Moskva Paşinyanın sülhməranlıları tənqid etməsinə reaksiya verdi...

Daşdəmir Əliyev: “Onlar sülhməramlılardan cinayətkar fəaliyyətlərinin himayə edilməsini istəyirlər”

img

Rusiya Xarici İşlər Nazirliyi Ermənistanın Baş naziri Nikol Paşinyanın Azərbaycan ərazisində müvəqqəti yerləşdirilən Rusiya sülhməramlı kontingentinin fəaliyyəti barədə iddialarına münasibət bildirib.

Rusiya XİN Departamentinin direktor müavini İvan Neçayev brifinq zamanı deyib ki, Laçın dəhlizi ətrafında yaranmış vəziyyət üçtərəfli bəyanatın 6-cı bəndi əsasında həll edilməlidir:

"Üçtərəfli bəyanatın 6-cı bəndində qeyd olunur ki, tərəflərin razılığı ilə yaxın üç ildə Laçın dəhlizi ilə Qarabağ və Ermənistan arasında əlaqəni təmin edən yeni nəqliyyat marşrutunun tikintisi planı və sonradan rusiyalı sülhməramlı kontingentin yolun mühafizəsi üçün yenidən dislokasiya ediləcəyi yeni marşrut xəttinin çəkilməsi nəzərdə tutulub".

Onun sözlərinə görə, regiondakı vəziyyət Rusiyanın diqqət mərkəzindədir. Neçayev xatırladıb ki, avqustun 4-də Rusiya Xarici İşlər Nazirliyi bölgədə vəziyyətin gərginləşməsi ilə bağlı bəyanat yayıb və hər iki ölkəni təmkinli olmağa və atəşkəs rejiminə riayət etməyə çağırıb.

Rusiya XİN-in nümayəndəsi əlavə edib ki, Rusiya bütün məsələlərin Rusiya, Azərbaycan və Ermənistan liderlərinin 9 noyabr 2020-ci il, 11 yanvar və 26 noyabr 2021-ci il tarixli bəyanatlarına uyğun olaraq həll edilməsinin zəruriliyini bir daha təsdiqləyir.

İvan Neçayev deyib ki, Rusiya tərəfi regionda sülhməramlı kontingentə qarşı tənqidi bəyanatları əsassız hesab edir:`

"İntensiv siyasi təmaslarla yanaşı, Rusiya sülhməramlıları tərəfindən fəal iş davam etdirilir, onlar yerlərdə vəziyyətin sabitləşməsi üçün lazımi səylər göstərirlər. Həm Bakı, həm də Yerevan Rusiya sülhməramlı kontingentinin mühüm rolunu dəfələrlə qeyd ediblər. Biz Rusiya sülhməramlıları ilə bağlı ayrı-ayrı tənqidləri əsassız hesab edirik".

Doğrudanmı,  Moskva “sülhməramlıları tənqid etmək olmaz” iradında haqlıdır?

Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, sülhməramlıların fəaliyyəti daha çox bizi qane etməyib: “ İmzalanan üçtərəfli  bıyanatdan bir qədər sonra Azərbaycan tərəfi həm rəsmi, həm də ictimaiyyət səviyyəsində sülhməralıların fəaliyyətinin qənaətbəxş olmadığını daim tənqid edib.  Çox maraqlıdır ki, artıq Paşinyan da onların ünvanına tənqidlər səsləndirməyə başlayıb.  N.Paşinyanın sözlərinə görə, Qarabağdakı hadisələr, o cümlədən son günlər baş verənlər Rusiya sülhməramlılarının regiondakı fəaliyyəti ilə bağlı “suallar yaradır”. O hesab edir ki, bu hadisələr Rusiya sülhməramlılarının iştirakı və razılığı ilə  baş verib. Görünür,  Azərbaycan tərəfinin öz ərazisində apardığı antiterror əməliyyatları Ermənistan rəhbərliyini ciddi narahat edib. Onlar sülhməramlılardan cinayətkar fəaliyyətlərinin himayə edilməsini istəyirlər.

Ermənistanın 10 noyabr üçtərəfli sazişinə zidd olan bütün qanunsuz fəaliyyətinin qarşısını almaq üçün Azərbaycan Silahlı Qüvvələrinin bölmələri tədbir görmək səlahiyyətinə malikdir.

Uzun müddətdir ki,  Rusiya sülhməramlıları Ermənistan silahlı qüvvələrinin qanunsuz fəaliyyətini və aparılan işləri dayandırmaq əvəzinə, erməni quldur dəstələrinin təhlükəsizliyini təmin edib. Tərəfimizdən Qarabağda Rusiya sülhməramlılarının məsuliyyət zonasında icazəsiz silah daşınması cəhdinin qarşısı alınıb.

Xatırladaq ki, Prezident İlham Əliyev  müşavirələrdən birində  Rusiyanın Ermənistan ordusunun bölmələrini beynəlxalq səviyyədə tanınmış Azərbaycan ərazisindən çıxarmağı öhdəsinə götürdüyünü, lakin sonradan üzərinə düşən öhdəliyi pozduğunu bildirmişdi. Bu baxımdan da,  sülhməramlıların fəaliyyətini tənqid etmək haqqına biz sahibik, ermənilər yox. Çünki biz onlardan üzərlərinə götürdükləri qanuni öhdəliklərin yerinə yetirilməsini tələb edirik. Ermənistan rəhbərliyi  isə bu yöndə olan tənqidi özlərinin cinayətlərini ört-basdır etmək üçün edir. Bu da haqlı sayıla bilməz”.

Məhəmmədəli QƏRİBLİ

Peşə etikası

Son xəbərlər