Laçınlıların qayıdışının yüksək səviyyədə təşkilinə dövlət qərarı verildi…

Mahir Abbaszadə: “Laçınlılar öz ata-baba yurdlarına əbədi qayıdacaqları günü səbrsizliklə gözləyir”

img

“Biz Laçına qayıtmalıyıq, Zabuxa, Susa qayıtmalıyıq. Mən artıq Dövlət QAÇQINKOM-a göstəriş verdim, Laçın şəhərinin, Sus, Zabux kəndlərinin camaatı ilə əlaqə saxlasınlar. Biz yaxın zamanlarda onları öz doğma yerlərinə qaytaracağıq". Bunu Prezident İlham Əliyev avqustun 12-də Basqal qəsəbəsində Azərbaycan Televiziyasına müsahibəsində bildirib.

Prezident İlham Əliyevin məlum göstərişindən sonra Laçına qayıdışla bağlı tədbirlər görülür. Tezliklə, Zəngilan rayonunun Ağalı kəndinə olduğu kimi, Laçının Zabux kəndinə də köç başlayacaq.

Qaçqınların və Məcburi Köçkünlərin İşləri üzrə Dövlət Komitəsində işğaldan azad edilmiş Laçın şəhərinə və rayonun Zabux, Sus kəndlərinə yerli sakinlərin qayıdışının təşkili ilə əlaqədar Prezident İlham Əliyevin verdiyi tapşırıqların icrası vəziyyətinə həsr olunmuş müşavirə keçirilib.

  • “Yaxın zamanlarda Laçın şəhəri, Sus, Zabux kəndlərində fəaliyyət göstərən Rusiya sülhməramlı kontingentinin postları köhnə yoldan yeni yola keçiriləcək”

Laçını təmsil edən deputat Mahir Abbaszadə bildirdi ki, dövlət başçısının mətbuata verdiyi məlumatdan da görünür ki, yaxın zamanlarda Laçın şəhəri, Sus, Zabux kəndlərində fəaliyyət göstərən Rusiya sülhməramlı kontingentinin postları köhnə yoldan yeni yola keçiriləcək. Belə olduğu təqdirdə isə Laçın şəhəri, Sus, Zabux kəndləri yenidən Azərbaycanın nəzarətinə keçəcək: “Məlumdur ki, işğal dövründə həmin ərazilərdə Ermənistan tərəfindən qanunsuz məskunlaşma həyata keçirilib. Laçın şəhəri, Zabux və Sus kəndlərinə Suriyadan, Livandan gətirilmiş ermənilər qanunsuz olaraq yerləşdirilib. Ermənistan tərəfinin bu addımı beynəlxalq hüquq normalarına və müvafiq konvensiyalara ziddir. İndi onlar Azərbaycanın həmin ərazilərini tərk etməlidir. Ermənistan tərəfi bunu da gecikdirməyə çalışırdı. Lakin Azərbaycanın qəti mövqeyi bir daha göstərir ki, biz qarşımıza qoyduğumuz bütün məqsədlərə zaman-zaman nail oluruq".

Millət vəkili onu da vurğuladı ki, laçınlılar öz ata-baba yurdlarına əbədi qayıdacaqları günü səbrsizliklə gözləyir: “Prezident İlham Əliyevin "Biz Laçına qayıtmalıyıq, Zabuxa, Susa qayıtmalıyıq. Mən Dövlət “qaçqınkom”a göstəriş verdim, Laçın şəhərinin, Sus, Zabux kəndlərinin camaatı ilə əlaqə saxlasınlar və biz onları yaxın zamanlarda öz doğma yerlərinə qaytaracağıq" sözləri laçınlılar üçün böyük sevincdir. Biz xoşbəxtik ki, dövlət başçımız belə bir gözəl, əhəmiyyətli xəbəri verdi. Azərbaycanın bugünkü günləri ölkəmizin gələcək inkişafından xəbər verir. Əminliklə deyə bilərəm ki, Prezident İlham Əliyevin uzaqgörən siyasəti, Birinci vitse-prezident Mehriban Əliyevanın diqqət və qayğısı nəticəsində keçmiş məcburi köçkünlər yaxın vaxtlarda öz ata-baba yurdlarına əbədi qayıdacaqlar və orada yaşayıb-yaradacaqlar".

Günel CƏLİLOVA

Peşə etikası

Son xəbərlər