Peqova bu barədə həmin qızın cəsədinin təxliyəsinə kömək edən şahidlər məlumat verib. Məlumat təsdiqini tapmayıb: sadəcə yaralananlar arasında 5 yaşlı qız da var. Lakin Peqovun qarşısına qoyulan məqsədə nail olundu. Yalan və panika bütün İrəvana yayıldı. Və buna görə Peqov heç bir üzr istəmədi. Çünki o, yalnız ağasından üzr istəyir. Reallıq belədir. Peqovu isə Ermənistanda hamı tanıyır. Rusiya-Ermənistan müttəfiqlik münasibətlərinə xələl gətirən yalnız Moskvadır. Rusiya səfirliyinin bəyanatı bunun daha bir sübutudur. Ənənəvi olaraq ruslar yenə yalan danışmağa üstünlük verir”.
Nahid SALAYEV
