Kor tutduğunu buraxmayan kimi, ermənilər də saxta iddialarından yapışıb onu buraxmaq istəmirlər, yalanlarından əl çəkib həqiqətləri qəbul etməkdə maraqlı deyillər.
Azərbaycan alimləri İrəvanın mərkəzində yerləşən xalqımıza məxsus qədim Təpəbaşı məhəlləsinin taleyini gündəmə gətirdikdən və məhəllənin təhlükəli vəziyyəti ilə bağlı UNESCO-ya müraciət etdikdən sonra Ermənistan tərəfi bundan ciddi narahatlıq keçirməyə başlayıb. Özlərini sudan quru çıxarmaq üçün şər-böhtan kampaniyasına başlayan Ermənistan hökuməti, elmi ictimaiyyəti ağılasığmaz iddialar irəli sürür. Təpəbaşı barədə veriliş çəkib onu “erməni məhəlləsi” kimi qələmə verən BBC-nin keçmiş müxbiri, erməni jurnalist Mark Qriqoryan uzun müddət sussa da, yeni-yeni dili açılıb. Əslində, Təpəbaşının acınacaqlı vəziyyətini əks etdirən görüntülər Qriqoryanın materialında əks olunurdu. Təbii, o bunu dağıntı, Azərbaycan irsinin dağıdılması kimi təqdim etmirdi, erməni maraqlarına uyğun şəkildə təqdim edirdi.
Uzun müddət səssiz qalan BBC-nin keçmiş müxbiri, erməni jurnalist Mark Qriqoryan Təpəbaşı ilə bağlı yazdığı yazıda Azərbaycan irsi ilə bağlı saxta iddialar irəli sürərək iddia edir ki, guya burada ermənilər “qədimdən yaşayıb”. Qriqoryan daha böyük saxtakarlıq edərək Azərbaycan alimlərinin Təpəbaşı ilə bağlı apardığı geniş araşdırmaya kölgə salmağa çalışıb və Təpəbaşı mövzusunun Azərbaycanın xüsusi xidmət orqanları tərəfindən gündəmə gətirildiyini iddia edib:”...Əminəm ki, bütün bunlar insanların diqqətini əsl gündəmdən (?) – “Qarabağda erməni irsinin məhv edilməsindən” (?) yayındırmaq üçün saxta gündəm yaradan Azərbaycan xüsusi xidmət orqanlarının əməyinin nəticəsidir”. Ümumiyyətlə, Azərbaycan Təpəbaşı məhəlləsi məsələsini gündəmə gətirərkən ermənilər sosial şəbəkələrdə eyni cəfəng iddialarla çıxış edirdilər.
“Ortaya atılan bu iddialar növbəti təxribatdır”
M.Qriqoryanın iddialarının cəfəng olduğunu deyən AMEA-nın A.Bakıxanov adına Tarix İnstitutunun əməkdaşı Faiq İsmayılov “Bakı-Xəbər”ə şərhində bildirdi ki, bu gün ermənilərin ən böyük qorxusu Azərbaycan tərəfin indiki Ermənistan ərazilərinə qarşı iddialar irəli sürmək məsələsi ilə bağlıdır. “Onlar qorxurlar ki, Azərbaycan öz əzəli torpaqlarına qarşı iddia irəli sürər. Burada istər jurnalist, istər tarixçi, istərsə də elmin başqa sahəsi ilə məşğul olan adamlar olsun, hər hansı bir iddia irəli sürürlərsə onun arxasında sübut yoxdur. Bu ara söhbətidir və tarixdə, elmdə qəbul olunmur. Mark Qriqoryan Təpəbaşı ilə bağlı yazdığı yazıda heç bir əsaslandırma irəli sürə, dəlil, sübut göstərə bilmir. Çünki onun dediyi “qədimlilik” keçən əsrin əvvəllərindən başlayırsa, bəs onda onlardan əvvəlki həyat kimlərə məxsus olub? Saxtakarlıqlar etməkdənsə, gedib həqiqətləri Ermənistanın arxivlərində məxfi saxlanan materiallardan öyrənsin. Bu iddiaları irəli sürən adam Təpəbaşı toponiminin erməni dilində mənasını araşdırsın. O toponim ermənilərdə varmı? Bu gün Ermənistanın paytaxtı İrəvanın mərkəzində yandırılan “Sürməli” ticarət mərkəzinin adını götürək. “Sürməli” sözünün erməni toponiminə aidiyyəti yoxdur. “Sürməli” də yer-məkan adı kimi İrəvanın mərkəzində qalıb, indi də ermənilər ondan istifadə edirlər. Əgər bunlar “Qarabağda erməni irsi olub” deyə iddia edirsə, onda zəhmət çəkib bizimlə birgə bir komissiya yaratsınlar və onların alimlərini də, tarixçilərini də bu komissiya üzvlüyünə salaq, birgə Azərbaycan və Ermənistan ərazilərində tədqiqat işləri aparaq. Kimin nələri dağıtdığını qarşılıqlı şəkildə araşdırıb aşkarlayaq ki, bu şər-böhtana son qoyulsun. Bu mənim təklifimdir. Qriqoryanın iddiaları tamamilə əsassızdır və heç bir fakta, sübuta əsaslanmır”.
Qonşularına qarşı ərazi iddiaları irəli sürmək, mədəniyyətini, mədəni isrini mənimsəmək, şər-böhtan atmaq Ermənistanın dövlət siyasətidir deyən F.İsmayılovun sözlərinə görə, ermənilər başqalarının mədəni isrini saxtalaşdıraraq özlərinə qondarma mədəniyyət yaradırlar. F.İsmayılov qeyd etdi ki, hələ də ermənilər dənizdən-dənizə “Böyük Ermənistan dövləti” yaratmağa iddialıdırlar və bu sahədə təbliğatlarını davam etdirirlər. “Ermənilər bu xülyadan, utopiyadan əl çəkməyənə, bu yuxudan ayılmayana qədər onların qonşuları ilə dinc, yanaşı yaşaması mümkün deyil. Ona görə ki, onlar indiki çətin vəziyyətlərdə belə Azərbaycana, Türkiyəyə qarşı ərazi iddiaları irəli sürür, türklərə, türkçülüyə qarşı faşist siyasəti aparırlar. Əgər onlar qondarma iddialarını gəncləri arasında təbliğ edirsə, bu onların işidir. Ermənilərinin bu cür səhv, yanlış təbliğatı kökü olmayan Ermənistan dövlətinin tamamilə süqutuna gətirib çıxaracaq. İkinci bir tərəfdən, Ermənistana “dövlət” deyə bilmirəm. Dövlət odur ki, öz ərazisini özü qorusun, müstəqil siyasət yürüdə bilsin. Amma bugünkü gün Ermənistanın dövlət sərhədlərini Rusiya qoruyursa, Ermənistan müstıqil siyasət yürüdə bilmirsə, Rusiyanın hansısa əyalətlərindən biridir. Bunu Rusiyanın quberniyalarından biri saymaq olar”.
F.İsmayılov hesab edir ki, ermənilərin bütün iddialarını cavablandırmaq lazımdır. O qeyd etdi ki, Azərbaycan ziyalılarının Təpəbaşı ilə bağlı UNESCO-ya müraciəti onları narahat edir, bu səbəbdən də Təpəbaşı məsələsinin gündəmə gətirilməsinə qara rəng verirlər. F.İsmayılovun sözlərinə görə, Qriqoryanın Təpəbaşı harayının gündəmə gətirilməsinin Azərbaycan xüsusi xidmət orqanlarının işi kimi qələmə verməsi yolverilməzdir: “Ortaya atılan bu iddialar növbəti təxribatdır. Təpəbaşı Azərbaycan xalqının irsidir, bunun ermənilərə heç bir aidiyyəti yoxdur. Qarabağda da erməni irsi barədə danışmaq gülüncdür. Bütün dünya bilir ki, Qarabağda ermənilərin tarixi irsi olmayıb, bu gün dedikləri də iddiadır. Ermənilər Qarabağın “erməni irsi” cəfəngiyyatını ortaya atmaqla dünyanın diqqətini Qərbi Azərbaycandakı Azərbaycan irsindən yayındırmaq istəyirlər”.
İradə SARIYEVA
