İbrahim Rüstəmli: “Onun belə mövqeyi indiki dövrdə həmsədr dövlətlərin bir-birinə olan düşmən münasibəti ilə bağlıdır”
Məlum olduğu kimi, avqustun 3-də Rusiya sülhməramlı kontingentinin müvəqqəti yerləşdiyi Azərbaycan ərazisindəki erməni separatçıları Laçın rayonu istiqamətində yerləşən Ordumuzun bölmələrinin mövqelərini intensiv atəşə tutub. Separatçıların təxribatı nəticəsində əsgər Kazımov Anar Rüstəm oğlu aldığı güllə yarasından şəhid olub.
Ermənistan tərəfinin bu cür təxribata əl atmaları ilk dəfə deyil. Bundan öncə də müxtəlif vaxtlarda ordumuzun mövqeləri dəfələrlə atəşə məruz qalıb. Buna cavab olaraq Azərbaycan Ordusu “Qisas” əməliyyatı keçirərək əlverişli strateji yüksəklikləri nəzarətə götürüb. Bir sıra düşmən postları məhv edilib. Ordumuzun cavab zərbəsindən sonra adətən prosesləri oxşar formada dəyərləndirən baş nazir Nikol Paşinyan nədənsə son hadisələrə bir qədər fərqli prizmadan yanaşıb. Necə deyərlər, ənənəsini dəyişib. Məsələn, indiyə qədər Paşinyan Qarabağ məsələsinin həllində ATƏT-in Minsk Qrupu formatının daha məqsədəuyğun olduğunu qabardırdı. Ancaq avqustun 3-də baş verən toqquşmaları dəyərləndirərkən Minsk Qrupu formatının üstündən keçdi. Bu barədə bir kəlmə də danışmadı. Belə məlum olur ki, artıq Paşinyan da Minsk Qrupundan imtina etmək üzrədir. Bunun əvəzində daha çox sülhməramlıların mandat məsələsini qabardır.
Maraqlıdır, Paşinyanın Minsk Qrupundan məsafə saxlaması, bir az ondan kənara çəkilməsi nə ilə bağlı ola bilər?
- “Sülhməramlıların mandat məsələsini qabartmaqla məsuliyyəti Rusiyanın üzərinə atmaq istəyir”
Məsələyə münasibət bildirən hərbi ekspert İbrahim Rüstəmli hesab edir ki, Paşinyan Qarabağ məsələsində məsuliyyəti tamamilə Rusiyanın üzərinə qoymaq istəyir: “Əvvəla, Paşinyan yaxşı bilir ki, Minsk Qrupu barədə danışmaq indiki məqamda yersizdir. Bu, təkcə Qarabağ məsələsində Minsk Qrupu ilə bağlı Azərbaycanın sərgilədiyi mövqe ilə bağlı deyil. Məlum olduğu kimi, Azərbaycan Vətən müharibəsindən sonra Minsk Qrupunu yaxın buraxmır. Artıq bu quruma ehtiyac olmadığını bildirir. Paşinyanın belə mövqeyi indiki dövrdə həmsədr dövlətlərin bir-birinə olan düşmən münasibəti ilə bağlıdır. O yaxşı bilir ki, Ukrayna müharibəsi fonunda ABŞ Rusiya ilə bir stol arxasında oturmaz. Fransanın da bu məsələdə ABŞ-ın yanında yer alması bəllidir. Ona görə də Paşinyan sülhməramlıların mandat məsələsini qabartmaqla məsuliyyəti Rusiyanın üzərinə atmaq istəyir. Nikol istəyir ki, lazım gələrsə Qarabağ Rusiya protektoratlığına keçsin, təki məsuliyyət onun üstündən götürülsün. Çünki Qarabağ məsələsini özü üçün təhdid hesab edir. O yaxşı bilir ki, Ermənistanda hakimiyyət dəyişikliyi çox vaxt Qarabağa görə baş verir. Bu səbəbdən son hadisələrlə bağlı sülhməramlıların fəaliyyətini tənqid etdi”.
Vidadi ORDAHALLI
