Deputatların "vurulması" - Tahir Kərimlinin izahına mediadan reaksiyalar...

Azər Həsrət: “Deputatlar da yaxşı işlər görsün ki, onların mediadakı təqdimatı da müsbət aspektdən olsun”

img

Milli Məclisin deputatı Tahir Kərimli millət vəkillərinin tənqid hədəfi olmasının maraqlı səbəbini izah edib. Onun sözlərinə görə, bu bəzi agentliklərin, saytların icra strukturlarında olan imkanlı şəxslərin əlində olmasından qaynaqlanır: “Onlar özlərindən zərbəni yayındırmaq üçün deputatlardan qalxan kimi istifadə edirlər. Ancaq bu heç kimə icazə vermir ki, istər deputat, istərsə başqa şəxslər haqqında yalan xəbərlər, şər-böhtan yaysın…”

Tahir Kərimlinin sözlərinə görə, insanlar fikirləşirlər ki, deputat seçicilərin adından olan təmsilçidirsə və xalq onu seçibsə, deməli, onu tənqid və hər şey tələb etmək hüquqları var: “Ancaq düşünmürlər ki, bəzi məsələlər deputatın səlahiyyətindədir, ya yox. Bəzən deputat müəyyən məsələləri yerinə yetirə bilmir. Buna ya onun səlahiyyəti imkan vermir, ya da gücü çatmır. Hətta icra orqanları da bəzən deputatın sorğularına cavab vermir, telefonlarını belə götürmürlər və saymazlıq edirlər. Bəzən icra strukturunun rəhbəri minlərlə, onminlərlə insana rəhbərlik etdiyini düşünür. O, milyonlarla pulun dövriyyəsinə nəzarət edir və müəyyən şəkildə saymazlıq göstərir. Təəssüf ki, bu halda vətəndaşlar icra orqanının nümayəndəsini, o işi görməyə məsul olan şəxsləri deyil, deputatları hədəf seçirlər”.

Bəzi məsələlərdə Tahir Kərimli ilə razılaşmamaq olar. Azərbaycanda heç də bütün millət vəkilləri medianın qınağına tuş gəlmir. Bir də ki, medianın qınağına tuş gəlmək deputat üçün ayıb olmamalıdır. Hər halda, millət vəkili nə danışdığına diqqət etsə, tənqid hədəfindən də uzaq olar. Deputatların tənqid edilməsinin bir günahını da media ilə əlaqələndirmək nə dərəcədə doğrudur?

Media eksperti, əməkdar jurnalist Azər Həsrət “Bakı-Xəbər”ə açıqlamasında bildirdi ki, əslinə qalanda, deputat daima diqqət mərkəzində olan bir siyasi xadim sayılır: “Təbiidir ki, belə adamlarla bağlı cəmiyyətdə müzakirələr getməlidir. Tahir bəy deyir ki, bəzi icra qurumlarının rəhbərləri deputatları önə verib, özləri də onların arxasında gizlənilər. Bu məsələdə həqiqət payı var. Xüsusən də  rayon yerlərindəki icra başçıları ölkə mediasının diqqətindən zatən kənarda qalır. Özlərini pərdələmək üçün deputatların adının hallanmasında maraqlı olan icra başçıları kifayət qədərdir. Ümumilikdə isə deputatlarla bağlı müzakirələrin aparılması çox normaldır. Deputat daim cəmiyyətin gözü önündə olmalıdır. Hadisələrə operativ reaksiya verməlidir. Düzdür, parlamentin bəlkə də 70 faizi bu tərzdə çalışmır. Dediyim hadisələrə hər hansı reaksiyaları olmur. Çoxunun adını bilmirik. Yalnız mənfi məsələlərdə adları hallananda onları tanıya bilirik. O deputat narahat olsun ki, onun barəsində müzakirə aparılmır. Barəsində müzakirə aparılan deputatlar əslində bundan narahat olmamalıdır. Tahir Kərimlinin özü də daima diqqət mərkəzində olan, hadisələrə reaksiya verən millət vəkillərindəndir. Bu məsələdə medianın heç bir günahı yoxdur. Media cəmiyyətdə baş verən yaxşı və pis hadisələri ictimailəşdirməlidir. Deputatlar da yaxşı işlər görsün ki,  onların mediadakı təqdimatı da  müsbət aspektdən olsun. Medianı bu məsələdə qınayanlar özlərinin əksi düşən güzgünü sındırmaq istəyirlər”.

Məhəmmədəli QƏRİBLİ

Peşə etikası

Son xəbərlər