Ukrayna Prezidenti Volodimir Zelenski Türkiyə Prezidenti Rəcəb Tayyib Ərdoğan və BMT-nin baş katibi Antonio Quterreşin iştirakı ilə keçirilən üçtərəfli görüşdən sonra vurğulayıb ki, Rusiya ilə dialoq yalnız işğalçı qüvvələrin Ukrayna ərazisindən tamamilə çıxarılacağı təqdirdə mümkün olacaq.
O, bu barədə avqustun 18-də Lvovda keçirilən görüşdən sonra birgə mətbuat konfransında bildirib. Eyni zamanda, Türkiyə Prezidentinin dediyi kimi, görüşdən sonra həm Zelenski, həm də Quterreş Ukraynadakı müharibənin danışıqlar masası arxasında dayandırılması ilə bağlı razılığa gəliblər. Qeyd edək ki, son günlər Ukrayna ordusunun da cəbhədə müəyyən uğurlara imza atdığı faktı var. Bunun fonunda Zelenskinin çox arxayın danışması, hətta Rusiyadan tam olaraq Ukraynanı tərk etmək tələbini irəli sürməsindən müharibənin hələ uzun müddət davam edəcəyi nəticəsi hasil olurmu?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, sözügedən görüşdən gözlətilər həddən artıq çox idi: “Ukrayna xalqı da müharibənin bitməsi ilə bağlı hansısa bir razılığın əldə edilməsinə ümid edirdi. Çünki həm Ərdoğan, həm də BMT-nin baş katibi bundan əvvəl Putinlə görüşüb, müzakirələr aparıblar. Yəni Rusiyanın mövqeyi, nə tələblər irəli sürməsi onlara bəlli idi. Əsas məsələ Zelenskini razı salmaq idi. Ancaq görünən budur ki, Zelenski hələ də Qərbin sona qədər ona dəstək verəcəyinə inanır. Elə düşünür ki, Qərb Ukraynanın tam ərazi bütövlüyünü bərpa etmək üçün onun yanında olacaq. Ancaq məsələ burasındadır ki, Qərb və ABŞ Ukraynanın silah və texnika ilə bağlı məsələdə olduqca ehtiyatlı davranırlar. Ukraynanın irimiqyaslı əməliyyatlara keçməsi üçün onu lazımi silahlarla təchiz etmirlər. Ukrayna ordusu həm də canlı qüvvə sarıdan əziyyət çəkir. Bu məsələ olduqca ciddi problem yarada bilər. Lvov görüşündən sonra bu qənaətə gəlmək olar ki, Ukrayna ABŞ-ın razılığını almadığını görə, Rusiya ilə atəşkəs imzalamaqdan imtina etdi. Belə davam edərsə, müharibə yaxın zamanda bitməyəcək. Bu da Ukrayna üçün humanitar bir gərginliyin davam etməsinə səbəb olacaq. Ola bilər ki, taktiki istiqamətlərdə Ukrayna ordusunun üstünlükləri nəzərə çarpsın. Ancaq ümumi anlamda Rusiya öz istədiyinə nail ola bilib. Hər kəs xəritəni qarşısına qoyub, vəziyyəti analiz edə bilər. Rusiyanın özü də bura qədər irəliləməyi düşünürdü. Vəziyyətin daha da gərginləşməməsi üçün Ukrayna atəşkəs razılığını imzalamağa nail olmalıdır. Əks təqdirdə Ukrayna daha böyük ərazilər itirə bilər”.
Məhəmmədəli QƏRİBLİ
