Badamdar Mədəniyyət Evində Qarabağ Azadlıq Təşkilatının VI (Yenidən təşkil) və Azad Vətən Partiyasının I (Təsis) qurultayları keçirilib. Qurultayda ölkənin 38 rayonundan nümayəndə iştirak edib. Pandemiya şərtlərinə görə nümayəndələrin sayı məhdudlaşdırılıb, qonaq dəvət olunmayıb.
Günün birinci yarısında keçirilən QAT-ın qurultayında ilk olaraq dövlət himni oxunub, Şəhidlərin xatirəsi yad edilib. QAT sədri Akif Nağı “Qarabağ Azadlıq Təşkilatının yenidən təşkilinə dair” məruzə ilə çıxış edib, təşkilatın mübarizə yolu, fəaliyyətinin mərhələləri, daim əməl etdiyi prinsiplər barəsində geniş danışıb və xüsusi olaraq vurğulayıb ki, Qarabağda Böyük Zəfərdən sonra QAT-ın qarşısına qoyduğu vəzifələrin əksəriyyəti dövlət, xalq və ordumuz tərəfindən yerinə yetirilib, ona görə də QAT-ın yeni, ictimai-siyasi müstəvidə, partiya olaraq öz fəaliyyətini davam etdirməsi üçün yenidən təşkil edilməsinə dair qərar qəbul etmişik: “Ermənilər öz məkrli niyyətlərindən əl çəkmir, ona görə də torpaqlarımızın tam azad olunması, eyni zamanda dünya çatında saxta erməni təbliğatının ifşa edilməsi üçün işlərimiz davam etdiriləcək”. Məruzə ətrafında çıxışlardan sonra qərar qəbul edilib. Qarabağ Azalıq Təşkilatının (QAT) 30 illik fəaliyyətinə yüksək qiymət verilib, yeni şəraitə uyğun olaraq yenidən təşkili və partiyaya çevrilməsi qərara alınıb.
Günün ikinci yarısında Azad Vətən Partiyasının I (Təsis) qurultayı keçirilib. Partiyanın yaradılmasına dair Akif Nağı məruzə edib, qurultay iştirakçıları çıxış edərək təklif və münasibətlərini bildiriblər. Məruzə və çıxışlarda göstərilib ki, Azərbaycan prezidentinin siyasi islahatları, partiyaların fəlaiyyətləri üçün son dövrdə yaradılan şərait, partiyaların ofislə təmin olunması, ümummilli məsələlər ətrafında sağlam əməkdaşlıq və dialoqun təşkili, partiyalara dair yeni qanun layihəsi üzərində işlərin aparılması, bu prosesə partiyaların cəlb olunması və digər məsələlər siyasi fəaliyyət üçün əlverişli şərait yaradıb: “Bu şəraitdə dövlətçilik naminə siyasi fəaliyyət daha məqsədəuyğundur”.
Qurultayın qərarı ilə Qarabağ Azadlıq Təşkilatının ictimai-siyasi varisi olaraq Azad Vətən Partiyası təsis edilib. Partiyanın Proqram və Nizamnaməsi qəbul edilib. Proqram və Nizamnamədə partiyanın mövqeyi sol mərkəzçi xətt olaraq müəyyən edilir, prezident üsul idarəsinə üstünlük verilir, fəaliyyət və yanaşmalarında dünyada hakim olan klassik Aristotel məntiqi deyil, Lütfi Zadənin qeyri-səlis fəlsəfi görüşlərinə üstünlük verilir, Ləyaqətlilik, Dürüstlük, Dövlətçilİk, Azərbaycançılıq, Milli - Mədəni dəyərlərə sədaqət prinsipləri əsas götürülür, iqtisadiyyat və sosial sahələrdə fərqli yanaşmalar qeyd olunur. Müharibə iştirakçıları, Şəhid ailələrinə, həmçinin aztəminatlı təbəqələrə xüsusi diqqət ayrılır və digər məsələlər qeyd olunur. Partiya “Azad Vətən, Azad İnsan, Azad Vətəndaş!” şüarını rəhbər tutur və bəyan edir: “ Biz dildə, imanda, düşüncədə, əməldə bir olanların partiyasıyq!”.
Qurultay təşkilati məsələlərə baxıb,
Akif Nağı partiyanın sədri seçilib. Partiyanın Siyasi Şurası, Nəzarət Təftiş Komissiyası seçilib. Siyasi Şura ilk iclasında Novruz Novruzovu Siyasi Şuarının sədri seçib, sonra Partiyanın 11 nəfərdən ibarət İdarə Heyətini seçib. Sonda Partiyanın sədri Akif Nağı qurultay iştirakçılarına təşəkkür edib, partiyanın ciddi nəticələrə nail olacağını, bunun üçün hər kəsin yorulmadan çalışmalı olduğunu bildirib.
Hazırladı: Namiq QULİYEV
