Azərbaycanın Böyük Britaniya və Şimali İrlandiya Birləşmiş Krallığındakı səfirliyinin radikal dini dəstənin hücumuna məruz qaldığı məlumdur. Səfirliyin binasına daxil olaraq vandalizm aktı törədən qrup üzvləri binanın eyvanında dini bayraqlar qaldıraraq, radikal dini şüarlar səsləndiriblər.
Yerli polisin müdaxiləsindən sonra qrup üzvləri binadan çıxarılıb və saxlanılıb. Britaniyanın Azərbaycandakı səfirliyi Azərbaycanın London səfirliyinə daxil olan “etirazçıların” hərəkətlərini pisləyib. Azərbaycan Xarici İşlər Nazirliyi hadisəni “bir qrup radikal dini dəstə”nin hücumu və “vandalizm aktı” kimi qiymətləndirib.
Səfirliyinə hücum edənlərin artıq kimliyi də məlum olub. Bunlar “The Mahdi Servants Union” (“Mehdinin Xidmətçiləri”) adlı radikal dini qruplaşmanın üzvləridir.
Məlumata görə, bu, Londonda yerləşən şiə müsəlman təşkilatıdır və öz internet saytlarında “sivilizasiya hökmranlığı” qurmaq istədiklərini bildirir.
Mətbuatda qeyd olunub ki, qruplaşmanın lideri Yasir Əl-Həbibdir: “Sosial şəbəkələrdə yayılan görüntülərdə qruplaşma üzvləri Azərbaycanın Londondakı səfirliyinin eyvanından öz bayraqlarını dalğalandırıb, divara ərəbcə şüarlar vurub və Azərbaycan bayrağını endiriblər (artıq səfirliyimizdə Azərbaycan bayrağı dalğalanır-İ.S)”.
Yayılan xəbərdə, eyni zamanda, təşkilatın lideri Yasir Əl-Həbibin mübahisəli bir “din xadimi” olduğu da vurğulanıb. Bildirilib ki, onun “Cənnət xanımı” filmi islam tarixinin şərhinə görə bəzi sünni müsəlmanların etirazlarından sonra bu ilin əvvəlində Britaniyada prokatdan yığışdırılıb. Məlumatlarta görə, Yasir Əl Həbib Küveytdə anadan olub. Qumda dini təhsil alıb. Daha sonra İran və İraqda fəaliyyət göstərib. Cəfəri şiələrindən olan Həbib həm də şirazi hərəkatındandır. Həbib 2005-ci ildə Britaniyada sığınacaq alır və burada daha sonra “Khoddam Al-Mahdi” anti sünni təşkilatını yaradır. Onun şiə təbliğatı aparan “Fadak” adlanan kanalı var. Bu kanal sünnilərə qarşı təbliğatlarına görə sünnilərin etirazından sonra Britaniyada qadağan edilib. “Khoddam Al-Mahdi” təşkilatının mərkəzi qərargahı Londondadır.
Radikal dini qruplaşmanın Azərbaycanın Britaniyadakı səfirliyinə hücum etməkdə məqsədi nə olub? Niyə məhz Britaniyadakı səfirlik seçilib? Radikal islamçıları İngiltərədəki Azərbaycan səfirliyinə hücuma kim yönəldib? Pərdəarxasında hansı qüvvələr dayanır? Pərdəarxasını necə təhlil edərsiz?
Abutalıb Səmədov: “Aydın olmayan kifayət qədər suallar var və bu suallara da cavab verəcək qurum Böyük Britaniyanın hüquq-mühafizə orqanlarıdır”
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə şərhində bildirdi ki, Azərbaycanın Londondakı səfirliyinə basqın edən və orada dini bayraqlar qaldıran təşkilat barədə çox məhdud məlumatlar var. “Bu, “Mehdinin Xidmətçiləri” adlandırılan radikal dini qruplaşmadır. Bundan əvvəl 2018-ci ildə İran səfirliyinə qarşı eyni hərəkəti ediblər. Yəni İran səfirliyinə daxil olublar və orada da dini bayraqları qaldırıblar. Ancaq həmin dövrdə onlar bunu Şirazinin həbsinə etiraz məqsədi ilə ediblər. Ancaq indi bu dini radikal təşkilat nə üçün bu hərəkəti edib, Azərbaycanın Londondakı səfirliyinə basqın edib, bu məlum deyil. Niyə Azərbaycan səfirliyi seçilib? Çox güman ki, şiə müsəlmanlarının böyük əksəriyyət təşkil etdiyinə görə səfirliyimiz seçilib, yaxud ola bilsin, səfirlik yaxşı qorunmadığı üçün Azərbaycan səfirliyi seçilib və bununla da özlərinə diqqəti yönəltmək istəyirlər. Bütün hallarda, səfirlik bu cür qorunmamlıdır. Üstəlik, əgər 2018-ci ildə belə bir hadisə baş veribsə Böyük Britaniya hüquq-mühafizə orqanları bundan nəticə çıxarıb və səfirliklərin daha yaxşı qorunması üçün tədbirlər görməli idilər. Ancaq görməyiblər. Azərbaycanda belə bir hadisə baş versəydi qalxan hay-küyü təsəvvür etmək çətin deyil. Ancaq 30 ildir Azərbaycanda, müstəqillik dövrümüzdə belə bir hadisə olmayıb. Böyük Britaniyada son 5 ildə bu ikinci hadisədir. Hüquq-mühafizə orqanları təhqiqat, araşdırma aparırlar. Onların araşdırmasından sonra bu dini radikal qrupun məqsədinin nədən ibarət olduğu, yəqin ki, aydınlaşacaq. Pərdəarxasında kimlər dayanır, əslinə qalanda aydındır, bu təşkilat haqda kifayət qədər məlumat var. İrana qarşı düşmən mövqeyində dayanan bir təşkilatdır. İran idarəçiliyini, İran dindarlarını, onların dini liderini qəbul etməyən bir təşkilatdır. Ancaq aydın olmayan kifayət qədər suallar var və bu suallara da cavab verəcək qurum Böyük Britaniyanın hüquq-mühafizə orqanlarıdır”.
Tural İrfan: “Bu radikal-dini qruplaşma Britaniya hökuməti tərəfindən geniş himayə olunur”
Milli Cəbhə Partiyasının (MCP) sədr müavini Tural İrafanın isə mövqeyi belədir: “Əvvəla, Milli Cəbhə Partiyası olaraq Britaniyadakı səfirliyimizin binasına dini radikalların təşkil etdiyi hücumu və bayrağımızın təhqir olunmasını, orada müxtəlif təxribat cəhdlərinin baş verməsini kəskin şəkildə pisləyirik. Bu bütün hallarda dövlətimizin inkişafına, milli birliyimizə qarşı xarici qüvvələr tərəfindən yönələn bir təxribatdır. Ümidvarıq ki, Britaniya hökuməti təcavüzkarların səfirliyimizə basqın etdiyi zaman susqun qaldığı kimi hərəkət etməyəcək və sonrakı araşdırma proseslərində də bu cür ədalətsizliyə yol verməyərək obyektiv şəkildə nəinki ora hücum edənləri, təşkilatçılarını və pərdəarxasında olan fiqurları da araşdırıb üzə çıxaracaq. O ki, qaldı o qruplaşmanın arxa fonuna. Sözügedən qruplaşmanın baş rəhbəri Ayətullah Sadiq Şirazi adlı bir iranlı farsdır. Bildiyiniz kimi, İranda mövcud olan Ayətullahlıq məktəbinin üzvlərindən biridir. Ancaq hərçənd ki, o, İran siyasi hökumətinə və inqilabına zidd mövqedə duran bir adamdır. Bu adam həqiqətənmi zidd mövqedədir, yoxsa bunu görüntü üçün əvvəlcədən proqramlaşdırıblar, bu artıq bəlli deyil. Çünki İran elə bir sistem üzərində bərqərar olub ki, bu tam teokratik də deyil. Təqiyyə deyilən bir özünü gizlətmə sisteminə dayanan dini sistemdir. Ona görə də müxtəlif fiqurları, siyasiləri, dini rəhbərləri hətta özlərinə ziddmiş kimi zahirən göstərərək xarici dövlətlərdə, əsasən də Avropa dövlətlərində yerləşdirmək üçün bu cür addımlara da rəvac verə bilirlər. Şirazinin Küveyt əsilli Yasir Əl-Həbib adlı bir nümayəndəsi, qardaşı Müctəba Şirazi, Mürtəza Şirazi-bunlar hamısı ayətullahlardır. Bunların Suriyada da məktəbləri olub. Bizim Azərbaycandan da həmin məktəbi oxuyub bitirən və hazırda Azərbaycanda məscid imamı olaraq məshəblərarası intriqanı alovlandıran şəxslər var. Dünyanın istənilən müsəlman ölkələsində bunların nümayəndələri mövcuddur. Bu radikal qruplaşmanı Britaniya kəşfiyyatının ələ alıb, onların radikal və xurafatçı fikirlərini islamın parçalanmasında, digər müsəlman ölkələrinə təzyiq göstərilməsində, islam ölkələrində mövcud hakimiyyətlərə qarşı çaxnaşma yaradılmasında istifadə etmək Britaniya hökuməti üçün çox əlverişlidir və uzun müddətdir onları himayə edir . “Əl-Fədək” (Fədək) adlı məşhur telekanalları və Britaniyada bu qruplaşmanın 30-a yaxın telekanalı, fondları var. Bu radikal-dini qruplaşma Britaniya hökuməti tərəfindən geniş himayə olunur. Hətta Yasir Əl-Həbib Britaniya kraliçasını “Əhli beytdən” adlandırıb. Deilənə görə, karliçanın ana tərəfdən ərəblərə soy qarşılığı var. Bu baxımdan bu da bir az irəli gedərək onu Peyğəmbər Əhli beytindən hesab edib. Yəni bunların fikirləri daha xurafatçıdır. Bir cümlə ilə ifadə etsək, vəhabilik sünniliyin radikal və dağıdıcı qruplaşmasıdırsa, Britaniya tərəfindən necə yetişdirilibsə, Şirazilikçilik də bu məktəb də şiəliyin daxilində Britaniya tərəfindən himayə olunan şiə vəhabiliyidir. Yəni bu cür radikallıqlarına görə buna “ingilis şiəliyi”, “şiə vəhabiliyi” də deyirlər. Onlar mötədil şiələri belə tənqid edirlər. Hətta İran hökumətinə ona görə düşməndirlər ki, “siz sünni ölkələrlə niyə müttəfiq olursuz, Fələstini müdafə edirsiz, onlar sünnidir” və sair. Onlar sünni müsəlmanlara qarşı qəddar və amansızdırlar, onları “kafir” hesab edirlər. Hətta sünnilərlə vəhdətdə, barışdırıcı mövqe də olan şiə alimlərini lənətləməkdən, onlara qarşı terror aktları törətməkdən çəkinmirlər. Eyni zamanda qatı şəkildə xurafatçıdırlar, onlar İmam Hüseyni bir növ “Allah” hesab edirlər, məhərrəmlikdə baş yarmayanı “kafir” hesab edirlər. Yəni bunların çox çirkin və radikal bir mövqedə duran fikirləri var. Bunun siyasi tərəflərinə gəlincə, burada bir çox məqamlar ola bilər. Həmin Şirazinin hazırda İranla da bağlılığı var, Britaniya tərəfindən də himayə olunur. Burada şübhələr yaranır ki, bunlar zahirdə, üzdə İran hökuməti, İran inqilabı ilə guya bir-birinə düşməndirlər. Amma heç vaxt onlar İran tərəfindən çıxdaş edilməyib. Səhv etmirəmsə, onların rəhbərləri Sadiq Şirazi elə İranda yaşayır, 80-ə yaxın yaşı var. Amma oğlu, tələbələri digər ölkələrdə, o cümlədən də Britaniyada yaşayırlar. Azərbaycanda İran tərəfindən qaynaqlanan “Kərimə dövləti” və başqa şüarlar səsləndirilməyə cəhdlər oldu, Zəngəzur dəhlizinin açılması, Qarabağ məsələsinin kökündən həll olunması məsələsini İran böyük narahatlıqla qarşılayır. Bilirsiz ki, İranın ən ciddi müttəfiqlərindən biri ermənilərdir. Söhbət dünyada yaşayan ermənilərdən gedir. Həmin dini qruplaşmalar ermənilərlə İran vasitəsi ilə daim əlaqədədir. Bilirsiz ki, ASALA terror təşkilatı və Livan tərəfdə yerləşən terror təşkilatlarının hamısı ilə İran əlaqəlidir. Həmişə bu kimi məsələlərdə İranın adı hallanırdı. Ona görə, İran bu dəfə başqa bir taktika işlətdi: özü tərəfindən yox, guya zahirdə İranın əleyhinə olan, İran hakimiyyəti ilə barışmayan bir müctəhidin, şiə dini liderlərinin tərəfdarları bu işi gördü. Amma istər İraqda Sistani, istər Britaniyada Şirazi, istərsə də İrandakı ayətullalar olsun, bunlar dövlətçilikləri, ideologiyaları naminə həmişə daxilən bir olurlar. Ola bilsin, üzdə ittifaqda olduqlarını göstərməsinlər. Yenə də bu məsələnin kökü gedib İran ideologiyasına dayanacaq. Hərçənd ki, Şirazi farsdır, şirazlıdır, məqsəd isə Azərbaycanın inkişafına mane olmaq, Ermənistanla sülh müqaviləsini puç etməkdir...”
İradə SARIYEVA
