Rusiya Ermənistan Xarici İşlər Nazirliyinə nota göndərib. Səbəb kimi İrəvandakı “Sürməli” ticarət mərkəzində baş vermiş partlayışlarla bağlı Rusiyanın ittiham olunması göstərilir:
“Biz bunu Rusiya-Ermənistan müttəfiqlik münasibətlərinə xələl gətirmək məqsədi daşıyan bu cür eyhamların arxasında duran siyasi qüvvələrin birbaşa təxribatı kimi qiymətləndiririk. Ermənistan hakimiyyətindən bu cür qeyri-dost təzahürlərin qarşısını almağa yönəlmiş addımlar gözləyirik”. Qeyd edək ki, bundan əvvəl "Sasna tsrer" siyasi qrupu sosial mediada belə iddialarla çıxış etmişdi. Maraqlıdır ki, Ermənistanın rəsmi mövqeyinin ifadə olunmadığı bu məsələyə Rusiya dövlət səviyyəsində nota verib. Rusiyanın notasında diqqət çəkən məqam həm də odur ki, Moskva Ermənistandan təxribat aparan daxili siyasi qüvvələrlə bağlı tədbir görməsini istəyir. Maraqlıdır, Rusiya Ermənistandan hansı siyasi qüvvələrin cəzalandırılmasını tələb edir?
Politoloq Əhəd Məmmədli “Bakı-Xəbər”ə açqılamasında bildirdi ki, Ermənistanda baş verən partlayışla bağı ciddi narazılıq var: “Bunun başlıca səbəbi tələfatın böyük olmasıdır. Bundan da müəyyən siyasi qüvvələr öz məqsədləri üçün istifadə edir. Məsələn, biz izləsək görərik ki, Ermənistan ictimai rəyində bu partlayışın arxasında həmin ölkənin özünə real düşmən saydığı dövlətlərlə bağlı eyhamlara rast gəlinmir. Daha çox Rusiyaya yönəlik ittihamlar var. Bunun da səbəbi məlumdur. Çünki Ermənistan cəmiyyəti Qarabağdakı məğlubiyyətin başlıca günahını Rusiyada görür. Onlar hesab edir ki, Rusiya istəsəydi Ermənistanı məğlubiyyətdən xilas edərdi. Ancaq cəmiyyəti də bu istiqamətə yönəldənlər var. Rusiyanın Ermənistanda çox yaxşı kəşfiyyat şəbəkəsi var. Onlar hesab edirlər ki, Paşinyan və onun hakimiyyətini dəstəkləyən Qərb dairələri Rusiya üzərinə növbəti dəfə hücum etmək üçün bəhanə əldə edib. Rusiyanı bütün dünyada təkləmək istəyən Qərb dünyası Ukraynada başının qarışıq olmasından istifadə edərək onu daha bir forpostunda problemlərin ortasına çəkmək istəyir. Təsadüfi deyil ki, partlayışdan dərhal sonra rus ordusunun Ermənistandan çıxarılması və qərbyönlü ordu ilə əvəz edilməsi çağırışları eşidilməyə başlandı. Rusiya bunu çox yaxşı bildiyi üçün Ermənistana rəsmi səviyyədə etiraz edir. Təbiidir ki, bu xəbərdarlığın əsas ünvanı Ermənistan hakimiyyətidir. Rusiya bilir ki, hakimiyyətin loyal münasibəti olmasa bu mövzu və Moskvaya nifrət belə geniş təbliğ olunmaz. Yəni Rusiya Ermənistan uğrunda bir geopolitik savaşın getdiyinin fərqindədir. Bu vəziyyətin bizə xeyri var. Çünki Rusiyanın Ermənistanla münasibətlərinin daha da kəskinləşməsi bizim Qarabağdakı manevr imkanlarımızı da artırır. Moskva heç vaxt hansısa partiyanın verdiyi bəyanata görə rəsmi etiraz etməz. Belə bir bəyanata Rusiyada cavab verənlər tapılardı. Rusiya bu nota ilə Paşinyana ciddi xəbərdarlıq edir ki, hansı oyunları çevrdiyindən xəbərdardır. Bu etirazın mənası daha çox “Paşinyan, özünü yığışdır” anlamına gəlir”.
Məhəmmədəli QƏRİBLİ
