Elşən Həsənov: “Bu insanların Azərbaycanda yaşamaq hüququ sıfıra bərabərdir”
Laçının Zabux icmasının rəhbəri Andranik Çavuşyan Ermənistan mətbuatına deyib ki, 54 ailədən yalnız 7-si Qarabağda qalacaq. O bildirib ki, kənddə köçürmə ilə bağlı işlər gedir:
“Sakinlər hələ də kəndi tərk etməyiblər. Hazırda məktəb binasını boşaldırıq. Kənddə 200-dən çox sakin, 54 ailə yaşayır. 54 ailədən yalnız 7-si Qarabağda qalacaq, qalanları isə Ermənistana və müxtəlif yerlərə köçəcək. Qarabağda qalmaq istəyən 7 ailə, yəqin ki, ev tikmək məsələsi həll olunana qədər müvəqqəti olaraq hoteldə məskunlaşacaq. Mən özüm Xankəndidə yaşayacağam. Xanumyan evləri yandırmamağa çağırıb, amma kompensasiyadan söhbət getməyib. Dəqiq xatırlamıram, amma dediklərinə görə, yəqin ki, belə olub”. Daha sonra müxbirin azərbaycanlıların ermənilərin evlərində yaşayıb-yaşamayacaqları ilə bağlı verdiyi suala Çavuşyanın cavabı belə olub:
“Bəli, onlar heç vaxt ermənilərin evində yaşamayacaqlar. İndi Şuşada azərbaycanlı yoxdur, dəqiq deyə bilmərəm, amma mənə elə gəlir ki, onlar ermənilərin evində yaşamayacaqlar. Biz həmişə qurmuşuq, yaratmışıq, yıxmağı sevdiyimizi demək olmaz, sadəcə, bizi şərait məcbur edir. Burada problem binanın qiymətində deyil. Artıq insanlar hazırlaşır, əşyalarını yığırlar. Biz hər şeyi qaydasında edirik”.
Göründüyü kimi, Laçına sonradan yerləşdirilən 7 ailənin Qarabağı tərk etməyəcəyini ermənilər rəsmən təsdiqləyir. Onların Qarabağda saxlanılması nə dərəcədə doğrudur?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, hər hansı bir dövlətin ərazisində məskunlaşıb, başqa dövlətin vətəndaşlığını daşımaq mümkünsüzdür: “Ermənilər bizim ərazilərimizdə yaşamaq istəyirlərsə, vətəndaşlığımızı qəbul etməlidirlər. Bəzi ölkələrdə ikili vətəndaşlıq olsa da, ölkəmizdə bu qayda yoxdur və Azərbaycan qanunlarına tabe olmaq mütləqdir. Azərbaycan qanunvericiliyində əsas vətəndaşlıq anlayışı var və hər kəs fəaliyyət göstərdiyi, yaşadığı dövlətin vətəndaşlığını qəbul etməlidir. O torpaqlar hansı dövlətə məxsusdursa, təbii ki, orada yaşayanlar həmin dövlətin vətəndaşlığını daşıyacaqlar. Qarabağ ərazisində yaşamaq istəyən mülki ermənilər Ermənistanın işğalı başlayana qədər orada yaşayıblarsa, onlar və ailə üzvləri qalmaq istəsələr, qalacaqlar. Lakin Azərbaycan qanunları çərçivəsində, Azərbaycan qanunlarına hörmətlə yanaşaraq bunu qəbul etməlidirlər. Kim bunu qəbul etməsə, təbii, bizim səlahiyyətimiz var ki, həmin şəxsləri Azərbaycandan deport edək. İşğaldan sonra torpaqlarımıza qanunsuz məskunlaşma ilə Ermənistandan, Rusiyadan, Suriyadan və dünyanın başqa dövlətlərindən erməni millətinə aid olan şəxslər gətirilib, yerləşdirilib. Bu insanların Azərbaycanda yaşamaq hüququ sıfıra bərabərdir. Çünki onlar qanunsuz şəkildə gəliblər. Buna görə arxivə baxılacaq və arxiv sənədləri əsasında tutuşdurmalar olacaq. İndiki durumda əsas istəyimiz, arzumuz budur ki, Ermənistan ordusu və digər qanunsuz birləşmələr torpaqlarımızdan tamamilə çıxıb getsin. Mülki əhali silahsız vəziyyətdə öz evində qalsın. Mülki əhali Ermənistana getmək istəyirsə, biz sərhəd-keçid məntəqələrindən başqa dövlətlərə necə gediriksə, o qaydada keçəcək. Biz tələb etmirik ki, ermənilərin Ermənistanla əlaqəsi mütləq kəsilsin. Ancaq Laçına sonradan gətirilən bütün ailələr Azərbaycan ərazisini tərk etməlidir. Çünki onlar kənardan ora köçürülüblər”.
Məhəmmədəli QƏRİBLİ
