Ermənisanda, dünyanın müxtəlif bölgələrinə səpələnmiş erməni diasporu arasında “Qarabağ klanı”ndan ciddi narazılıq yarandığı müşahidə edilir. Əslində, bu klandan narazılıq həmişə olub.
Sadəcə, onlar uzun müddət hakimiyyətdə olduqlarından, narazılıqları müxtəlif yollarla, o cümlədən güc vasitəsilə neytrallaşdıra biliblər. Amma devrildikdən və erməni cəmiyyətini yeni fəlakətlərə sürükləmk istədiklərindən onlardan narazılıq daha açıq formada özünü büruzə verir.
Qeyd edilənlərin faktiki təsdiqinə erməni dilində yayımlanan “Kinolenta 24” internet televiziyasının bu xüsusda hazırladığı verilişdə də rastgəlmək olar. Qeyd edək ki, telekanalın yaradıcısı Roman Bağdasaryandır. Onun təşkil etdiyi telekörpünün iştirakçılarından biri, İrəvan sakini Meri adlı qadın bildirir ki, “Qarabağ klanı”nın dediklərinin əksinə olaraq, ermənilərin Qarabağdan imtina etməsi vacibdir: “Bu gün söhbət Ermənistanın taleyindən gedirsə, yüz Qarabağ da olsa, ondan imtina etməliyik. Onsuz da Qarabağın taleyi həll olunub və Azərbaycan öz məqsədinə addım-addım yaxınlaşır. Qarabağ ətrafında gedən rəsmi erməni təbliğatı ilə razılaşmadığını bildirən Meri öz arqumentlərini bu cür əsaslandırır: “34 ildir “Qarabağ bizimdir” deyənlərə mənim bir cavabım olub. Danışanda “dünya da bizimdir” deyirsiniz, lakin bir həqiqətlə razılaşmaq istəmirsiniz ki, hüquqi cəhətdən sənin olmayan nəyəsə sahiblənmək istəyinizi dünya qəbul edə bilməz”. Meri qeyd edib ki, “özünün olmayan torpaqlara görə kifayət qədər qurbanlar vermiş” Ermənistan dövlətinin taleyinə duyğusal yanaşmaq gələcək qarşısında ən böyük və bağışlanılmaz səhv olar”. Telekörpünün digər iştirakçısı, niderlandlı Nune adlı erməni də eyni mövqeni bölüşür. Telekanalın yaradıcısı Roman Bağdasaryan özü isə Laçın, Zabux və Sus ətrafında aparılan söhbətin düzgün təqdim olunmadığını etiraf edərək deyib: “Həmin məsələ 10 noyabr bəyanatına xüsusi bənd kimi salınıb və Azərbaycan öz üzərinə düşən öhdəliyi yerinə yetirsə də, Ermənistan hələ işə başlamayıb. Bu, Azərbaycan tərəfinin hüququdur ki, ona aid ərazidə məskunlaşdırılan ailələrin köçürülməsini tələb etsin”. Vaxtilə Laçın və işğal altındakı digər yaşayış məntəqələrinin məskunlaşdırılmasının Ermənistandakı Qarabağ klanının varlanmaq istəyindən irəli gəldiyini deyən Bağdasaryan bu prosesin zərurətdən deyil, çirkli pulları yumaq üçün “ən yaxşı vasitə” olduğunu xatırladıb: “Məlum faktdır ki, cinayətkar ailənin, demək olar bütün simaları, xüsusən də onun ən görkəmli nümayəndələri Robert Köçəryan və Serj Sarkisyan namus və vicdanı olmayan oğru və fırıldaqçılardır. Azərbaycanın işğal olunmuş ərazilərini talamaqla sərvət toplayaraq Ermənistanı və erməni ordusunu da soyublar”.
Onun sözlərinə görə, 1988-ci ildən 2020-ci ilə qədər bütün ermənilər Qarabağ mafiyasının girovuna çevrilib və bu mafiya onlara qarşı çıxan yüzlərlə məmur və iş adamlarını sıradan çıxarıb: “1988-ci ildən biz mütəşəkkil cinayətkarlığın girovuna, Qarabağın şikəst gənclərinin şahidinə çevrilmişik: heç kim tarix öyrətmir, durmadan bir-birini öldürür, büdcə pullarını oğurlayır, hamını söyür. Orduda bir çox oğlanları narkoman edən, onları buna öyrədən “Qarabağ klanı” idi. 34 ildir ki, bütün xalq oğullarını göndərib və “sağ ol” əvəzinə bu adamlardan həmişə lənətlər eşidib. Ölkənin bütün qızıllarını, təbii sərvətlərini və xoşbəxtliyimizi oğurladılar. Xalq 34 ildir ki, Qarabağ mafiyasından yaxşı heç nə görməyib: yalnız kədər və satanizm. Düzünü desək, bu bütün yaxşı və layiqli insanların öldürüldüyü qara zonadır. Bu lənətdir və Qarabağ mafiyası heç vaxt bizi xoşbəxt olmağa qoymaz”. Bağdasaryan qeyd edib ki, Köçəryan və Sarkisyan Ermənistanda şayiələr yayıb, onların hakimiyyətə gəlməsinə mane olanları öldürüb, günahsız insanları Şuşa həbsxanasına salıb, Azərbaycan torpaqlarından qızıl oğurlayıb, erməni diasporu və “Hayastan” fondundan pulları mənimsəyib: “34 il oğurlanmış pullarla Qarabağda saraylar tikdilər, əsgərləri məsxərəyə qoydular, ordunu, yemək-yanacağa qədər, qarət etdilər, Ermənistanın ən yaxşı obyektlərini, dünyanın hər yerindəki səfirlik və konsulluqları ələ keçirdilər, parlamentin edamını səhnələşdirdilər. İrəvan küçəsindəki repressiyaları və qırğınları xatırlayın, narkotik satdılar, narkotik alverçilərini qorudular”.
Bu yanaşma erməni cəmiyyətində böyük əksəriyyətin mövqeyini ifadə edir. Bu da onu göstərir ki, təkcə Ermənistanda yox, erməni diasporu arasında da “Qarabağ klanı”na nifrət artır, öz ərazi bütövlüyünü təmin etmiş Azərbaycanın haqq işini başa düşənlərin sayı çoxalır. Bu halda “Qarabağ klanı” daha çox nifrət və tənqid hədəfinə çevrilir. Elə müxalifətin aparıcı qüvvəsi də “Qarabağ klanı”nın liderləri olduğundan, Ermənistan cəmiyyətində onlara etimad göstərilmir. Əksinə, onları Ermənistanın və ermənilərin üzləşdiyi bütün bəla və faciələrin əsas səbəbkarı kimi görürlər. Erməni ictimaiyyəti Azərbaycanın gücünü və qüdrətini 44 günlük müharibədə, sonuncu “Qisas” əməliyyatında görüb. İnsanlar növbəti fəlakəti yaşamaq istəmirlər. Bunu təkcə sadə xalq deyil, bir çox siyasi qüvvələr də dərk edir və bu səbəbdən də Qarabağdan, “Qarabağ klanı”ndan imtina prosesi sürətlənir.
Samirə SƏFƏROVA
