İlqar Hüseynli: “Müraciətin əsas hədəfi vətəndaş cəmiyyəti olaraq kənarda hüququ pozulan şəxsləri müdafiə etməkdir”
Son günlər ərzində bir neçə Ermənistan vətəndaşı Prezident İlham Əliyevə müraciət edərək Azərbaycan vətəndaşlığını qəbul etmək istədiyini bildirib. Onlar sosial şəbəkələrdə videomüraciət yayaraq, hətta Ermənistan pasportlarından imtina etdiklərini də açıqlayıblar. Onların bu qərarı Ermənistan tərəfindən xoş qarşılanmayıb. Məlumatlara görə, Ermənistan rəhbərliyi həmin şəxslərə təzyiq göstərir.
Azərbaycan vətəndaşlığı almaq üçün müraciət edən və Ermənistan Baş prokururluğu tərəfindən təqibə məruz qalan şəxslərlə bağlı Azərbaycanda fəaliyyət göstərən insan hüquqları müdafiəsi ilə məşğul olan QHT-lər beynəlxalq hüquq müdafiə təşkilatlarına müraciət edib.
Müraciətdə deyilir ki, Azərbaycanda insan hüquqları müdafiəsi ilə məşğul olan QHT-lər böyük narahatlıq hissi ilə bildirir ki, Azərbaycan vətəndaşlığı almaq üçün Prezident İlham Əliyevə müraciət etdiklərinə görə İşxan Verdiyan və Vahe Qəmbəryana qarşı Ermənistan Respublikasının Baş Prokururluğu tərəfindən cinayət işi açılıb: “Əfsuslar olsun ki, bu kimi addımlarla Ermənistan rəhbərliyi Azərbaycan vətəndaşı kimi qanuni əsaslarla Xankəndidə, eləcə də qonşu şəhər və kəndlərdə yaşamaq istəyən Ermənistan vətəndaşlarını qorxutmaq niyyəti güdürlər. Eyni zamanda rəsmi Yerevan Qarabağda yaşayan əhali arasında Azərbaycanla və azərbaycanlılarla sülh şəraitində yaşamağın zəruriliyini bəyan edən vətəndaşları “təxribatçı fəaliyyətlər” zəminində günahlandırırlar”.
Qeyd edək ki, 25 QHT təmsilçisi adıçəkilən müraciəti imzalayıb.
- “…beynəlxalq hüquq normalarına ziddir”
Müraciəti imzalayan “Sosial-strateji tədqiqatlar və analitik araşdırmalar" İctimai Birliyinin sədri İlqar Hüseynli “Bakı-Xəbər”ə açıqlamasında qeyd etdi ki, Azərbaycandan vətəndaşlıq istəyən ermənilərə həmin ölkədə cinayət işi açılıb: “Məlumdur ki, İşxan Verdiyan hər zaman Azərbaycanın haqlı mövqeyini dilə gətirib, dəstəyini nümayiş etdirib. Söhbət onun milliyətcə erməni olmasında getmir, beynəlxalq hüquq normalarına sadiq münasibətindən gedir. Bu səbəbdən də Azərbaycanda hüquq sahəsi ilə məşğul olan QHT-lər beynəlxalq təşkilatlara müraciət ünvanlayıb. Müraciətin əsas hədəfi Azərbaycan vətəndaş cəmiyyətinin Azərbaycandan kənarda hüququ pozulan şəxsləri müdafiə etməkdir. Biz digər xalqların müstəqil, azad yaşamasının əleyhinə deyilik. Azərbaycan monotərkibli milliyyətçi dövlət deyil, tolerant və etnik qrupların ölkədə yaşamasını tamamilə beynəlxalq hüquq prinsipləri çərçivəsində müdafiə edirik”.
Həmsöhbətimiz onu da əlavə etdi ki, Azərbaycan vətəndaşlığını qəbul etmək istəyən şəxslərə Ermənistan prokurorluğu tərəfindən cinayət işi açılması beynəlxalq hüquq normalarına ziddir.
Günel CƏLİLOVA
