Rusiya sülhməramlı qüvvələrinin nəzarət zonasında qalan ermənilərin son hərəkətləri bu toplumun indi yaşadığı torpaqlara nə qədər yad olduğunu bir daha təsdiqləmiş oldu. Söhbət ermənilərin Azərbaycan ərazilərində törətdiyi növbəti ekoloji terrordan gedir.
Ümumiyyətlə, faktdır ki, Azərbaycan ərazilərində qanunsuz məskunlaşmış ermənilər təkcə xalqımıza qarşı deyil, eyni zamanda, təbiətimizə və təbii sərvətlərimizə qarşı ekoloji terror aktı həyata keçirməkdə davam edirlər. İşğal dövründə Cəbrayıl, Zəngilan, Qubadlı, Kəlbəcər, Şuşa meşələrini yandırmaqla kifayətlənməyən ermənilərin, indi də Xocalı və Laçın ərazisindəki meşə ərazilərimizi yandıraraq ətraf mühitə qəsdən zərər vurması həmin ərazilərin onlara məxsus olmadığını göstərməklə bərabər, təbiətə düşmən münasibətin birbaşa təsdiqidir. Qeyd edək ki, ermənilərin Laçın və Xocalıda törətdiyi yanğınlarla bağlı cinayət işi başlanıb. Baş Prokurorluq bu xüsusda bildirib ki, bir sıra media və sosial şəbəkə səhifələrində Azərbaycanın Laçın, Xocalı və digər rayonlarında ekoloji mühiti çirkləndirməklə ekosistemə zərər vurmaq məqsədilə müxtəlif yandırıcı material və maddələrdən istifadə edilərək meşələrin, yaşayış evlərinin yandırılmasını əks etdirən videogörüntülər və fotolar yayılıb: “Yayımlanan məlumatlarla bağlı Baş Prokurorluğun İstintaq idarəsi tərəfindən dərhal araşdırmalara başlanaraq həmin cinayətlərin kimlər tərəfindən törədildiyinin müəyyən edilməsi istiqamətində müvafiq prosessual hərəkətlər yerinə yetirilib. İlkin araşdırmalarla həmin yanğın hadisələrinin Azərbaycanın Laçın, Xocalı rayonlarının ərazisində törədilməsi və qısa müddətdə yanğınların lokallaşdırılaraq ətraf ərazilərə yayılmasının qarşısının alınması müəyyən edilib. Qeyd olunan faktlarla bağlı İstintaq idarəsində Cinayət Məcəlləsinin 282.1 (təxribat) və 186.2.2-ci (yandırmaqla və ya başqa ümumi təhlükəli üsulla özgənin əmlakını qəsdən məhv etmə və ya zədələmə) maddələri ilə cinayət işi başlanmaqla hazırda təxirəsalınmaz istintaq hərəkətlərinin icrası davam etdirilir. Azərbaycanın ərazilərində “Canlı təbiətin və təbii mühitin qorunması haqqında” 1979-cu il tarixli Avropa konvensiyanın tələblərini kobud şəkildə pozaraq ətraf mühitə qəsd edən geniş, uzun sürən və ciddi ziyan vurmaq məqsədilə təbii sərvət hesab edilən qiymətli və çoxillik ağacları olan meşələri qəsdən məhv etməklə ekoloji terrorçuluq törədənlərin müəyyən edilərək cinayət məsulliyətinə cəlb edilməsi istiqamətində qanunamüvafiq bütün tədbirlər görüləcək”. Baş verən hadisələr bir daha təsdiq edir ki, təkcə Qarabağdakı qanunsuz erməni silahlı birləşmələrinin yox, həmçinin Azərbaycan vətəndaşlığını qəbul etməyən mülki ermənilərin də buradan çıxarılması zəruri şərtdir. Çünki bu insanlar Azərbaycana qarşı indiki ekoloji terror siyasətində aktiv iştirak edirlər.
Eyni zamanda, baş verənlər bir daha bu torpaqlara kimin əsl sahibi kimi yanaşdığını göstərir. Əslində, bu xüsusda ermənilərin özlərinin də maraqlı etiraflarına rast gəlmək mümkündür. Məsələn, Ermənistanın Strateji Araşdırmalar Mərkəzinin rəhbəri Alvina Ağababyan bu xüsusda çox maraqlı etiraflar edir. Ağababyan erməni xalqını Qarabağı sevməməkdə ittiham edərək bildirir: “Ermənilər 26 il Qarabağı dağıtdı, amma Bakı 20 ay içində bu dağıntılar üzərində şəhərlər, kommunikasiya, yüksək səviyyəli yollar, körpülər tikə bildi. Bilirsiniz niyə belə oldu? Çünki biz bu torpaqları sevmirik, azərbaycanlılar isə sevir və bunu sübut edir. Şuşada möhtəşəm körpü inşa olunub, ikincisi isə yaxın vaxtlarda tikiləcək. Şuşaya gedən yolda elə bağ salınır ki, onu hətta Kosmosdan da görmək mümkün olacaq. Bütün bunlar 20-21 aya edilib. Biz isə 26 il ərzində Qarabağda yaşayan erməni əhalisi üçün strateji və həyati əhəmiyyətli 80 kilometrlik yolu belə inşa edə bilməmişik”. Əslində, bu qeyd edilənlərin tam həqiqət olması heç kimdə şübhə doğurmur. Hətta bu açıqlamalardan göründüyü kimi, ermənilərin özlərində belə. Bunlar fonunda erməni bloger İşxan Verdyanın açıqlamaları da xüsusi maraq doğurur. O qeyd edir ki, indiki Ermənistan ərazisi də, əslində, Azərbaycana məxsus olub. O buna Ermənistanda Azərbaycanın zəngin mədəni irsi fonunda heç bir şübhənin olmadığını bildirir. Verdyan Ermənistanda zəngin Azərbaycan mədəni-tarixi irsinin olduğunu qeyd edib və XX əsrin sonlarında etnik təmizləmə nəticəsində Ermənistandan qovulmuş azərbaycanlıların hüquqlarına hörmət edilməsinin vacibliyini vurğulayıb. O bildirib ki, Ermənistanda həqiqəti deməyə çalışan insanlar var, lakin onları çılğın hesab edirlər, susdururlar, özlərini dəli kimi göstərməyə çalışırlar: “Mətbuata girməyin heç bir yolu yoxdur. Bütün media bu elitanın nəzarətindədir. Onların hamısı köhnə “Qarabağ klanı”, Robert Köçəryan tərəfindən idarə olunur. Bu “Qarabağ klanı” 20 il ərzində çətirləri ilə bütün Ermənistanı bürüdü və bu ideologiyanı ölkəyə yeridib. Bu gün isə bu, Ermənistanın əleyhinə işləyir”. Lakin əsas olan həm də odur ki, ermənilər arasında artıq həqiqətləri görənlər tapılır. Onların sayının daha sürətlə artacağı isə istisnalıq təşkil etmir.
Samirə SƏFƏROVA
