Paşinyanın üç şərti 10 noyabr sənədini alt-üst edir - Rusiyanın reaksiyası...

Afsəddin Nəbiyev: “Nikolun isterik vəziyyətdə bizə şərt irəli sürməsi ötüb gedən qatarın arxasınca deyinməyə bənzəyir”

img

Avqustun 4-də Ermənistanın baş naziri Nikol Paşınyan hökumətin iclasında çıxış edərək yenidən Azərbaycana qarşı separatçılıq iddiaları irəli sürüb. Bir sıra sərsəm fikirlər səsləndirib.

Paşinyan məlum hadisələr fonunda öz aləmində Azərbaycana yönəlik 3 şərt irəli sürüb. Birincisi, guya 10 noyabr razılaşmasına əsasən Azərbaycan Dağlıq Qarabağ inzibati vahidliyinin mövcudluğunu qəbul etməlidir. İkincisi, alternativ yolun açılıb-açılmamasından asılı olmayaraq Laçın dəhlizi olduğu kimi qalmalıdır. Üşüncüsü, təmas xətti anlayışını Azərbaycan qəbul etməlidir. Yəni Azərbaycan öz içində Dağlıq Qarabağla sərhədi qəbul etməlidir: “Ermənistan bütün öhdəliklərini yerinə yetirib, Azərbaycan da üç öhdəliyi yerinə yetirməlidir: Azərbaycan prezidentinin imzasıyla qeyd olunmuş Dağlıq Qarabağın mövcudluğunu tanımaq, Dağlıq Qarabağda təmas xəttinə və Dağlıq Qarabağla Ermənistanı birləşdirən Laçın dəhlizinin mövcudluğuna hörmət etmək”.

Onun sözlərinə görə, əks halda Ermənistan Azərbaycanın üçtərəfli bəyanatdakı öhdəliklərə əməl etməsi üçün beynəlxalq mexanizmlərə müraciət etməlidir.

Bax bu şərtlər nə dərəcədə absurddur və danışıqlar, normallaşma prosesinə necə təsir göstərəcək?

  • “Azərbaycan dövləti ərazi bütövlüyümüzlə bağlı məsələlərdə heç bir güzəşti qəbul etməyəcək”

Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev bununla bağlı bir sıra məqamlara toxundu: “Ermənistanın baş naziri Nikol Paşinyan son illərdə bir dəfə də olsun davamlı siyasi çağırışlar edə bilmədi. Bu tendensiya bir dövləti yönəldən rəhbər üçün fiaskodan başqa bir şey deyil. Dövləti idarə edən rəhbərlər idarə etdiyi  dövlətin gələcək vizionunu aydın şəkildə xalqa göstərməlidir. Ermənistanın millətçi ünsürlərinin mifoloji təsəvvürlər üzərində qurduğu xəyalları 44 günlük müharibədən sonra puç olduğu üçün erməni liderlərin xalqa deyiləcək sözü qalmayıb. Necə deyərlər, erməni lobbi və diaspor nümayəndələri bu xalqı o qədər zərərli təbliğatla zəhərlədi ki, indi demək olar bu xalq kollaps vəziyyətindədir. Nikol Paşinyan da bu vəziyyətdə olan erməni cəmiyyətinə "liderlik" etmək məcburiyyətində qalıb. Çox nadir hallarda öz sözlərini dilə gətirir, bu da yüzillər boyu mifoloji təsəvvürlərlə yaşayan insanlarda qıcıq yaradır. Bir sözlə, odla su arasında qalıb”.

A.Nəbiyev hesab edir ki, Paşinyanın budəfəki açıqlaması depressiyada olan erməni xalqına "dərman" təəssüratı yaratmağa hesablanıb: “Paşinyan yaxşı bilir ki, suveren Azərbaycan ərazisində Dağlıq Qarabağ adlı inzibati ərazi vahidi yoxdur. Qarabağ Azərbaycan ərazisində yerləşən 14 iqtisadi  rayondan biridir. Eyni zamanda, Konstitusiyamızda göstərildiyi kimi, Azərbaycanın suveren ərazisində yaşayan hər bir şəxs ölkə vətəndaşı olaraq Azərbaycanın qanunlarına tabe olmalıdır. O ki qaldı Laçın dəhlizi məsələsinə, bu dəhliz Qarabağ iqtisadi rayonu ərazisində yaşayan erməni əhalisinə müvəqqəti istifadə olunması üçün verilən humanitar dəhlizdir. 10 noyabr Bəyanatında göstərildiyi kimi, alternativ yol açıldıqdan sonra bu dəhlizin taleyi Azərbaycan dövlətinin ixtiyarında olacaq. Təmas xətti anlayışı da müvəqqəti xarakter daşıyır, "sülhməramlı" kontingent bu ərazidən getdikdən sonra, Konstitusiyamızda göstərildiyi kimi, Azərbaycanın ərazi bütövlüyünü, mühafizəsini Azərbaycan Ordusu təmin etdiyi üçün burada ordumuzun fəaliyyəti tam təmin olunacaq. Burada yaşayan ermənilər Azərbaycan vətəndaşlığını birmənalı olaraq qəbul etməlidirlər. Əks halda bu torpaqları tərk etməli olacaqlar. Paşinyanın isterik vəziyyətdə bizə şərt irəli sürməsi ötüb gedən qatarın arxasınca deyinməyə bənzəyir. Azərbaycan dövləti ərazi bütövlüyümüzlə bağlı olan məsələlərdə heç bir güzəşti qəbul etməyəcək. Bu, xalqımızın və dövlətimizin qırmızı xəttidir. Paşinyan  öz sərsəm açıqlamalarını davam etdirdikcə daha dərinə batır, bunu özü də bilməmiş deyil”.

Sədr müavini onu da əlavə etdi ki, Azərbaycan öz işində olmalı və Nikolun sərsəm fikirlərinə əhəmiyyət verməməlidir.

Vidadi ORDAHALLI

Peşə etikası

Son xəbərlər