Prezidentdən Azərbaycan vətəndaşlığı xahiş edən məşhur erməni blogerə nə cavab verək?
Məlum olduğu kimi, erməni fəalı, bloger İşxan Verdyan Azərbaycan Prezidenti İlham Əliyevə müraciət hazırlayaraq, həmin müraciəti Ermənistan vətəndaşlarına da ünvanlayıb. Oxu.az-a müsahibəsində İşxan Verdyan izah edib ki, Ermənistan artıq beynəlxalq hüquqa hörmət etməyə başlamalıdır, çünki ölkə sivil inkişafı kursunu müəyyənləşdirib.
“Mən Ermənistanın gələcəyini Skandinaviya modeli ilə yaradılmış bir ölkə kimi görürəm və bu arzumdan əl çəkməyə hazır deyiləm. Nədənsə, buna görə bəziləri məni satqın hesab edir, amma nə baş verirsə-versin, xalqımla tam səmimi olmaq istəyirəm. Həmişə demişəm ki, Ermənistana getməyən və Qarabağda qalmayan ermənilər Azərbaycan vətəndaşlığını alıb Azərbaycan cəmiyyətinin bir hissəsinə çevrilməli olacaqlar. Və fikrimi dəyişmirəm… Göstərmək istəyirəm ki, ermənilər Qarabağda təhlükəsiz və hətta gözəl şəkildə yaşaya bilərlər. Bunu nəzərə alaraq Azərbaycan Prezidenti İlham Əliyevə müraciət edirəm: Hörmətli cənab Prezident, Sizdən xahiş edirəm ki, mənə Azərbaycan vətəndaşlığı və Xankəndidə yaşayıb işləməyə icazə verəsiniz”, – deyə İşxan Verdyan bildirib.
Verdyan erməni xalqına müraciətində isə bunları deyib: “Hörmətli xalqım, Ermənistan vətəndaşları! Mən həmişə demişəm ki, Qarabağ Azərbaycandır, bunu beynəlxalq hüquqla əsaslandırmışam. Ermənilərin heç biri mənim bu fikrimi heç vaxt təkzib etməyiblər, heç kim mənimlə bu mövzuda debata girməyib, heç kim qanuni olaraq mənim haqsız olduğumu sübut edə bilməyib”.
Prezidentdən Azərbaycan vətəndaşlığı xahiş edən məşhur erməni blogerə nə cavab verək?
- Azər Həsrət: “Əgər o bloger Azərbaycanda doğulubsa və doğuşdan onun burada yaşamaq hüququ varsa, əlbəttə, dövlətimiz onun bu istəyini gerçəkləşdirməlidir, müsbət cavab verməlidir”
Siyasi şərhçi Azər Həsrət “Bakı-Xəbər”ə şərhində bildirdi ki, ermənilər tədricən belə təşəbbüslər irəli sürəcəklər: “Düşünürəm ki, hətta bu cür təşəbbüslərdə bir az gecikiblər. Çünki ermənilərin içində olan ağlı başında insanlar, həqiqətən də irəlini görməyi bacaran, dinc yanaşı yaşamağı bacara biləcəyini düşünən hər kəs bu cür addım atmalıdır. Adı çəkilən bu şəxsin vətəndaşlığı ilə bağlı məlumatım yoxdur. Əgər o Azərbaycan ərazisində-Qarabağda doğulubsa, burada yaşayıbsa, əlbəttə, Azərbaycan dövləti ona normal şəkildə pasport verəcək. O, Azərbaycan pasportu ilə hara istəsə gedə, dünyanı gəzə-dolaşa, ölkəmizdə də yaşaya biləcək. Bu normal bir şeydir. Çünki Qarabağdakı ermənilərə zatən Azərbaycan pasportu veriləcək. Yəni bu görsənişin özü əslində müsbət görsənişdir. Eyni zamanda bu onun xəbərçisidir ki, sadə ermənilər, yaxud ağlı başında olan ermənilər bu düşmən münasibətlərin əbədi davam edə bilməyəcəyinin fərqindədirlər. Onlar başa düşürlər ki, Azərbaycanla düşmənlik etmək lazım deyil, dost olmaq, dinc yanaşı yaşamağı öyrənmək lazımdır. Ona görə də bu bloger Prezident İlham Əliyevə müraciət ünvanlayıb. Dediyim kimi, əgər o bloger Azərbaycanda doğulubsa və doğuşdan onun burada yaşamaq hüququ varsa, əlbəttə, dövlətimiz onun bu istəyini gerçəkləşdirməlidir, müsbət cavab verməlidir. Yox, əgər o Ermənistan, yaxud başqa ölkənin vətəndaşıdırsa Azərbaycan dövləti izah etməlidir ki, indiki şəraitdə ona birbaşa vətəndaşlıq verilə bilməz. Amma mənə elə gəlir ki, onun istədiyi vaxt Azərbaycana gəlib-getməsinə şərait yaradılmalıdır. Əslində bu cür adamlar bizim həyat tərzimizi görməlidir, Azərbaycanı görməlidir, Bakını, bölgələrimizi gəzməlidir və gedib ermənilərə, Ermənistana izah etməlidirlər ki, baxın, bizim törətdiyimiz müharibə üzündən Ermənistan nə gündədir, hələ bizim onlara vurduğumuz zərbəyə baxmayaraq Azərbaycan nə qədər inkişaf edir, nə qədər irəli gedir. Bu fürsətdir və mənə elə gəlir ki, bundan yararlanmaq lazımdır. Eyni zamanda onu da qeyd edək ki, əslinə qalanda Qarabağdakı ermənilərə yavaş-yavaş izah edilir ki, bu məsələ mütləq şəkildə ya onların Azərbaycan vətəndaşı kimi yaşaması ilə, ya da ki, Azərbaycan torpaqlarını tərk edib getməklə nəticələnəcək. Ona görə də, təsadüfi deyildi ki, iki gün əvvəl Rusiya sülhməramlı kontingenti ictimai fəallarla və müxalif ermənilərlə görüşərkən masanın üzərinə məhz Azərbaycanın bayrağını da qoyublar. Yəni ermənilərə artıq bir növ mesajlar ötürülüb ki, bu bayraq altında danışacağıq, bu bayraq altında yaşayacaqsınız, ümumiyyətlə, bu bayraq sizin bayraqdır. Orada separatçıların qondarma bez parçası masanın üzərində yox idi. Bu özü də bir mesajdır. İşxan adlı blogerin də çağırışı bənzər mesajardan biridir. Mənə elə gəlir ki, yaxın zamanlarda bu cür təzahürlər, görsənişlər çoxalacaq”.
- Akif Nağı: “Erməni blogerin Azərbaycan Prezidentinə müraciət etməsi və vətəndaşlıq verilməsi xahişi irəli sürməsi təbii qarşılanmalıdır”
Qarabağ Azadlıq Təşkilatının (QAT) sədri Akif Nağı da erməni blogerin Azərbaycan Prezidentinə müraciətini müsbət bir hal kimi qiymətləndirir. “Ermənilər artıq başa düşürlər ki, həmin ərazilər birmənalı şəkildə Azərbaycan əraziləridir, Azərbaycan hakimiyyəti orda bərpa olunmalıdır. Orada yaşamaq üçün artıq Azərbaycan Prezidentindən icazə istəyirlər. Digər tərəfdən, bu illər ərzində bütün dünya erməniləri özlərini aldatdılar ki, guya həmin ərazilərdə ermənilərin hansısa bir qurumu yaranıb, ora Ermənistanın nəzarətində olacaq. Artıq xam xəyallara düşdüklərini anlayırlar, çünki bu fikirlər real deyil. Kimsə qanunsuz olaraq Xankəndiyə, ətraf ərazilərə gəlirdisə özünü təhlükəsiz şəraitdə hiss etmirdi. Yəni orada ermənilərin işğalçı rejimi vardı, bu separatçı rejim də heç nəyə təminat vermirdi. İnsanların çoxu ordan çıxıb gedirdi. İndi tendensiya başlayıb ki, Xankəndi və digər ərazilərin təhlkəsizliyi Azərbaycan hakimiyyəti ilə bağlıdır. Yüz il bundan əvvəl də ermənilər baş qaldırdılar, nəsə etmək istədilər, amma sonra başa düşdülər ki, burada əmin-amanlıq içində yaşamaq üçün ancaq Azərbaycan hakimiyyətini tanımalıdırlar, qəbul etməlidirlər, Azərbaycan qanunlarına tabe olmalıdılar. İndi də eyni səhvi etdilər, Azərbaycana qarşı çıxdılar, qətillər törətdilər, özlərini aldatdılar ki, guya nəyəsə nail olublar, məsələni “həll ediblər”. Amma Azərbaycan inamlı şəkildə öz siyasətini həyata keçirdi, əhalimiz çox əziyyət çəkdi, 1 milyondan çox əhalimiz qaçqın-köçkün vəziyyətinə düşdü. Amma nə dövlətimizin, nə də xalqımızın iradəsini sındıra bildilər. Biz vəziyyəti əvvəlki şəkildə bərpa etdik. İndi ermənilər arasında yeni tendensiya başlayır ki, onlar Azərbaycan dövlətini, Azərbaycan qanunlarını tanıyırlar. Bilirlər ki, orada yalnız Azərbaycan hakimiyyətinin icazəsi ilə, nəzarəti altında yaşaya bilərlər. Bu proses gedir. Bu baxımdan, erməni blogerin Azərbaycan Prezidentinə müraciət etməsi və vətəndaşlıq verilməsi xahişi irəli sürməsi təbii qarşılanmalıdır”.
Bununla belə, A.Nağı hesab edir ki, ermənilərin vətəndaşlıqla bağlı müraciətinə yanaşmada Azərbaycan dövləti, qurumlarımız ehtiyatlı olmalıdır. Onun sözlərinə görə, bu müraciətlərin arxasında təxribatçılıq məqamları da ola bilər. A.Nağı deyir ki, sadə ermənilər Azərbaycan vətəndaşı kimi yaşamaq istəyir, amma onlarla yanaşı bura təxribat məqsədilə gəlmək istəyənlər də istisna deyil. Onun qeyd etdiyinə görə, bu gün Ermənistanın siyasəti ona yönəlib ki, ermənilərin siyasi mövcudluğunu hansısa formada Qarabağın bir hissəsində qoruyub saxlasınlar.
İradə SARIYEVA
