Laçından çıxan erməni ailələr, onlara edilən xəbərdarlığa baxmayaraq, evləri yandırır. Bu barədə sosial şəbəkələrdə məlumat yayılıb.
Belə ki, işğaldan sonra Laçın rayonunun Zabux kəndinə yerləşdirilən erməni ailələrdən biri evini yandırıb. O bu əməlini videoya çəkib.
Qeyd edək ki, bundan əvvəl ermənilərin Laçında meşə sahəsinə də od vurması haqqında görüntülər paylaşılıb. Onu da deyək ki, Zabuxda yaşayan ermənilərə kənddən çıxmaları üçün cari ayın sonunadək vaxt verilib.
Ermənistan mediasında dərc edilən məqalədə qeyd edilir ki, hazırda Laçındakı üç icmada (Laçın şəhəri, Zabux və Sus kəndləri) ümumilikdə 100-ə yaxın ailə, 350 nəfər yaşayır. Adıçəkilən icmaların əhalisinin yalnız 10-15 faizi Qarabağda məskunlaşmaq arzusundadır, əksəriyyət Ermənistana köçmək istədiyini deyib.
Qəzet yazır ki, Laçın şəhəri, Zabux və Sus kəndlərindəki ermənilərin təxliyəsi Azərbaycan tərəfinin tələbi deyil, rəsmi Bakı həmin 350-yə yaxın erməninin sözügedən ərazilərdə yaşamağa davam etməsini qəbul etməyə hazırdır:
“Amma bir şərtlə ki, onlar Azərbaycan vətəndaşı olmağı qəbul edirlər və Azərbaycan qanunlarına uyğun yaşasınlar”.
Nəşr bildirib ki, Laçındakı ermənilər Azərbaycan vətəndaşlığını qəbul etməyə razılaşarsa, Xankəndidəki separatçı rejim və Ermənistan hakimiyyəti onların həyatı və təhlükəsizliyi üçün heç bir məsuliyyət daşımayacaq. Ancaq Azərbaycan vətəndaşlığını qəbul etməyə razılaşmayan ermənilər köçməyə üstünlük veriblər və artıq əşyalarını yığırlar. Ermənilər əmlakın mümkün qədər çox hissəsini köçürmək niyyətindədir. Hətta bəziləri yeni yaşayış yerlərində həyata sıfırdan başlamamaq üçün qəbirlərdən məzar daşlarını da götürür, imkan daxilində evlərini sökürlər. Ermənilərin başladıqları yeni vandallıq mərhələsi ilə bağlı hansı addımlar atılmalıdır?
Politoloq Əhəd Məmmədli “Bakı-Xəbər”ə açıqlamasında bildirdi ki, ermənilərdə bir antitürk adlanan milli kod var: “Bu hər zaman olub, gələcəkdə də olacaq. Onlar bələkdən qəbir evinə kimi bu tərbiyəni alırlar. Laçında heç vaxt erməni yaşamayıb. 30 il bundan əvvəl Livan və digər yerlərdən gətirib oralara yerləşdiriblər. Azərbaycan öz təbliğat resursları vasitəsilə bunu bütün dünyaya nümayiş etdirməlidir. Ermənilərin bu hərəkətindən diplomatik müstəvidə onlara qarşı istifadə edilməlidir. Xüsusilə də bizə Qərbdə ağıl öyrətməyə çalışanlara bu mənzərəni nümayiş etdirməliyik. Azərbaycan talançılıqla bağlı məsələləri faktlaşdırıb Rusiya Müdafiə Nazirliyinə, sülhməramlıların komandanlığına verməli və bunun qarşısının alınmasını təmin etməlidir.
Azərbaycan torpaqları yağmalanır. Azərbaycan tərəfi müraciət etdikdən sonra nəticə görməsə, dərhal müdaxilə etməlidir, antiterror əməliyyatı aparmalıdır. Zənnimcə, qəti hərəkətlərin vaxtı çatıb. Ermənilər deyirdi ki, Laçını türklərə verməyəcəklər. İndi görürlər ki, boşboğazlıq ediblər. Azərbaycan tərəfi onların boşboğazlığına yox, hazırkı talançılıqlarına müdaxilə etməlidir. Bu davam edərsə, pis nəticələrə səbəb olar. Ermənilər başa düşməlidir ki, belə üsullarla nəyəsə nail ola bilməyəcəklər. Eyni addımı rayonları təhvil verəndə də atmışdılar. Nəticə oldumu? Ermənilərin özlərinin bu yöndə paylaşdığı videolardan onların ifşası üçün təbliğat kimi istifadə etməliyik. Qoy onlara status tələb edənlər həmin millətin əsl xisləti ilə tanış olsunlar”.
Məhəmmədəli QƏRİBLİ
