Azərbaycan müsəlmançılığına İrandan növbəti təfriqəçilik - azərbaycanlı olmaq Hüseynə aid olmaq deməkdir?

İran ayətullahları Azərbaycandan əl çəkmək istəmirlər, hər gün bir yeni iftira, hər gün bir yeni qeyri-real fikirlər açıqlayırlar. Müstəqil, tolerant Azərbaycan onların və qulluq etdikləri rejimin yuxusunu qaçırıb desək, daha doğru olardı. İranın dini rəhbərinin Ərdəbil vilayətindəki nümayəndəsi Ayətullah Həsən Ameli belələrindəndir, hər xütbəsində Azərbaycana qarşı bir iftira atır.

“Azad İran” “Telegram” kanalı xəbər verir ki, bunu İranın dini rəhbərinin Ərdəbil vilayətindəki nümayəndəsi Ayətullah Həsən Ameli cümə namazı xütbələrində deyib:“Şah İsmayıl Səfəvinin məqbərəsindən İmam Hüseyni, onun Əhli-beyti və səhabələrini sevən və əzadarlıq edən bütün dünya azərbaycanlılarına təşəkkür edirəm. Dünya azərbaycanlılarının kimliyi sırf İmam Hüseynə aid olmaqdan ibarətdir”.

Azərbaycan mediasının sözügedən kanala istinadən yazdığına görə, azərbaycanlıları qərəzli şəkildə “azərilər” adlandıran əyalət mollası İranın dünyadakı bütün azərbaycanlılara “hərəkət istiqaməti” müəyyən edəcəyini iddia edib: “Azərilər İmam Hüseyn ilə tanınır və “azəri” dili də mərsiyə dilidir. Sionist rejimlə problemi olmayan hər hansı bir azəri şiəsinin qətiyyən şiə kimliyi yoxdur”.

Bu kimi əsassız iddialar, fikirlər səsləndirən Ameli həmişəki kimi təhdid səsləndirməkdən də çəkinməyib və Azərbaycana qarşı hədyanlar yağdırıb: “İsrailə qarşı öz ölkəsindəki şiələrin nifrətinin ifadəsi ilə mübarizə aparan və uşaq qatili rejimi dəstəkləyən müsəlman dövlətlərinin liderləri yəhudilərin taleyindən dərs almalıdırlar”.

• “Dünya Azərbaycanlılarının hansısa “Azəri” adı altında İmam Hüseynlə tanınmasını iddia etmək cəfəngiyatdan başqa bir şey deyil”

Amelinin yeni anti-Azərbaycan “xütbəsini” və onun səsləndirdiyi cəfəngiyatları şərh edən AMEA-nın Sosiologiya və Fəlsəfə İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli bildi ki, Amelinin cümə namazı xütbəsində azərbaycanlılara yönəlik fikirləri nəinki cəfəngiyat, eyni zamanda ciddi təxribatdır: “Xüsusən də bu təxribat Azərbaycan dövlətinə və qüzey Azərbaycan vətəndaşlarına yönəlib. Təbii ki, bu birbaşa həzrəti Əliyə, həzrəti Hüseynə sevgi bəsləyən inanclı insanlara qarşı yönələn təxribatdır. Ameli bu cəfəng fikirləri ilə ölkəmizdəki inanclı insanları təxribata çəkir. Düzdür, bir tərəfdən Həsən Ameli Şah İsmayıl Səfəvinin və onun tərəfdarlarının düşüncələrini, fikirlərini öz maraqlarına yönəltməyə çalışır. Halbuki, Şah İsmayıl Səfəvi bütün hallarda bir türk övladı idi və türk dövləti qurub. Ancaq Həsən Ameli məhz Səfəviləri də, Şah İsmayılı da, onun qurduğu dövləti də bu və digər şəkildə indiki İranın maraqları ilə uzlaşdırmağa çalışır. Əlbəttə, bütün bunlar təsadüfi deyil. O, açıq-aşkar bizim ölkəmizdəki şiə inanclı insanları İranın ətrafında birləşməyə və bu ölkənin sözü ilə oturub-durmağa səsləyir. Şübhəsiz ki, Amelinin bu çağırışları, fikirləri qətiyyən qəbuledilməzdir. Onun “Azəri” adlandırdığı kəsim indiki İran adlanan ölkədə kiçik  bir qrup ola bilər, amma bütövlükdə azərbaycanlılar, Dünya Azərbaycanlıları Azərbaycan türkləridir. Azərbaycan türkləri olan azərbaycanlılar da qədim xalqdır. Dünya Azərbayanlılarının hansısa “Azəri” adı altında İmam Hüseynlə tanınmasını iddia etmək cəfəngiyatdan başqa bir şey deyil. “Azəri” dili deyilən bir dil yoxdur, Azəbaycan türkcəsi, türk dili var. Bunu hər kəs bilir. Bu mənada onun dilimizi “Azəri dili” adlandırılması da qəbuledilməzdir. Qətiyyən şübhə etmirəm ki, Azərbaycanımızın Güneyində olan soydaşlarımız bu məsələyə ciddi şəkildə reaksiya verəcəklər. Çünki Ayətullah Həsən Ameli bizim milli kimliyimizi və ana dilimizi hədəfə alıb, aşağılamağa çalışıb. Bu qəbuledilən bir hal deyil. Digər tərəfdən də, dilimizi, milli kimliyimizi hədəfə alarkən İsraili də bir bəhanə, vasitə kimi göstərməyə çalışıb. Yəni Ameli iddia edir ki, guya İsraillə əlaqəsi olmayanlar şiə kimliyində qalıblar, İsraillə əlaqəsi olanlar isə şiə kimliyindən uzaqlaşıblar. Bütün bunlar hamısı qondarma, təxribatçı fikirlərdir. Azərbaycanlıların əksəriyyəti, təbii ki, islam dininə tapınır və islam dininə tapınan Dünya Azərbaycanlıları arasında müxtəlif məhzəblərə tapınanlar ola bilər. Amma bunu Həsən Amelinin belə cəfəng şəkildə izah etməsi açıq-aşkar Azərbaycanın dövlətçiliyinə qarşı yönəlib. O, Azərbaycan Respublikasındakı şiə inanclı insanları açıq-aşkar təxribata çəkir, üsyana, itaətsizliyə təşviq edir. Mənə elə gəlir ki, Azərbaycan Respublikası vətəndaşları bu məsələyə çox həssas yanaşmalıdır. Onlar imamlara, yaxud Əhli-Beytə olan sevgisini hər hansısa bir anlamda Həsən Ameli kimilərinin təxribatları ilə uzlaşdırmamalıdırlar, onlardan yan qaçmalıdırlar. Bu çox vacib məsələsidir. Açıq-aşkar İran adlanan ölkənin məmurları, ayətullahları Azərbaycanı hədəfə alıb. Azərbaycan dövləti gücləndikcə, regionda öz gücünü artırdıqca, torpaqlarının bütövlüyünü təmin edib ərazilərinə nəzarət etməyə nail olduğu bir zamanda Amelinin fikirləri təsadüfi hesab edilə bilməz. Bütün bunlar onu göstərir ki, Ameli kimilərinin məqsədi islam dini və şiəlik deyil, məhz Azərbaycan dövlətinin güclənməsi və güneydəki soydaşlarımızın da güclənən Azərbaycanla bir olması fikri İranı çox ciddi şəkildə narahat edir. Onlar burada sadəcə Əhli-Beyt, şiə faktorundan sui-istifadə edirlər və inanclı şəxsləri dövlətimizə, dövlətçiliyimizə qarşı çıxmağa səsləyirlər”.

F.Ələkbərli hesab edir ki, ölkəmizdəki şiə inanclı insanlar öz dövlətçiliyinə sadiq qalacaq və Ameli kimilərinin təxribatlarına uymayacaqlar və uymamalıdırlar da: "Çünki Dünya Azərbaycanlılarının bir dövləti var, o da Azərbaycan Respublikasıdır. Bizim dilimiz Azərbaycan türkcəsidir, Azərbaycan dilidir, onun çox böyük və zəngin tarixi var. Bizim milli kimliyimiz də, dilimizin adı da, tarixi də məlumdur. Milli kimliyimizə, dilimizə, ideologiyamıza bu cr böhtanlar artıb, təxribatlar törədən Ameili kimiləri heç nəyə nail ola bilməyəcəklər. Azərbaycan daha da güclənəcək, öz gücünü, qüdrətini ortaya qoyub və yenə də qoyacaqdır. Bu cür təxribatlar güclənən Azərbaycanın qarşısını ala bilməz. Hər halda o ayatullahlar bu kimi bəyanatlar, qondarma fikirlər irəli sürməkdənsə Ermənistanla münasibətlərə fikir bildirməlidirlər. Necə ola bilər ki, rəsmi Tehran Ermənistanla yüksək münasibətlər qurur, hər cür iş birliyinə gedir? Bu zaman nə üçün o ayətullahların səsi çıxmır? Bunlar onu göstərir ki, bu ayətullahlar nə islam dini, nə də şiəlik məsələsində səmimidir. Məqsədləri yalnız güclənən Azərbaycana zərbə vurmaqdır, hansısa təxribatlara rəvac verməkdir. Bütün bunlar uğursuz olacaq. Artıq güclənən bir Azərbaycan var. Türkiyə ilə müttəfiqlik sayəsində nəinki regionda, eləcə də dünyada da öz sözünü deyə biləcək güclü bir birlik var. Bu birliyin, güclənən Azərbaycanın qarşısında da İran və onun uzantıları heç bir şey edə bilməyəcək, Böyük Azərbaycan dövləti də qurulacaq”.

İradə SARIYEVA