Ermənistanın xüsusi xidmət orqanlarının Yunanıstanda casusluq fəaliyyəti aşkarlanıb. Belə ki, Ermənistan casus proqramından istifadə edərək Yunanıstanda telefon danışıqlarını dinləyib.
Bununla bağlı yayılan məlumatda qeyd edilir ki, Yunanıstanın PASOK partiyasının sədri Nikos Andrulakisin telefonları Ermənistanın xüsusi xidmət orqanlarının sifarişi ilə dinlənilir. “Ekathimerini.com”un məlumatına görə, partiyanın sədri qeyd edib ki, onun telefonlarına xüsusi cihazlar vasitəsilə qulaq asırlar. Nikos Androulakis telefonuna qeyri-qanuni “Predator” casus proqramı quraşdırmaq cəhdi barədə məlumat verib. Yunanıstan kəşfiyyatının rəhbəri də Andrulakisin telefonunun Ermənistan xüsusi xidmət orqanlarının sifarişi ilə dinlənildiyini açıqlayıb.
Qalmaqala Ermənistanın Yunanıstandakı səfiri Tiqran Mkrtçyan da münasibət bildirib. Diplomat Ermənistanın xüsusi xidmət orqanlarının guya PASOK sədri Nikos Andrulakisin telefonlarının dinlənilməsində iştirak etmədiyini iddia edib.
Məlum olduğu kimi, ötən ay Rusiya hökuməti ölkəyə “dost olmayan” xarici dövlətlərin siyahısını genişləndirib. Siyahıya Danimarka, Sloveniya, Xorvatiya və Slovakiya ilə yanaşı Yunanıstan da əlavə olunub. Yunanıstanın dost olmayan ölkələrin siyahısına daxil edilməsinin bu ölkənin Ermənistanla münasibətlərinə təsirsiz ötüşməyəcəyi güman edilirdi. Bu onu deməyə əsas verirmi ki, Yunanıstan məhz bu faktordan çıxış edərək Ermənistanla əlaqələri kəsmək üçün bundan bir vasitə kimi istifadə edir? Və yaxud da bunu ona görə düzüb-qoşublar ki, Ermənistanın Yunanıstanla əlaqələrini dayandırsınlar? Yəni baş verənlər Rusiyanın Yunanıstanı qeyri-dost ölkələr siyahısına salma qərarı ilə əlaqəli ola bilərmi?
“Hansısa casus qalmaqalı münasibətləri zədələmək baxımından çox güclü təsirə malikdir”
Məsələyə münasibət bildirən AMİP sədri Arzuxan Əlizadənin fikrincə, bütün bu versiyalar arasında əlaqənin olması ehtimalı böyükdür: “Yunanıstan NATO ölkəsi olsa da Rusiya ilə ənənəvi münasibətləri olub. Tarixən Rusiya kəşfiyyatının Yunanıstanda fəaliyyəti güclü olub. Bu bir sıra faktorlardan qaynaqlanır. Məsələ ondadır ki, Balkan ölkələrinin Osmanlı İmperiyasına qarşı qaldırılmasında Çar Rusiyasının müstəsna xidmətləri olub. Rusiyanın Ukraynaya təcavüzünə qədər Rusiya-Yunanıstan münasibətlərində elə bir kəskin qarşıdurma olmayıb. Məlum hadisələrdən sonra Yunanıstan Avropa İttifaqının qərarlarına uyğun olaraq Rusiyaya qarşı mövqeyini sərtləşdirdi. Bu səbəbdən hazırda rəsmi Moskva ilə Afina arasında münasibətlər tamamilə pozulub, əməkdaşlıq və təmas yoxdur. Faktiki olaraq heç bir əməkdaşlıq, təmas yoxdur. Ötən 200 il ərzində iki ölkə münasibətləri bu dərəcədə pisləşməyib. Yunanıstanın Ermənistanla olan yaxınlıq əlaqələri də bəllidir. Çünki Türkiyəyə qarşı olan tarixi düşmənçilik bu dövlətləri bir araya gətirir. Çox güman ki, Ermənistanın Yunanıstandakı cəsus fəaliyyətinin arxasında Rusiya kəşfiyyatı dayanır. Rusiyanın bir sıra səbəblərdən Ermənistanda güclü agentura şəbəkəsi var. Moskva-Afina münasibətlərinin pisləşməsi fonunda Kreml maraqlıdır ki, Ermənistan-Yunanıstan münasibətləri pozulsun. Hansısa casus qalmaqalı münasibətləri zədələmək baxımından çox güclü təsirə malikdir”.
Bu baxımdan partiya sədri hesab edir ki, yaşananlar mənfi mənada Yunanıstan-Ermənistan münasibətlərinə təsirsiz ötüşməyəcək.
Vidadi ORDAHALLI
