Ermənistanın birinci xarici işlər naziri, "İrs" Partiyasının lideri Raffi Ovannisyan Respublika meydanında jurnalistlərlə söhbətində deyib ki, əgər Laçın və Zabux avqustun 25-də Azərbaycana verilsə, o zaman "Arsax" (Qarabağdakı qondarma rejim) və Xankəndi mühasirəyə düşəcək:
"Bir neçə gün əvvəl gördük ki, Təhlükəsizlik Şurasının katibi və Xarici işlər naziri Laçının təslim olması ilə bağlı heç bir planı qəbul etmədiklərini açıqlayıb. Bu, rəsmi İrəvanın fikri idi. Və bu bəyanatdan bir neçə gün sonra bir nəfər (Paşinyan nəzərdə tutulur) qərar verdi ki, üçtərəfli bəyanatda belə qeyd olunmayan torpaqlar, Laçın dəhlizində olan bütün yaşayış məntəqələri Azərbaycana qaytarılır, həmin əraziləri mütləq təhvil vermək lazımdır. İndi "planka"nın aşağı salınmasının nə demək olduğu artıq aydındır".
Onun sözlərinə görə, ərazilər erməni xalqının fikri alınmadan qanunsuz olaraq verilir:
"Nikol Paşinyan vətən xainidir. O, ərazi bütövlüyünü, suverenliyini, vətəndaşların həyatını və təhlükəsizliyini təmin etmək üçün konstitusiya andını pozub. Əvvəllər ona açdığımız həyat yolunu indi də öz əlimizlə bağlayacağıq. Qurbanlarımız olacaq və bu qurbanların günahkarı vətəndaş Paşinyan olacaq".
Ermənistandakı radikal dairələrin keçirdikləri bu isterika nə dərəcədə əsaslı sayıla bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistanın sabiq xarici işlər nazirinin bu cür açıqlaması mövcud hakimiyyətə qarşı siyasi təzyiq vasitəsidir: “Nə Laçın, nə də Zabuxun bizə qaytarılması Qarabağdakı ermənilərin mühasirəyə düşəcəyi anlamına gələ bilməz. 32 kilometrlik alternativ yeni yol Qarabağdakı ermənilərə Ermənistanla əlaqə saxlamağa imkan verəcək. Bu istiqamətdə heç bir problem yaşanmayacaq. Hiss olunur ki, son vaxtlar hətta Qərb xəttində olan etməni siyasətçiləri də Paşinyana qarşı anti-təbliğata start veriblər. Yəqin ki, burada Köçəryanın rolu var. Çox güman ki, onlar Paşinyana qarşı daha güclü koalisiyada birləşmək qərarına gəliblər. Söhbət hərbi-taktiki aspektdən gedirsə, bu yol olmadan belə Qarabağdakı ermənilər onsuz da mühasirədədir. Bir yol bu məsələdə nəyisə həll edə bilməz. Bütün bu bəhanələr prosesi tormozlamaq üçün edilir. Ancaq ermənilər bu öhdəlikləri yerinə yetirməkdən heç vaxt boyun qaçıra bilməyəcəklər. Ümumilikdə, Rusiya sülhməramlılarının müvəqqəti yerləşdiyi Azərbaycan ərazilərində qalan erməni separatçı-terrorçular ətrafında çəmbərin daha da daraldığını deyə bilərik.
Əməliyyatın siyasi əhəmiyyəti də kifayət qədər böyükdür. Birincisi, Bakının cari dövr üçün iki əsas tələbinin – Laçın dəhlizinin altetnativ marşruta köçürülməsi və erməni silahlı dəstələrinin Qarabağdan çıxarılması - icrası daha da aktuallaşdı və İrəvana, eyni zamanda, Moskvaya izah edildi ki, anlaşmanın yerinə yetirilməsinin alternativi yoxdur. İkincisi, Laçın dəhlizinin alterativ marşruta köçürülməsi və Laçın şəhəri, Zabux kəndi və mövcud dəhliz üzərindəki ərazilərin Azərbaycana təhvil verilməsinin konkret tarixi müəyyən edildi”.
Məhəmmədəli QƏRİBLİ
