ABŞ konqresmenlərinin Dövlət Departamenti qarşısında əsassız “Qarabağ demarşı”...
ABŞ Konqresindəki ermənipərəst konqresmenlər yenə rahat durmaq istəmirlər. Erməni lobbisindən bəslənən bəlli konqresmenlər Qarabağda baş verən son toqquşmalara görə Azərbaycanı ittiham edirlər. Ermənistana törətdiyi təxribatlara görə dur demək əvəzinə, Azərbaycanı hədəf alırlar.
Məsələ ondadır ki, ermənipərəst konqresmenlər avqustun üçündə baş verən toqquşmalara görə Azərbaycanı ittiham edirlər və bununla bağlı Dövlət Departamentinə müraciət ediblər. Müraciətin məzmunu ondan ibarətdir ki, guya Azərbaycan “Arsaxda” vəhşiliklər törədir, Dövlət Departamenti də bunun qarşısını alsın: “Azərbaycanın Laçın dəhlizi boyunca “Artsaxa” hərbi təzyiq göstərməsini qətiyyətlə pisləyirik. Dövlət Departamentini növbəti vəhşiliklərin qarşısını almaq üçün əlimizdə olan bütün diplomatik vasitələrdən istifadə etməyə çağırırıq. Dövlət Departamentinin gərginliyi azaltmaq və Birləşmiş Ştatların Ermənistanın suverenliyinə və “Artsaxın” “ərazi bütövlüyünə” sarsılmaz dəstəyini nümayiş etdirmək üçün bütün diplomatik kanallardan və təsir imkanlarından istifadə etməsi vacibdir”.
Görünən odur ki, bəlli konqresmenlər bu addımları ilə növbəti dəfə Qarabağ separatçılarına qahmar çıxırlar.
- “ABŞ-ın dövlət maraqları daha prioritetdir, nəinki ermənipərəst konqresmenlərin istəkləri”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun fikrincə, ABŞ konqresində bəlli konqresmenlər erməni lobbisinin girovuna çevriliblər: “Əfsuslar olsun ki, neçə illərdir bu, belədir. Xüsusən də ABŞ-ın bir sıra ştatlarında kompakt şəkildə yaşayan erməni icması seçkilərdə bu amildən öz mənafeyinə uyğun istifadə edir. Seçici səsini almaqdan ötrü konqresmenlər erməni əsilli seçicilərə vədlər verirlər. Sonra bu vədlərin girovuna çevrilirlər. Onu da nəzərə almalıyıq ki, Birləşmiş Ştatlarda güclü erməni lobbisi formalaşıb. Əfsuslar olsun ki, ABŞ-da yaşayan türklər güclü lobbiyə malik deyil. Fikrimcə, yəhudi lobbisi Azərbaycanın maraqlarını qorumasaydı, o zaman bizim üçün daha çətin olardı. Bütün bunlara rəğmən hesab edirəm ki, ABŞ-ın dövlət maraqları daha prioritetdir, nəinki ermənipərəst konqresmenlərin istəkləri. Onların Dövlət Departamentdən istəkləri reallaşmayacaq. Ən azından ona görə ki, Qarabağ beynəlxalq hüquqa görə Azərbaycan ərazisidir. Orada aparılan istənilən hərbi əməliyyat bizim daxili işimizdir. Digər tərəfdən, Azərbaycan Avropanın enerji təchizatının şaxələnməsinə töhvə verən başlıca ölkələrdən biridir. Bunun indiki dövrdə Avropa üçün nə demək olduğunu geniş izah etməyə ehtiyac yoxdur. Bütün bunları nəzərə alsaq, ABŞ-ın Azərbaycanla bağlı hansısa sərt qərarlar qəbul edəcəyini düşünmürəm”.
Bu baxımdan partiya funksioneri hesab edir ki, narahatlığa elə bir əsas yoxdur.
Vidadi ORDAHALLI
