Azərbaycançılıq ideologiyasının əsas komponentlərindən biri xalqımıza məxsus olan etnik adət və ənənələrin qorunması əsasında milli ruhlu gənc nəslin yetişdirilməsinin düzgün təşkil edilməsidir. Bu isə məqsədyönlü və planlı şəkildə məktəblərimizdə gənc nəslin milli ruhda tərbiyə olunmasında azərbaycançılıq ideyasının aşılanması ilə bağlı ənənələrin yaradılması işinin düzgün təşkil edilməsi əsasında mümkün idi.
Azərbaycan müəllimi çox yaxşı başa düşürdü ki, Azərbaycanda milli ideologiya formalaşır, milli mənlik şüurumuz baş qaldırır, ənənələrimiz dirçəlir, dövlətçiliyimiz möhkəmlənir. Belə bir taleyüklü proseslərin getdiyi bir vaxtda məktəbimiz buna lazımınca cavab verməzsə, şagirdlərimizdə milli düşüncəni, milli mənlik şüurunu necə formalaşdıra bilərik? Ona görə də ümumtəhsil məktəblərinin hər birində arərbaycançılıq ideyasını təbliğ edən, onun təsdiqini özündə səciyyələndirən tədbirlər kompleksi hazırlandı. Azərbaycan müəllimi milli ideologiya əsasında Vətən sevgisini öz şəxsi nümunəsində formalaşmaqda olan gənc nəslə zərrə-zərrə, qət-qətrə aşıladı.
Hər bir məktəbliyə azərbaycançılıq ideyasının aşılanması onda milli dəyanət hissini gücləndirirdi. Dəyanət hissi güclü olan məktəblinin isə öz ölkəsinə, xalqına, millətinə dərindən bağlanacağına, onu böyük məhəbbətlə sevib qoruyacağına heç bir şübhə ola bilməz. Azərbaycançılıq ideologiyası və milli düşüncəyə məxsus gənclərin yetişdirilməsi işinin həyata keçirilməsi Azərbaycan respublikası Prezidenti İlham Əliyevin hakimiyyətə gəlişi və Ümummilli Liderin siyasi irsini davam etdirməsi ilə daha da möhkəmləndi. Biz Azərbaycan xalqının nümayəndələri olaraq bu reallığı 44 günlük Vətən müharibəsində mənəvi zəngin, azərbaycançılıq ideologiyası möhkəm gənclərin Vətən sevgisində şahidi olduq. Prezident İlham Əliyevin 2021-ci ildə şanlı qələbəmizdən sonra Şuşada ilk bayram tonqalını yandırarkən sölədiyi nitqində vurğuladığı kimi: “...Vətən müharibəsində bütün nəsllərin nümayəndələri qəhrəmanlıq göstərdi. Lakin etiraf etməliyik ki, onların böyük əksəriyyəti 18-25 yaşlı gənclərdir. Yəni 2003-cü ildə mənim hakimiyyətə gəlişim vaxtı hələ uşaq olan və hakimiyyətim dövrümdə formalaşan gənclərdir”.
Müharibə azərbaycançılığı milli birlik və milli identikliyin daha da gücləndirdi
Bakı Gənclər Mərkəzinin rəhbəri Nərgiz Babayeva “Bakı-Xəbər”ə bildirdi ki, 44 günlük Vətən müharibəsi göstərdi ki, ölkədə xalq-iqtidar, xalq-ordu birliyinin kökündə də məhz elə azərbaycançılıq ideologiyası dayanır: "Bu ideologiyanın təsiri nəticəsində həssas məsələlərdə xalq olaraq bir yumruq olmağı bacardıq və işğalçı ermənilərin başına endirdiyimiz “dəmir yumruq”la paralel həmin dövrdə Qarabağın işğaldan azad olunduğu 44 günlük savaş dönəmində cəmiyyətin içərisində də “Vahid Vətən”, “Vahid Dövlət” və “Vahid Azərbaycan” anlayışı ətrafında sıx birlik yarandı. Azərbaycançılıq ideologiyası bundan sonra da uğurla inkişaf etdirilərək dövlət siyasətinin məhvərində olmağa davam edəcək, Azərbaycanda milli birliyin təməlində dayanmaq ən mühüm amillərdən biri olaraq qalacaq. 44 günlük Vətən müharibəsi Azərbaycanda formalaşmış milli həmrəyliyin təcəssümü idi. Bu müharibədə Azərbaycan xalqının üzvləri eyni vətənpərvərlik və birlik içində vətənimizin müdafiəsi, torpaqlarımızın düşmən tapdağından azad olması yolunda öz canlarını sipər etdilər. Onlar şəhidlik zirvəsinə ucaldılar, qazi oldular, qərəman oldular. Azərbaycançılıq ideologyası, milli birlik və milli identikliyin formalaşmasında əsası ümümmilli liderimiz Heydər Əliyev tərəfindən qoyulan “31 dekabr - Dünya Azərbaycanlılarının Həmrəyliyi Günü” xüsusi təsir amilidir. Azərbaycançılıq ideologiyasının əsas komponentlərinin gözlənilməsi, inkişaf etdirilməsini təmin edən strategiyaların düzgün müəyyənləşdirilməsi Azərbaycan dövlətinin əsas prioritet istiqamətlərindən biri olub. Vətən müharibəsi 44 gün davam etdi. Düşmənlə təkcə Azərbaycan Ordusu döyüşmürdü, düşmənlə azərbaycançılıq da döyüşürdü, azərbaycanlı anaların xeyir-duası da döyüşürdü, döyüşlərə can atan məktəblilərin Vətən sevgisi də döyüşürdü, qazilər də döyüşürdü, Qarabağ müharibəsinin şəhidlərinin ruhu da döyüşənlərin sırasındaydı, Üzeyir bəyin musiqisi də, Səttarın rənglər dünyası da döyüşürdü”.
Azərbaycançılıq - qələbənin başlıca mənəvi-ideoloji faktoru!
Məlum olduğu kimi, azərbaycançılıq ideologiyasının mühüm elementlərindən biri də vətənpərvərlikdir. Tarixən öz vətənpərvərliyi ilə seçilən Azərbaycan xalqı bunu 44 günlük Vətən müharibəsində bir daha sübut etdi.
Vətən müharibəsi tarixinin tədqiqi göstərir ki, bu müharibədə azərbaycançılığa söykənən vətənpərvərlik amili Azərbaycan Ordusunu, ordu ilə tam bir həmrəylik sərgiləyən Azərbaycan xalqını hərəkətə gətirən başlıca mənəvi-ideoloji faktor kimi çıxış edib. Başqa sözlə desək, sadəcə müasir silahlarla deyil, həm də azərbaycançılıq ruhu ilə silahlanan Azərbaycan Ordusu cəmi 44 gün içərisində böyük zəfərə nail olub, işğaldakı bütün torpaqlarımızın azad edilməsini həyata keçirib.
Azərbaycançılıq faktorunun Vətən müharibəsinin gedişatına göstərdiyi həlledici təsiri daha yaxşı anlamaq üçün Şuşa döyüşlərinə nəzər salmaq kifayətdir. 2020-ci ilin 8 noyabr tarixində Şuşanın sərt sıldırım qayalarına dırmaşaraq əliyalın halda düşmən əsgərlərinin üstünə hücum edən Azərbaycan Ordusu, yalın əl və bıçaqlarla erməni ordusunu darmadağın etdi.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
