Azərbaycanda fəaliyyət göstərən ekoloji yönümlü qeyri-hökumət təşkilatları (QHT) Azərbaycan ərazilərində qanunsuz məskunlaşmış ermənilərin Laçında və ətraf ərazilərdə ekoloji terror törətməsi ilə bağlı beynəlxalq təşkilatlara müraciət edib.
Müraciətdə deyilir ki, Azərbaycanda fəaliyyət göstərən qeyri-hökumət təşkilatları olaraq Azərbaycan ərazilərində dünyanın müxtəlif ölkələrindən gətirilib qanunsuz məskunlaşdırılmış erməni əhalisinin son günlər Laçın rayonu və ətraf ərazilərdə meşə yanğınları törətməsi ilə bağlı narahatdırlar.
Məlumat üçün bildirək ki, məlum müraciəti 18 ekoloji yönümlü qeyri-hökumət təşkilatı imzalayıb.
Azər Allahverənov: “Laçının Zabux və Sus kəndlərindən çıxan ermənilər tək evlərə deyil, təbiətə də zərər yetirir”
Müraciəti imzalayanlar arasında “Avrasiya Miqrasiya Təşəbbüsləri Platforması” İctimai Birliyi də var. Birliyin sədri Azər Allahverənov “Bakı-Xəbər”ə açıqlamasında qeyd etdi ki, 44 günlük Vətən müharibəsindən sonra Azərbaycan tərəfi humanistlik nümayiş etdirdi: “Bizim tərəfimizdən ermənilərə Kəlbəcəri, Ağdamı boşaltmaq üçün vaxt verildi. Ancaq onlar həmin əraziləri tərk etmək əvəzinə, evləri, meşələri yandırırdılar. Hətta minaların da yerləşdirilməsi ilə məşğul olurdular. Bütün bunlar ermənilərin xislətini göstərir. Təəssüflər olsun ki, onlar tərəfindən hazırda da Oxçu çayın çirkləndirilməsi davam etdirilir. Beynəlxalq təşkilatlar isə ikili standartlar sərgiləyərək buna göz yumurlar. Bunlar isə yolverilməzdir. Laçın şəhəri ətrafında baş verən yanğınlar isə qəsdən törədilib. Bütün bunlar bir daha sübut edir ki, onlar bu xislətlərindən əl çəkməyəcəklər”.
Birlik sədrinin sözlərinə görə, Laçının Zabux və Sus kəndlərində çıxan ermənilər tək evlərə deyil, təbiətə də zərər yetirir. Baxmayaraq, rəsmi şəxslər əhaliyə evlərin yandırılmaması ilə bağlı çağırış etmişdilər. Ancaq Zabux və Sus kəndlərini tərk edən ermənilər heç nəyə əhəmiyyət vermirlər. Yandıra bildiklərini yandırır, yandıra bilmədiklərini isə məhv edirlər. Ermənilərin azərbaycanlılara qarşı nifrəti bu sahədə də özünü göstərir: “Məlumdur ki, flora və fauna yanan zaman onun bərpa olunması uzun müddət tələb edir. Ekoloji və mina terroru gizli terror hesab edilir. Bu, bəşəriyyətə qarşı törədilən terrordur. Ermənistan tərəfindən törədilən ekoloji terrorla bağlı lazımi addımlar atılacaq. Dəymiş ziyan tam hesablandıqdan sonra Ermınistanın məsuliyyətə cəlb olunması ilə bağlı Azərbaycan tərəfi zəruri addımlar atacaq”.
Səlim Balayev: “Ermənilər Laçın ərazisindəki meşə ərazilərimizi yandıraraq ətraf mühitə qəsdən zərər vurur”
“Ekoloq-2010" Ekoloji Maarifləndirmə İctimai Birliyinin sədri Səlim Balayev qeyd etdi ki, Azərbaycan torpaqlarının 20 faizi Ermənistanın işğalı altında olduğu dövrdə ərazilərimizə ekoloji baxımdan çox ciddi ziyan vurulub. Onlar təkcə xalqımıza qarşı genosid həyata keçirmədi, həm də təbiətimizə, milli sərvətlərimizə qarşı soyqırım həyata keçirdilər. 10 min hektarlarla meşəni erməni işğalçılar məhv etdi.
S.Balayev qeyd etdi ki, ermənilər Laçında və ətraf ərazilərdə qəsdən ekoloji terror törədib, ətraf mühitə bilərəkdən zərər vurublar: “Bu hadisə onların Azərbaycana və Azərbaycan xalqına patoloji nifrət bəsləyən ermənilərin həm də təbiətə, təbii sərvətlərimizə, ekoloji mühitə münasibətinin bariz nümunəsidir. Danılmaz fakdır ki, Azərbaycan Respublikası ekoloji tarazlığın qorunması, vətəndaşlarının sağlam ətraf mühitdə yaşamasının təmini üçün daim çalışır və bu prosesdə də qeyri-hökumət təşkilatları yaxından iştirak edirlər”.
Həmsöhbətimiz onu da əlavə etdi ki, ermənilər Laçın ərazisindəki meşə ərazilərimizi yandıraraq ətraf mühitə qəsdən zərər vurur.
Birlik sədri hesab edir ki, bu gün Azərbaycan torpaqlarında törədilən bu çirkin əməllər təkcə Azərbaycan xalqına qarşı deyil, külli-bəşəriyyətə və insanlığa qarşı yönəlmiş cinayətdir: “Baş vermis ekoloji terrora beynəlxalq təşkilatlar reaksiya verməli, vəhşi ermənilərlə bağlı sərt mövqe ortaya qoymalıdırlar”.
Günel CƏLİLOVA
