Məlum olduğu kimi, ordumuz Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinə qarşı antiterror əməliyyatı keçirib. Nəticədə ən azı 4 erməni terrorçusu məhv edilib, 15-i yaralanıb.
Qeyd edək ki, Rusiya Federasiyası sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri avqustun 3-ü səhər saatlarında Laçın rayonu istiqamətində yerləşən Azərbaycan Ordusunun bölmələrinin mövqelərini intensiv atəşə tutub. Nəticədə müddətli həqiqi hərbi xidmət hərbi qulluqçusu əsgər Kazımov Anar Rüstəm oğlu aldığı güllə yarasından şəhid olub. Məhz bundan sonra ordumuz “Qisas” cavab əməliyyatı keçirib. Müdafiə Nazirliyi isə bəyan edib ki, Azərbaycan Konstitusiyası rəhbər tutularaq bundan sonra ölkəmizin suveren ərazilərində törədiləcək istənilən terror və təxribatın qarşısı qətiyyətlə alınacaq və əks cavab tədbirləri daha da sarsıdıcı olacaq. Müdafiə Nazirliyinin mətbuat xidmətinin rəis müavini Anar Eyvazov məsələ ilə bağlı bildirib: “Azərbaycan Ordusu bölmələrinin keçirdiyi “Qisas” cavab əməliyyatı nəticəsində Qırxqız yüksəkliyi, həmçinin Kiçik Qafqaz dağ silsiləsinin Qarabağ silsiləsi boyu Sarıbaba və bir sıra digər əhəmiyyətli hakim yüksəkliklər nəzarətə götürüb. Bölmələrimiz tərəfindən əlverişli hədlərdə yeni mövqelərin qurulması və təminat yollarının çəkilməsi üzrə mühəndis işləri görülür”. Bütün bunlar, ekspertlərə görə, sülh prosesini uzadan Ermənistana növbəti ciddi dərs oldu. Erməni politoloq Aleksandr İskəndəryanın fikrincə, bu cür hallar Azərbaycanın danışıqlarda nəticə ala bilmək üçün Ermənistana təzyiqidir: “Qarabağdakı gərginliyin iki səbəbi ola bilər. Birincisi odur ki, Rusiyanın başı Ukraynaya qarışıb və Qarabağla məşğul olmağa vaxtı yoxdur. Və burda Azərbaycan qırmızı xəttin hardan keçdiyini və nə qədər uzağa gedə biləcəyini yoxlayır. İkincisi, danışıqlar prosesi gedir və Azərbaycan müxtəlif təzyiq formalarını danışıqlar prosesi ilə birləşdirir”. Separatçı “Qarabağ hakimiyyəti” bəyan edib ki, Azərbaycan Rusiya sülhməramlıları vasitəsilə Ermənistanla Qarabağ arasında fərqli marşrutun istifadə olunması barədə tələb irəli sürüb. Bu tələbə əməl edilməməsinin də erməni tərəfinə baha başa gələcəyini Azərbaycan bir daha göstərdi. Ölkəmiz Ermənistana bir daha sübut etdi ki, baş verən təxribata görə mütləq və artıqlaması ilə cavab olacaq. Kiminsə himayəsinə sığınmaqla terror fəaliyyətini davam etdirməyə Azərbaycan qətiyyən dözməyəcək. Qeyd edildiyi kimi, Azərbaycan qanunsuz erməni silahlılarının Azərbaycan ərazisindən çıxmasını, Zəngəzur yolunun açılmasını və Laçın yolunun alternativə dəyişdirilməsini tələb edir. Bu tələblər 10 noyabr 2020-ci il bəyanatına əsaslanır. Heç bir manipulyasiyanı, müxtəlif bəhanələrlə vaxt uzatmağı Azərbaycan qəbul etməyəcək. Ölkəmiz dünyaya onu da sübut etdi ki, rus sülhməramlıları Azərbaycanın Qarabağ bölgəsinə erməniləri himayə etmək və separatçı-terrorçuların yenidən baş qaldırmasına şərait yaratmaq üçün yerləşdirilməyib. Azərbaycan ordusu rus sülhməramlı kontingentinin gözü qarşısında belə terrorçu yuvalarını məhv etməyə qadirdir. Müdafiə Nazirliyinin erməni mövqelərindən yaydığı kadrlar göstərdi ki, qarşı tərəf Qarabağda kifayət qədər döyüş maşınları, haubitsalar, tanklar saxlamaqda davam edir. Bu əməliyyatla Azərbaycan Qarabağın hər tərəfinə nəzarət etdiyini, terrorçu yuvalarını dəqiq bildiyini və onların yerdəyişmələrini anbaan izlədiyini, istədiyi vaxt bir zərbə ilə hamısını məhv etməyə hazır olduğunu sübut etdi.
Elə bundan sonra ermənilərin olanlardan bəzi dərslər çıxardığı da bəlli olub. Belə ki, Ordumuzun son dərslərindən sonra Ermənistanın “pastark” agentliyinin məlumatına görə, Qarabağdakı separatçı-terrorçu rejimin qalıqları Laçın şəhəri, Zabux və Sus kəndlərində qalan ermənilərin təxliyəsinə başlayır.
Bu arada, “armenpress” dövlət agentliyinə müsahibəsində Ermənistan Təhlükəsizlik Şurasının katibi Armen Qriqoryan Azərbaycan, Rusiya və Ermənistan arasında imzalanmış 2020-ci il 10 noyabr tarixli üçtərəfli bəyanatın altıncı bəndinə istinad edərək ölkəmizin Laçın dəhlizinə alternativ yol hazırlanması istiqamətində addımlarının qeyri-legitim olduğunu iddia edir: “Bu müddət ərzində bu istiqamətdə müəyyən işlər görülüb, lakin hələ ki, razılaşdırılmış plan yoxdur. Hər halda, Ermənistan heç bir planla razılaşmayıb, ona görə də Azərbaycanın tələbi qanunsuzdur”. Halbuki, Azərbaycan bu istiqamətdə işləri üçtərəfli razılaşmalar əsasında icra edir.
Məlumata görə, baş separatçı Araik Arutyunyan Laçında qalan ermənilərin təxliyəsinin sakit şəkildə aparılmasını, tərk edilən evləri isə yandırmağı tapşırıb. Qeyd edək ki, Laçın dəhlizinin alternativ marşrutunun istifadəyə verilməsi ilə burada qalan ərazilər ordumuzn nəzarətinə keçəcək. Xatırladaq ki, 44 günlük müharibədən sonra Qarabağ və Şərqi Zəngəzur iqtisadi rayonları ərazisində icra olunan mühüm yol infrastrukturu layihələrindən biri də Laçın şəhərinə daxil olmadan yeni avtomobil yolunun tikintisidir. Azərbaycan Avtomobil Yolları Dövlət Agentliyindən bildirilib ki, qurum tərəfindən aparılan tikinti işləri yekunlaşmaq üzrədir. Hazırda layihə üzrə işlər son yekunlaşdırma mərhələsindədir: “İnşaat Norma və Qaydaları”na uyğun olaraq torpaq işləri bitən ərazilərdə yol geyimi inşa edilir, asfalt-beton örtüyü döşənir, yol çiyinləri bərkidilir. Asfaltlanma işləri yekunlaşan hissələrdə isə artıq üfüqi nişanlanma xətləri çəkilir, zəruri yerlərdə yol nişanları və mühafizə səddi (əyri-xətli dəmir tirlər, monolit dəmir-beton) quraşdırılır. Çətin relyefə malik olan ərazidən keçən yol boyunca layihəyə uyğun müxtəlif süni qurğuların tikintisi də icra olunub. Belə ki, zəruri yerlərdə beton küvetlər tikilib, 17 yerdə müxtəlif diametrli dairəvi suötürücü boru, 36 yerdə müxtəlif diametrli plastik boru quraşdırılıb, uzunluğu 149.5 metr, eni 13.5 metr təşkil edən 4 aşırımlı avtomobil körpüsü inşa edilib. Avtomobil yolunun tikintisi zamanı 7.3 milyon kub metr həcmində qazma-tökmə işləri, 1.3 milyon kub metr həcmində qaya partlatma işləri yerinə yetirilib. Bütün inşaat işləri tərtib olunmuş qrafikə uyğun və texnoloji ardıcıllığa riayət olunmaqla AAYDA-nın rəhbərliyinin nəzarəti altında həyata keçirilir.Yeni avtomobil yolu layihəsinin yaxın günlərdə yekunlaşdırılması üçün əraziyə lazımi sayda qüvvə cəlb olunub”. Laçın şəhərinə daxil olmadan yeni avtomobil yolununun tikintisinə 2021-ci ilin iyul ayında başlanılıb. Yolun ümumi uzunluğu 32 km təşkil edir və bundan 10 km Ermənistan ərazisində yerləşir. Ermənilər bu yoldan istifadə etməyə məcbur olduqlarını ordumuzun son dərslərindən sonra daha yaxşı başa düşüblər.
Nahid SALAYEV
