Rusiya mediası Azərbaycanla informasiya sazişinə tüpürdü – “DQR-in Müdafiə Nazirliyi”...

Yadigar Məmmədli: “Bütün bunlar onu göstərir ki, Rusiya imzalanan sazişlərə, onların yerinə yetirilməsinə hörmət etmir”

img

Əfsuslar olsun ki, Rusiyanın bəzi media orqanları Qarabağla bağlı xəbərləri təqdim edərkən nümayişkaranə formada Azərbaycanın ərazi bütövlüyünə hörmətsizlik edirlər. Rusiya ilə imzalanan informasiya sazişini belə yerə vururlar.

Rusiyanın EADaily.com saytının Qarabağda baş verən toqquşmalarla bağlı yaydığı məlumat bunu bir daha sübut edir. Həmin məlumatda deyilir: “Avqustun 2-nə keçən gecə Dağlıq Qarabağ Respublikasının (DQR) Müdafiə Nazirliyi Azərbaycan ordusunun bölmələrinin ötən bazar ertəsi həyata keçirdiyi əməliyyatlar nəticəsində bir erməni əsgərinin yaralandığı barədə məlumat yayıb. DQR Müdafiə Nazirliyinin məlumatına görə, avqustun 1-də səhər saat 09.00-dan Dağlıq Qarabağın şimal və şimal-qərb sərhəd zonasının bir sıra bölmələrində Azərbaycan bölmələri təxribata əl ataraq, sərhədi keçməyə cəhd edib”.

Göründüyü kimi, Rusiya saytları “Dağlıq Qarabağ Respublikası” ifadəsini hələ də işlədirlər. Sanki ora ayrıca bir respublikadır. Halbuki, bu ilin iyunun 24-də “Azərbaycan Respublikası Hökuməti ilə Rusiya Federasiyası Hökuməti arasında beynəlxalq informasiya təhlükəsizliyinin təmin edilməsi sahəsində əməkdaşlıq haqqında Saziş” imzalanıb. Həmin sazişdə aydın şəkildə yazılıb ki, dövlətlər bir-birinin ərazi bütövlüyünə, suverenliyinə qarşı olan informasiya siyasətindən çəkinəcəklər. Ancaq əfsuslar olsun ki, Rusiyada yaradılan EADaily.com saytının bu pozuculuğuna ölkə hakimiyyəti dur demir. Rusiyanın tabeliyində olan informasiya resursunun Azərbaycana qarşı sərgilədiyi düşmənçiliyi görməzdən gəlirlər. Qərəzli olmağın dərəcəsinə bax ki, saytın yaydığı məlumatda Azərbaycan əsgərinin öldürülməsindən bir kəlmə də bəhs edilmir. Ancaq hansısa terrorçu erməni dığasının yaralanmasını xüsusi bir xəbər kimi təqdim edirlər. Bir aydır saziş imzalanıb, amma Rusiya saytları sazişi görməzdən gəlir.

  • “Separatçıların “dövlət” kimi təqdim olunması birbaşa təxribatdır”

Məsələyə münasibət bildirən media eksperti Yadigar Məmmədlinin fikrincə, bütün bunlar onu göstərir ki, Rusiya imzalanan sazişlərə, onların yerinə yetirilməsinə hörmət etmir: “Təkcə bu ilin iyununda Rusiya ilə imzalanan informasiya təhlükəsizliyi sazişindən söhbət getmir. Ondan əvvəl də uzun illərə söykənən Rusiya-Azərbaycan əməkdaşlığı var. Bununla bağlı çoxsaylı sənədlər qəbul olunub. Əfsuslar olsun ki, bir sıra hallarda bu amillər nəzərə alınmır. Rusiyada müəyyən dairələr, onlara yaxın olan media orqanları ermənipərəstliyini bütün sazişlərdən üstün tutur. Onların cəzası verilmir. Separatçıların “dövlət” kimi təqdim olunması birbaşa təxribatdır. Bu ondan irəli gəlir ki, bəlli media orqanları iki dövlət arasında münasibətlərə xələl gətirmək üçün məqsədyönlü şəkildə belə informasiya siyasəti aparırlar. Çox güman ki, Rusiya hakimiyyətində onları himayə edənlər var. Yoxsa onlar bu dərəcədə özlərini cəzasız hiss etməzdilər”.

Media eksperti onu da əlavə etdi ki, Rusiyanın müvafiq qurumları belə təxribatlara dur deməlidir.

Vidadi ORDAHALLI

Peşə etikası

Son xəbərlər